NWKRTC: ಹುಬ್ಬಳ್ಳಿ-ಧಾರವಾಡ ಹೈಕೋರ್ಟ್‌ ನಡುವೆ ಹೊಸ ಬಸ್‌ಗಳ ಸಂಚಾರ- ವಕೀಲರ ಮನವಿ ಸ್ಪಂದಿಸಿದ ಅಧಿಕಾರಿಗಳು
ಹುಬ್ಬಳ್ಳಿ: ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ನಿಗಮದ ಹುಬ್ಬಳ್ಳಿ ವಿಭಾಗದ ನಗರ ಘಟಕ -1ರಿಂದ ಧಾರವಾಡ ಹೈಕೋರ್ಟ್‌ಗೆ ಬೆಳಗ್ಗೆ 8.40ರಿಂದ ಎರಡು ಹೊಸ ಬಸ್‌ಗಳನ್ನು ಬಿಡಲಾಗಿದೆ.
ಈ ಹಿಂದೆ ಇದೇ ಮಾರ್ಗವಾಗಿ ಹಳೇ ಬಸ್‌ಗಳ ಸಂಚಾರವಿತ್ತು. ಆದರೆ ಆ ಬಸ್‌ಗಳು ಆಗಾಗೆ ಕೆಟ್ಟು ನಿಲ್ಲುತ್ತಿದ್ದರಿಂದ ಸರಿಯಾದ ಸಮಯಕ್ಕೆ ಕೋರ್ಟ್‌ಗೆ ಹೋಗುವುದಕ್ಕೆ ನ್ಯಾಯವಾದಿಗಳು ಹಾಗೂ ಇತರರಿಗೆ ಸಮಸ್ಯೆ ಆಗುತ್ತಿತ್ತು. ಈ ಬಗ್ಗೆ ತಿಳಿದ ಕೂಡಲೇ ಸಂಬಂಧಪಟ್ಟ ಅಧಿಕಾರಿಗಳೊಂದಿಗೆ ಸುಪ್ರೀಂ ಕೋರ್ಟ್ ಹಾಗೂ ಹೈ ಕೋರ್ಟ್ ವಕೀಲ ಎಚ್‌.ಬಿ.ಶಿವರಾಜು ಅವರು ಮಾತನಾಡಿ ನೂತನ ಎರಡು ಬಸ್‌ಗಳನ್ನು ಬಿಡಿಸಿದ್ದಾರೆ.
ಈ ಬಸ್‌ಗಳು ಇದೇ ಕಳೆದ ಗುರುವಾರದಿಂದ ರಸ್ತೆಗಿಳಿದಿದ್ದು ಎಲ್ಲ ವಕೀಲರು ಸಂತಸ ವ್ಯಕ್ತಪಡಿಸಿದ್ದು ವಕೀಲ ಶಿವರಾಜು ಹಾಗೂ ಸಂಸ್ಥೆಯ ಅಧಿಕಾರಿಗಳಿಗೆ ಅಭಿನಂದನೆ ತಿಳಿಸಿದ್ದಾರೆ.
ಈ ವೇಳೆ ಮಾತನಾಡಿದ ವಕೀಲ ಶಿವರಾಜು, ನಮ್ಮ ಅನೇಕ ಸಹೋದ್ಯೋಗಿಗಳು ಹಲವು ವರ್ಷಗಳಿಂದ ಧಾರವಾಡ ಹೈಕೋರ್ಟ್‌ಗೆ ಹುಬ್ಬಳ್ಳಿ ನಗರ ಬಸ್‌ ನಿಲ್ದಾಣದಿಂದ ಓಡಾಡುತ್ತಿದ್ದಾರೆ. ಈ ನಡುವೆ ಸರಿಯಾದ ಸಮಯಕ್ಕೆ ಬಸ್‌ಗಳು ಇದ್ದರು ಅವು ಹಳೆಯದಾಗಿದ್ದರಿಂದ ಕೆಲವೊಮ್ಮೆ ಕೆಟ್ಟು ನಿಲ್ಲುತ್ತಿದ್ದವು. ಇದರಿಂದ ಸಮಯಕ್ಕೆ ಸರಿಯಾಗಿ ಕೋರ್ಟ್ ಹೋಗಲಾಗದೆ ವಕೀಲರು ಪರದಾಡುವಂತಾಗುತ್ತಿತ್ತು.
ಹೀಗಾಗಿ ನಾವು ಬೆಂಗಳೂರಿನಿಂದ ಧಾರವಾಡ ಹೈ ಕೋರ್ಟ್‌ಗೆ ಬಂದಾಗ ಸಹೋದ್ಯೋಗಿಗಳು ಈ ಬಗ್ಗೆ ನಮ್ಮ ಗಮನಕ್ಕೆ ತಂದರು. ನಾವು ಸಂಬಂಧಪಟ್ಟ ಅಧಿಕಾರಿಗಳಿಗೆ ಸಮಸ್ಯೆಯನ್ನು ವಿವರಿಸಿದಾಗ ಅಧಿಕಾರಿಗಳು ಕೂಡಲೇ ಸ್ಪಂದಿಸಿ ಹೊಸ ಬಸ್‌ಗಳನ್ನು ಹಾಕಿದ್ದಾರೆ ಇದರಿಂದ ಬಹಳ ಖುಷಿಯಾಯಿತು. ಈ ಸಂಬಂಧ ನಾನು ಅಧಿಕಾರಿಗಳಿಗೆ, ಘಟಕ ವ್ಯವಸ್ಥಾಪಕರಿಗೆ ಅಭಿನಂದನೆ ಸಲ್ಲಿಸುತ್ತೇವೆ ಎಂದು ಹೇಳಿದರು.
Leave a reply
