ಬೆಂಗಳೂರು: ಬೆಂಗಳೂರು ಮಹಾನಗರ ಸಾರಿಗೆ ನಿಗಮ ಕಳೆದ 2023ರ ಮಾರ್ಚ್ನಿಂದ ಈಚೆಗೆ ನಿವೃತ್ತರಾದ ನೌಕರರಿಗೆ ಈವರೆಗೂ ಅಂದಾಜು 400 ಕೋಟಿ ರೂ.ಗಳವರೆಗೆ ಗ್ರಾಚ್ಯುಟಿ ಮತ್ತು Encashment leave (EL) ರಜೆ ನಗದಿಕರಣ ಹಣ ಪಾವತಿಸದೆ ನಿವೃತ್ತ ನೌಕರರು ಕಳೆದ 16 ತಿಂಗಳಿನಿಂದಲೂ ನಿತ್ಯ ಕೇಂದ್ರ ಕಚೇರಿಗೆ ಅಲೆಯುತ್ತಿದ್ದಾರೆ.
2023ರ ಮಾರ್ಚ್ನಲ್ಲಿ ಮತ್ತು ಏಪ್ರಿಲ್‌ನಲ್ಲಿ ನಿವೃತ್ತರಾದ ನೌಕರರಿಗೆ ಗ್ರಾಚ್ಯುಟಿ ಹಣವನ್ನು ಕೊಟ್ಟಿದ್ದೆ ಆದರೆ, EL ಹಣವನ್ನು ಈವರೆಗೂ ಕೊಟ್ಟಿಲ್ಲ. ಇನ್ನು ಮೇ 2023ರಿಂದ ಈವರೆಗೂ ನಿವೃತ್ತರಾಗಿರುವ ಸಂಸ್ಥೆಯ 1500ಕ್ಕೂ ಹೆಚ್ಚು ನೌಕರರಿಗೆ ಗ್ರಾಚ್ಯುಟಿ ಮತ್ತು EL ಈ ಎರಡರ ಹಣವನ್ನು ಕೊಟ್ಟಿಲ್ಲ.
ಈ ಬಗ್ಗೆ ಸಂಬಂಧಪಟ್ಟ ಅಧಿಕಾರಿಗಳನ್ನು ಕೇಳಿದರೆ ಇನ್ನು ಸರ್ಕಾರದಿಂದ ಯಾವುದೇ ಹಣ ಬಂದಿಲ್ಲ ಬಂದಮೇಲೆ ಕೊಡುತ್ತೇವೆ ಈಗ ಹೋಗಿ ಎಂದು ನಿವೃತ್ತ ನೌಕರರಿಗೆ ಹೇಳಿ ಕಳುಹಿಸುತ್ತಿದ್ದಾರೆ. ಇದರಿಂದ ಈ ಗ್ರಾಚ್ಯುಟಿ ಮತ್ತು EL ಹಣ ಯಾವಾಗ ಬರುತ್ತದೋ ಎಂಬ ಬಗ್ಗೆ ಸ್ಪಷ್ಟ ಮಾಹಿತಿ ಇಲ್ಲದಿರುವುದರಿಂದ ಕಚೇರಿ ಟೈಂನಲ್ಲಿ ನಿತ್ಯ ನೂರಾರು ಮಂದಿ ನಿವೃತ್ತ ನೌಕರರು ಅಲೆಯುತ್ತಿದ್ದಾರೆ.
ಆದರೂ ಅವರಿಗೆ ಯಾವಾಗ ಹಣ ಬರುತ್ತದೆ ಎಂಬ ಬಗ್ಗೆ ಯಾವುದೇ ಅಧಿಕೃತ ಮಾಹಿತಿ ಇಲ್ಲವಾಗಿದೆ. ಕಳೆದ 2023ರ ಮಾರ್ಚ್ನಿಂದ EL ತಲಾ 2.5 ಲಕ್ಷದಿಂದ 6ಲಕ್ಷ ರೂ.ಗಳವರೆಗೂ ಬರಬೇಕಿದೆ, ಇನ್ನು ಗ್ರಾಚ್ಯುಟಿ 18ರಿಂದ 20 ಲಕ್ಷ ರೂ.ಗಳ ವರೆಗೂ ಬರಬೇಕಿದೆ. ಅಂದರೆ ಅಂದಾಜು 400 ಕೋಟಿ ರೂಪಾಯಿಯನ್ನು ನಿವೃತ್ತರಿಗೆ ಸಕಾಲಕ್ಕೆ ಪಾವತಿಸದೆ ಸಂಸ್ಥೆ ಸುಮ್ಮನೆ ಅಲೆಸುತ್ತಿದೆ ಎಂದು ಇಳಿವಯಸ್ಸಿನ ನಿವೃತ್ತ ನೌಕರರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಇನ್ನು ನಮಗೆ 300 EL ಹಣ 6 ಲಕ್ಷ ರೂಪಾಯಿ ಬರಬೇಕು. ಜತೆಗೆ ಗ್ರಾಚ್ಯುಟಿ ಹಣ 19 ಲಕ್ಷ ರೂಪಾಯಿವರೆಗೂ ಬರಬೇಕು. ಅಂದರೆ ಈ ಗ್ರಾಚ್ಯುಟಿ ಮತ್ತು EL ಎರಡನ್ನು ಸೇರಿಸಿದರೆ ಒಟ್ಟು ನನಗೇ 25 ಲಕ್ಷ ರೂಪಾಯಿವರೆಗೆ ಬರಬೇಕಿದೆ ಎಂದು 16 ತಿಂಗಳ ಹಿಂದೆಯೇ ನಿವೃತ್ತರಾದ ಹೆಸರೇಳಲಿಚ್ಛಿಸದ ನೌಕರರೊಬ್ಬರು ವಿಜಯಪಥಕ್ಕೆ ತಿಳಿಸಿದ್ದಾರೆ.
ಕಳೆದ ವಾರ ಈ ಸಂಬಂಧ ನಿಗಮದ ಎಂಡಿ ರಾಮಚಂದ್ರನ್ಅವರನ್ನು ನಿವೃತ್ತ ನೌಕರರು ಭೇಟಿ ಮಾಡಿದಾಗ ಬರುವ ಡಿಸೆಂಬರ್ತಿಂಗಳಿಗೆ ಸರ್ಕಾರ ಹಣ ಬಿಡುಗಡೆ ಮಾಡಲಿದ್ದು ಆ ಹಣ ಬಂದ ಕೂಡಲೇ ನಿಮ್ಮ ಬ್ಯಾಂಕ್ಖಾತೆಗಳಿಗೆ ಜಮಾ ಮಾಡುತ್ತೇವೆ ಎಂದು ಹೇಳಿದ್ದಾರೆ.
ಇನ್ನು ಸರ್ಕಾರ ವಿದ್ಯಾರ್ಥಿಗಳಿಗೆ, ಕಟ್ಟಡ ಕಾರ್ಮಿಕರಿಗೆ, ಅಂಗವಿಕಲರಿಗೆ, ವೃದ್ಧರಿಗೆ ಹೀಗೆ ಹಲವಾರು ರೀತಿಯಲ್ಲಿ ಸಂಸ್ಥೆಯಿಂದ ಕೊಡುತ್ತಿರುವ ರಿಯಾಯಿತಿ ಪಾಸ್ಗಳ ಹಣವನ್ನು ಇನ್ನು ನಿಗಮಕ್ಕೆ ಬಿಡುಗಡೆ ಮಾಡದಿರುವುದರಿಂದ ನಿಗಮದಲ್ಲಿ ನಿವೃತ್ತರಾಗಿರುವ ಮತ್ತು ನಿವೃತ್ತರಾಗುತ್ತಿರುವ ನೌಕರರಿಗೆ ಸಕಾಲದಲ್ಲಿ ಅವರ ಗ್ರಾಚ್ಯುಟಿ ಮತ್ತು EL ಹಣವನ್ನು ಕೊಡಲಾಗುತ್ತಿಲ್ಲ ಎಂದು ಸಂಸ್ಥೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಒಟ್ಟಾರೆ ಸರ್ಕಾರ ಸಾರಿಗೆ ನಿಗಮಗಳ ನೌಕರರಿಗೆ 2020 ಜನವರಿ 1ರಿಂದ ಅನ್ವಯವಾಗುವಂತೆ ಶೇ.15ರಷ್ಟು ವೇತನ ಹೆಚ್ಚಳ ಮಾಡಿರುವ ಆ ವೇತನ ಹೆಚ್ಚಳದ 38 ತಿಂಗಳ ಹಿಂಬಾಕಿಯನ್ನು ಕೊಟ್ಟಿಲ್ಲ. ಜತೆಗೆ 30-40ವರ್ಷಗಳು ನಿರಂತರವಾಗಿ ಸೇವೆ ಸಲ್ಲಿಸಿ ನಿವೃತ್ತರಾದ ನೌಕರರಿಗೂ 400 ಕೊಟಿ ರೂ. ಕೊಡದೆ ಬಾಕಿ ಉಳಿಸಿಕೊಂಡಿದೆ. ಇದರಿಂದ ನಿತ್ಯ ಸಾರಿಗೆ ನೌಕರರು ಆರ್ಥಿಕ ಸಮಸ್ಯೆ ಅನುಭವಿಸುವಂತಾಗಿದೆ.
ಅಲ್ಲದೆ ಮಕ್ಕಳ ಉನ್ನತ ವಿದ್ಯಾಭ್ಯಾಸ, ಮಧುವೆ ಸೇರಿದಂತೆ ಇತರೆ ವ್ಯವಹಾರಗಳಿಗೆ ಸಾಲ ಮಾಡಿಕೊಂಡಿದ್ದು, ಈ ಹಣ ಬಂದರೆ ಅನುಕೂಲವಾಗುತ್ತದೆ ಎಂದು ಅಂದುಕೊಂಡಿದ್ದ ನಿವೃತ್ತ ನೌಕರರಿಗೆ ಸಕಾಲಕ್ಕೆ ಹಣ ಸಿಗದಿರುವುದರಿಂದ ಪಡೆದ ಸಾಲಕ್ಕೆ 2ರಿಂದ 5% ವರೆಗೂ ಬಡ್ಡಿ ಕಟ್ಟುವಂತಾಗಿದೆ ಎಂದು ಅಳಲು ತೋಡಿಕೊಂಡಿದ್ದಾರೆ.
