ಬೆಲೆ ಏರಿಕೆ ಬಿಸಿ ನಡುವೆಯೂ ಹಣತೆ, ಹೂವು, ಪಟಾಕಿ, ಹಣ್ಣುಗಳ ವ್ಯಾಪಾರ ವಹಿವಾಟು ಜೋರು

ಬೆಂಗಳೂರು: ರಾಜ್ಯದ ರಾಜಧಾನಿ ಸೇರಿದಂತೆ ನಾಡಿನಾದ್ಯಂತ ಬೆಳಕಿನ ಹಬ್ಬದ ಮೆರುಗು ಭರ್ಜರಿಯಾಗಿ ನಡೆದಿದೆ. ಈ ನಡುವೆ ನಗರದ ವಿವಿಧ ಮಾರುಕಟ್ಟೆಗಳಲ್ಲಿ ದೀಪಾವಳಿಯ ರಂಗು ಹೆಚ್ಚಿಸುವಂತ ಹಣತೆ, ಹೂವು, ತರಕಾರಿ, ಹಣ್ಣುಗಳು, ಇತರ ವಸ್ತುಗಳ ವ್ಯಾಪಾರ ವಹಿವಾಟು ಜೋರಾಗಿಯೇ ನಡೆದಿದೆ.

ಯಾವುದೇ ಹಬ್ಬ ಬಂದರೂ ಬೆಂಗಳೂರಿನ ಕೆ.ಆರ್ ಮಾರ್ಕೆಟ್ ಫುಲ್ ಬ್ಯುಸಿ ಆಗುವುದು ಸಾಮಾನ್ಯ. ಆದರೆ, ದೀಪಾವಳಿ ಹಬ್ಬಕ್ಕೆ ಉಳಿದ ಎಲ್ಲ ಹಬ್ಬಕ್ಕಿಂತ ಹೆಚ್ಚು ಜನ ದಟ್ಟಣೆ ಆಗುತ್ತದೆ. ವಸ್ತುಗಳನ್ನು ಕೊಂಡುಕೊಳ್ಳಲು ನಾನು ಮುಂದು, ನೀ ಮುಂದು ಎಂದು ಮುಗಿ ಬೀಳುತ್ತಾರೆ. ಹೀಗಾಗಿ ಮಾರ್ಕೆಟ್​​ಗೆ ಹೆಚ್ಚಿನ ಸಂಖ್ಯೆಯಲ್ಲಿ ಜನ ಆಗಮಿಸಿದ್ದು ಇದರಿಂದ ಹಲವು ಕಡೆ ಟ್ರಾಫಿಕ್​ ಉಂಟಾಗಿತ್ತು.

ಗ್ರಾಹಕರು ಮಾರ್ಕೆಟ್​​ನಲ್ಲಿ ನವಿಲು ದೀಪ, ಪಂಚಮುಖಿ ದೀಪ, ಲಕ್ಷ್ಮಿ ದೇವಿ ದೀಪ ಸೇರಿ ಇತರೆ ಕೆಲ ವಿಧಧಲ್ಲಿರುವ ಮಣ್ಣಿನ ಹಣತೆಗಳನ್ನು ಖರೀದಿಗೆ ಮುಗಿಬೀಳುತ್ತಿದ್ದಾರೆ. ಪಟಾಕಿಗಳನ್ನು ಗ್ರಾಹಕರು ಖರೀದಿ ಮಾಡುತ್ತಿದ್ದು ರಾಕೆಟ್, ಭೂಚಕ್ರ, ಹೂ-ಕುಂಡ, ಸರ್‌ಸುರ್ ಬತ್ತಿ ಇತ್ಯಾದಿಗಳನ್ನ ತೆಗೆದುಕೊಳ್ಳುತ್ತಿದ್ದಾರೆ.

ದೀಪಾವಳಿ ಹಿನ್ನೆಲೆಯಲ್ಲಿ ಹೂವು, ಹಣ್ಣುಗಳು, ತರಕಾರಿ, ದಿನಸಿಗಳು ಹೆಚ್ಚಿನ ಬೆಲೆ ಕುದುರಿಸಿಕೊಂಡಿವೆ. ನಿತ್ಯದ ಮಾರಾಟದ ಬೆಲೆಗಿಂತ ಇಂದು ಹೆಚ್ಚಿನ ಬೆಲೆಗೆ ಮಾರಾಟ ಆಗುತ್ತಿವೆ. ಬೆಲೆ ಹೆಚ್ಚಾದರೂ ಹಬ್ಬಕ್ಕೆಂದು ಜನ ಖರೀದಿ ಮಾಡುತ್ತಿದ್ದಾರೆ. ಹೂವುಗಳು ಮಾತ್ರ ಭಾರೀ ಬೆಲೆಗೆ ಮಾರಾಟ ಆಗುತ್ತಿವೆ. ಇದರಿಂದ ಗ್ರಾಹಕರು ಫುಲ್ ಶಾಕ್ ಆಗಿದ್ದಾರೆ.

ಮಾರ್ಕೆಟ್​ನಲ್ಲಿ ಪ್ರತಿ ಕೆ.ಜಿ ಹೂವುಗಳ ಬೆಲೆ ಸುಮಾರು ಹೇಗಿದೆ..?: ಕನಕಾಂಬರ- ₹2,000. ಮಲ್ಲಿಗೆ- ₹1,500. ಗುಲಾಬಿ- ₹260. ಸೇವಂತಿಗೆ- ₹160. ಸುಗಂಧರಾಜ- ₹200. ಅಣಗಲು ಹೂ- ₹700. ಚೆಂಡೂ ಹೂ- ₹120. ಕಾಕಾಡ- ₹800. ದುಂಡು ಮಲ್ಲಿಗೆ- ₹1,500- ₹1800. ಜೋಡಿ ಕಲಮ- ₹100 ಆಗಿತ್ತು.