-
ಸುಸಜ್ಜಿತ ಸರಕು ಸಾಗಣೆ ವಾಹನಗಳು, ಪ್ರತಿ ವಾಹನವೂ ಆರು ಟನ್ ಸಾಮರ್ಥ್ಯದೊಂದಿಗೆ ವೈವಿಧ್ಯಮಯ ಸೇವೆಗೆ ತೆರೆದುಕೊಳ್ಳುತ್ತಿದೆ
ಬೆಂಗಳೂರು: ಟಿಕೆಟ್ ರಹಿತ ಆದಾಯ ಹೆಚ್ಚಿಸುವ ಉದ್ದೇಶದಿಂದ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ‘ನಮ್ಮ ಕಾರ್ಗೋ’ ಆರಂಭಿಸಲು ಸಜ್ಜಾಗಿದೆ. ಹೌದು! KSRTC ಟಿಕೆಟ್ ರಹಿತ ಆದಾಯವನ್ನು ಹೆಚ್ಚಿಸುವ ಉದ್ದೇಶದಿಂದ 20 ಸಂಪೂರ್ಣ ಸುಸಜ್ಜಿತ ಟ್ರಕ್‌ಗಳನ್ನು ನಿಯೋಜಿಸುವ ಮೂಲಕ ಲಾಜಿಸ್ಟಿಕ್ಸ್ ವ್ಯವಹಾರವನ್ನು ಪ್ರವೇಶಿಸಲು ಸಜ್ಜಾಗಿದೆ.
ಕರ್ನಾಟಕದಾದ್ಯಂತ ಇರುವ ಡಿಪೋಗಳು ಸೇರಿದಂತೆ ಅದರ ವ್ಯಾಪಕ ಸಂಪರ್ಕ ಮತ್ತು ಸಂಪನ್ಮೂಲಗಳ ಆಧಾರದ ಮೇಲೆ, ಸರ್ಕಾರಿ ಸ್ವಾಮ್ಯದ ನಿಗಮವು ಲಾಜಿಸ್ಟಿಕ್ಸ್ ವ್ಯವಹಾರದಲ್ಲಿ ವೈವಿಧ್ಯಗೊಳ್ಳುತ್ತದೆ ಎಂದು ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ತಿಳಿಸಿದ್ದಾರೆ.
2021ರಲ್ಲಿ, KSRTC ‘ನಮ್ಮ ಕಾರ್ಗೋ’ ಸೇವೆಗಳನ್ನು ಪ್ರಾರಂಭಿಸಿತು, BMTC ಹೊರತುಪಡಿಸಿ, ರಾಜ್ಯ ರಸ್ತೆ ಸಾರಿಗೆ ನಿಗಮಗಳಿಗೆ ಆದಾಯ- ಹೆಚ್ಚಿಸುವ ಮತ್ತೊಂದು ಮೂಲವಾಗಿ ಬಸ್‌ಗಳಲ್ಲಿ ಪಾರ್ಸೆಲ್‌ಗಳನ್ನು ಸಾಗಿಸಲು ಅನುವು ಮಾಡಿಕೊಟ್ಟಿದೆ. ಈಗ ಕಾರ್ಗೋ ಸೇವೆಯನ್ನು ವಿಸ್ತರಿಸುತ್ತಾ, ಸರಕ ಸಾಗಣೆ ವಾಹನಗಳನ್ನು ಸೇರಿಸುವ ಮೂಲಕ ಲಾಜಿಸ್ಟಿಕ್ಸ್ ವಲಯಕ್ಕೆ ವಿಸ್ತಾರವಾಗಿ ತೆರೆದುಕೊಳ್ಳಲು ಸಜ್ಜಾಗಿದೆ.
ನಾವು ನಮ್ಮ ಪಾರ್ಸೆಲ್ ಸೇವೆಗಳನ್ನು ಏಜೆನ್ಸಿಗಳಿಗೆ ಹೊರಗುತ್ತಿಗೆ ನೀಡುವ ಮೂಲಕ ವಾರ್ಷಿಕ ಆದಾಯದಲ್ಲಿ ಅಂದಾಜು 4 ಕೋಟಿ ರೂ.ಗಳನ್ನು ಗಳಿಸುತ್ತಿದ್ದೇವೆ. ಈಗ ನಾವು ನಮ್ಮ ಕಾರ್ಗೋವನ್ನು ಪರಿಚಯಿಸಿದ್ದೇವೆ, ಇಲ್ಲಿ ನಾವು ಸೇವೆಯನ್ನು ಪ್ರತ್ಯೇಕವಾಗಿ ನಿರ್ವಹಿಸಲಿದ್ದು ಮತ್ತು ಏಜೆನ್ಸಿಗಳಿಗೆ ಶೇ.20 ಕಮಿಷನ್ ನೀಡುವ ಮೂಲಕ ಸೇವೆಯನ್ನು ಇನ್ನಷ್ಟು ವಿಸ್ತರಿಸುವ ಗುರಿ ಹೊಂದಿದ್ದೇವೆ,
ಸದ್ಯ ಮಾಸಿಕ 1.10 ಕೋಟಿ ರೂ.ಗಳ ಆದಾಯ ಗಳಿಸುತ್ತಿದ್ದು, ಇದು ಪ್ರಾಯೋಗಿಕವಾಗಿದೆ. ಇನ್ನು ಮುಂಬರುವ ದಿನಗಳಲ್ಲಿ ಇದನ್ನು ಇನ್ನಷ್ಟು ವಿಸ್ತರಿಸುವ ನಿರೀಕ್ಷೆಯೊಂದಿಗೆ ನಾವು 20 ಟ್ರಕ್‌ಗಳನ್ನು ಸೇರ್ಪಡೆಗೊಳಿಸುತ್ತಿದ್ದೇವೆ. ಈ ಮೂಲಕವೂ ಲಾಜಿಸ್ಟಿಕ್ ವ್ಯವಹಾರದಿಂದ ವಾರ್ಷಿಕ 100 ಕೋಟಿ ರೂ.ಗಳ ಆದಾಯ ತಲುಪುವುದು ನಮ್ಮ ಗುರಿಯಾಗಿದೆ ಎಂದು ಸಾರಿಗೆ ಸಚಿವರು ತಿಳಿಸಿದ್ದಾರೆ.
ಸಚಿವರ ಪ್ರಕಾರ, ಕೆಎಸ್ಆರ್ಟಿಸಿ ಪ್ರತಿ ವಾಹನಕ್ಕೆ 17 ಲಕ್ಷ ರೂ.ಗಳ ದರದಲ್ಲಿ ಟ್ರಕ್‌ಗಳನ್ನು ಖರೀದಿಸಿದೆ. ಈ ಸಂಪೂರ್ಣ-ಸುಸಜ್ಜಿತ ಟ್ರಕ್‌ಗಳು, ಪ್ರತಿಯೊಂದೂ ಆರು-ಟನ್ ಸಾಮರ್ಥ್ಯವುಳ್ಳದ್ದಾಗಿದ್ದು, ಹಣ್ಣು, ತರಕಾರಿಗಳು, ಜವಳಿ ಮತ್ತು ಔಷಧೀಯ ವಸ್ತುಗಳಂತಹ ವೈವಿಧ್ಯಮಯ ಸೇವೆಗಳನ್ನು ಪೂರೈಸುವ ಗುರಿಹೊಂದಿದೆ.
ಜನರ ನಂಬಿಕೆ ಮತ್ತು ಗೌರವದ ಮೇಲೆ ಕೆಎಸ್ಆರ್ಟಿಸಿ ಲಾಜಿಸ್ಟಿಕ್ಸ್ ಕ್ಷೇತ್ರಕ್ಕೆ ಕಾಲಿಡುತ್ತಿದೆ. ಹೊಸ ಉದ್ಯಮದಿಂದ ನಾವು ಯಶಸ್ಸನ್ನು ನಿರೀಕ್ಷಿಸುತ್ತಿದ್ದೇವೆ. ಜತೆಗೆ ನಮ್ಮ ಟ್ರಕ್‌ಗಳು ರಾಜ್ಯದ ವಿವಿಧ ವಲಯಗಳಲ್ಲಿ ಸೇವೆ ಸಲ್ಲಿಸಲಿವೆ, ವಿಶೇಷವಾಗಿ ಕೃಷಿ, ಜವಳಿ ಮತ್ತು ಆಟೋಮೊಬೈಲ್ ಸೇರಿ ವಿವಿಧ ಕ್ಷೇತ್ರಗಳಲ್ಲಿ ಸರಕುಗಳನ್ನು ಸಾಗಿಸಲು ಐದರಿಂದ ಆರು ಟನ್ ತೂಕದ ಲೋಡಿಂಗ್ ವಾಹನಗಳು ಬೇಡಿಕೆಯಲ್ಲಿದ್ದು ಅದಕ್ಕೆ ತಕ್ಕ ವಾಹನಗಳನ್ನು ಖರೀದಿಸಿದ್ದೇವೆ ಎಂದು ಕೆಎಸ್ಆರ್ಟಿಸಿ ವ್ಯವಸ್ಥಾಪಕ ನಿರ್ದೇಶಕ ವಿ.ಅನ್ಬುಕುಮಾರ್ ತಿಳಿಸಿದ್ದಾರೆ.
KSRTC ತನ್ನ ಸರಕು ಸಾಗಣೆ ವಾಹನಗಳಿಗೆ ಗಾಢ ನೀಲಿ ಬ್ರ್ಯಾಂಡಿಂಗ್ ಒಳಗೊಂಡ ಲೋಗೋವನ್ನು ರಚಿಸಿದೆ. ಅಧಿಕಾರಿಗಳ ಪ್ರಕಾರ, ಈ ಆಯ್ಕೆಯು ವಿಶ್ವಾಸಾರ್ಹತೆ, ಅಧಿಕಾರ ಮತ್ತು ಜ್ಞಾನವನ್ನು ಸಂಕೇತಿಸುತ್ತದೆ, ಹೀಗಾಗಿ ನಾವು ಕೆಎಸ್ಆರ್ಟಿಸಿ ಸರಕು ವಾಹನಗಳಲ್ಲಿ ಗಾಢ ನೀಲಿ ಬಣ್ಣಕ್ಕೆ ಹೆಚ್ಚು ಒತ್ತು ಕೊಟ್ಟಿದ್ದೇವೆ ಎಂದು ಹೇಳುತ್ತಿದ್ದಾರೆ.
