ಬೆಂಗಳೂರು: ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆಯ ಸಿಬ್ಬಂದಿಗಳಿಗೆ ಪರಿಸರ ಸಂರಕ್ಷಣೆ ಮತ್ತು ಆರೋಗ್ಯ ಅರಿವು ಮೂಡಿಸಲು ಐದನೇಯ ಹಂತದಲ್ಲಿ ಸಸ್ಯಯಜ್ಞ ತಂಡ ಇದೇ ಸೆ.14ರ ಶನಿವಾರ ಬೆಳಗ್ಗೆ 11 ಗಂಟೆಗೆ ಬಿಎಂಟಿಸಿ ಶಾಂತಿನಗರ ಘಟಕ 2 ಮತ್ತು 3ರಲ್ಲಿ ಸಾರಿಗೆ ಸಿಬ್ಬಂದಿಗಳಿಗೆ ಔಷಧೀಯ ಸಸ್ಯಗಳನ್ನು ಉಡುಗೊರೆ ನೀಡುವ ಕಾರ್ಯಕ್ರಮ ಹಮ್ಮಿಕೊಂಡಿದೆ.
ಬಿಎಂಟಿಸಿ ಸಂಸ್ಥೆಯ ಮುಖ್ಯ ಯಾಂತ್ರಿಕ ಅಭಿಯಂತರ ಎ.ಎನ್‌.ಗಜೇಂದ್ರ ಕುಮಾರ್ ಮತ್ತು ಮುಖ್ಯ ಕಾರ್ಮಿಕ ಕಲ್ಯಾಣಾಧಿಕಾರಿ ದಿವಾಕರ್ ಅವರ ಮಾರ್ಗದರ್ಶನದಲ್ಲಿ ಸಂಸ್ಥೆಯ ದಕ್ಷಿಣ ವಲಯದ ವಿಭಾಗೀಯ ನಿಯಂತ್ರಣಾಧಿಕಾರಿ ಆಶಾಲತಾ ಅವರ ನೇತೃತ್ವದಲ್ಲಿ 21 ವಿವಿಧ ಬಗೆಯ 510 ಔಷಧೀಯ ಸಸ್ಯಗಳನ್ನು ವಿತರಣೆ ಮಾಡಲಾಗುವುದು.
ಇನ್ನು ಇದೇ ವೇಳೆ ವಿತರಿಸಿರುವ ಸಸ್ಯಗಳ ಔಷಧೀಯ ಗುಣಗಳ ಮಹತ್ವವನ್ನು ತಿಳಿಸಲಾಗುವುದು. ಘಟಕ 2ರ ಘಟಕ ವ್ಯವಸ್ಥಾಪಕ ಈ.ಕಾಂತರಾಜ್ ಮತ್ತು ಘಟಕ 3ರ ಘಟಕ ವ್ಯವಸ್ಥಾಪಕರಾದ ಮಹಮದ್ ಆಕ್ಮಲ್ ಪಾಷ ಅವರ ಉಪಸ್ಥಿತಿಯಲ್ಲಿ ನಡೆಯುವ ಈ ವಿನೂತನ ಸರಳ ಕಾರ್ಯಕ್ರಮಕ್ಕೆ ಎಲ್ಲರ ಸಹಕಾರ ಅತ್ಯಗತ್ಯವಾಗಿದೆ ಎಂದು ಸಸ್ಯಯಜ್ಞ ತಂಡ ತಿಳಿಸಿದೆ.
ತಾವೆಲ್ಲರೂ ಆರೋಗ್ಯದ ಅರಿವಿನ ಜತೆ ಪರಿಸರ ಸಂರಕ್ಷಣೆಯ ಜಾಗೃತಿ ಮೂಡಿಸುವ ಪ್ರಾಮಾಣಿಕ ಪ್ರಯತ್ನದ ಕಾರ್ಯಕ್ರಮಕ್ಕೆ ಆಗಮಿಸುವ ಮೂಲಕ ಸಾಕ್ಷಿಯಾಗಬೇಕು ಎಂದು ಮನವಿ ಮಾಡಿದೆ.
ವಿಶೇಷ ಸೂಚನೆ:- ಸಿಬ್ಬಂದಿಗಳು ಮತ್ತು ಸಾರ್ವಜನಿಕರು ಅವರ ತಂದೆ /ತಾಯಿ ಹೆಸರಿನಲ್ಲಿ ಉಡುಗೊರೆಯಾಗಿ ಪಡೆಯುವ ಈ ಒಂದೊಂದು ಗಿಡವನ್ನು ನೆಟ್ಟು ಪೋಷಣೆ ಮಾಡುವ ಮೂಲಕ ಉತ್ತಮ ಪರಿಸರಕ್ಕೆ ನಾಂದಿಯಾಡಬೇಕಿದೆ.
