ಹುಬ್ಬಳ್ಳಿ: ನಿವೃತ್ತ ಸಾರಿಗೆ ನೌಕರರಿಗೆ ಬರಬೇಕಿರುವ ಎಲ್ಲ ಬಾಕಿ ಹಣವನ್ನು ನವೆಂಬರ್‌ ಮೊದಲವಾರದಲ್ಲೇ ಕೊಟ್ಟರೆ ಅನುಕೂಲವಾಗಲಿದೆ ಎಂದು ಹುಬ್ಬಳ್ಳಿಯ ಸೇವಾ ನಿವೃತ್ತಿ ನೌಕರರ ಬಾಕಿ (ವೇತನ, ಗ್ರಾಚ್ಯುಟಿ, ನಿವೃತ್ತಿ ಗಳಿಕೆ ರಜೆ ನಗಧೀಕರಣ ಹಾಗೂ ಇನ್ನಿತರ ಸೌಲಭ್ಯಗಳು) ಬರುವ ಹೋರಾಟ ಸಮಿತಿ ಮನವಿ ಮಾಡಿದೆ.
ಈ ಕುರಿತು ಸಾರಿಗೆ ಸಚಿವ ರಾಮಲಿಗಾರೆಡ್ಡಿ ಅವರಿಗೆ ಭಾನುವಾರ ಹುಬ್ಬಳ್ಳಿಯಲ್ಲಿ ಸಮಿತಿಯ ಪದಾಧಿಕಾರಿಗಳು ಹನುಮಂತ ಅವರ ನೇತೃತ್ವದಲ್ಲಿ ಮನವಿ ಪತ್ರ ಸಲ್ಲಿಸಿದ್ದಾರೆ.
ಆ ಮನವಿ ಪತ್ರದಲ್ಲಿ ಸೇವಾ ವಿಮುಕ್ತಿ ನಿವೃತ್ತಿ/ ನಿಧನ/ ಸ್ವಯಂ ನಿವೃತ್ತಿ ನೌಕರರಿಗೆ 1-1-2020 ರಿಂದ 28- 2-2023 ರವರೆಗಿನ ಅವಧಿಗೆ ಶೇಕಡಾ 15ರ ವೇತನ ಹೆಚ್ಚಳದ ವ್ಯತ್ಯಾಸದ ಉಪಧನ ಮತ್ತು ನಿವೃತ್ತಿ ಗಳಿಕೆರಜೆ ನಗಧೀಕರಣ ಮೊತ್ತವನ್ನು ನವೆಂಬರ-2024 ರೊಳಗಾಗಿ ಪಾವತಿಸಲಾಗುವುದು ಎಂದು ನೀವೆ ತಿಳಿಸಿದ್ದೀರಿ.
9-10-2024 ರಲ್ಲಿ ವಿಧಾನಸೌಧದಲ್ಲಿ ನಡೆದ ಸಭೆಯಲ್ಲಿ ಈ ಬಗ್ಗೆ ತಿಳಿಸಿದ್ದು, ಇದರಿಂದಾಗಿ ರಾಜ್ಯದ ನಿವೃತ್ತ ಸಿಬ್ಬಂದಿ ಮತ್ತು ಹಾಲಿ ಸಿಬ್ಬಂದಿಗಳ ಮೇಲೆ ನೀವು ಇಟ್ಟಿರುವ ವಿಶೇಷ ಕಾಳಜಿ ಎದ್ದು ಕಾಣುತ್ತಿದೆ. ಈ ತಮ್ಮ ಕರುಣೆಯ ನಿರ್ಧಾರಕ್ಕೆ ನಾವು ಚಿರರುಣಿ ಎಂದು ತಿಳಿಸಿದ್ದಾರೆ.
ಪ್ರಸ್ತುತ ನಮ್ಮ ಮಕ್ಕಳ ವಿದ್ಯಾಭ್ಯಾಸ, ವೈದ್ಯಕೀಯ ಚಿಕಿತ್ಸೆ, ಜೀವನದ ಜತೆಗೆ ಸದ್ಯ ದೀಪಾವಳಿ ಹಬ್ಬ ಬರುತ್ತಿದೆ. ಹೀಗಾಗಿ ಹಣದ ಅವಶ್ಯಕತೆ ತುಂಬಾ ಇದೆ. ಆದ್ದರಿಂದ ಈ ಹಣವನ್ನು ನಾವು ಹಿಂದೆ ಮನವಿಯಲ್ಲಿ ತಿಳಿಸಿದಂತೆ ನವೆಂಬರ ಮೊದಲನೇ ವಾರದಲ್ಲೇ ಪಾವತಿಸಬೇಕು ಎಂದು ವಿನಂತಿಸಿಕೊಳ್ಳುತ್ತೇವೆ ಎಂದು ಹನುಮಂತ ತಿಳಿಸಿದ್ದಾರೆ.
