KSRTC ಅಧಿಕಾರಿಗಳು- ಭಯದಿಂದ ಮೂಲೇಲಿ ಕುಳಿತುಕೊಂಡರೆ ಆ ಮೂಲೆಯೇ ನಿಮಗೆ ಇನ್ನಷ್ಟು ಭಯ ಉಂಟು ಮಾಡುತ್ತದೆ!

ಬೆಂಗಳೂರು: ಈ ಹಿಂದಿನಿಂದಲೂ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆಯ ನಾಲ್ಕೂ ನಿಗಮಗಳ ನೌಕರರ ವೇತನ ಪರಿಷ್ಕರಣೆಯನ್ನು ವರ್ಷಗಳು ಉರುಳಿದ ಬಳಿಕವೇ ಮಾಡಲಾಗುತ್ತಿತ್ತು. ಆದರೆ, ಕಳೆದ 2020 ಜನವರಿ 1ರಿಂದ ಆಗಬೇಕಿದ್ದ ವೇತನ ಪರಿಷ್ಕರಣೆಯನ್ನು ಅಂದಿನ ಬಿಜೆಪಿ ಸರ್ಕಾರ ಮೊಂಡುತನ ಪ್ರದರ್ಶಿಸಿ ನೌಕರರಿಗೆ ವಿಳಂಬವಾಗಿ 2023ರ ಮಾರ್ಚ್‌ನಲ್ಲಿ ಶೇ.15ರಷ್ಟು ವೇತನ ಹೆಚ್ಚಳ ಮಾಡಿತ್ತು.

ಅದನ್ನೆ ಈಗಿನ ಕಾಂಗ್ರೆಸ್‌ ಸರ್ಕಾರ ದಾಳವಾಗಿ ಉಪಯೋಗಿಸಿಕೊಂಡು ಕೋವಿಡ್‌ ನೆಪವನ್ನೂ ಹೇಳಿಕೊಂಡು ನಾವು ವೇತನ ಹೆಚ್ಚಳದ 38 ತಿಂಗಳ ಹಿಂಬಾಕಿ ಕೊಡುವುದಿಲ್ಲ ಎಂದು   ನೌಕರರಿಗೆ ಅನ್ಯಾಯ ಎಸಗುತ್ತಿದೆ.

ನೌಕರರಿಗೆ ಕೊಡಬೇಕಿರುವ ವೇತನ ಹೆಚ್ಚಳ ಹಿಂಬಾಕಿ ಹಾಗೂ 2024 ಜನವರಿ 1ರಿಂದ ಆಗಬೇಕಿರುವ ವೇತನ ಹೆಚ್ಚಳದ ಬಗ್ಗೆ ಈವರೆಗೂ ಸಿಎಂ ಸಿದ್ದರಾಮಯ್ಯ ಅವರ ಅಧ್ಯಕ್ಷತೆಯಲ್ಲಿ ನಾಲ್ಕು ಸಭೆಗಳು ನಡೆದಿವೆ. ಆದರೂ ನೌಕರರಿಗೆ ಕೊಡಬೇಕಿರುವುದನ್ನು ಕೊಡುವುದಕ್ಕೆ ವಿಳಂಬ ಮಾಡುತ್ತಿದ್ದಾರೆ ಸಿಎಂ.

ಇನ್ನು ಕಾಂಗ್ರೆಸ್‌ ಪಕ್ಷ ಕೂಡ ಈ ಹಿಂದೆ ಸಾರಿಗೆ ನೌಕರರಿಗೆ 4 ವರ್ಷಕ್ಕೊಮ್ಮೆ ಮಾಡುತ್ತಿದ್ದ ವೇತನ ಹೆಚ್ಚಳವನ್ನು ಕೂಡಲೇ ಮಾಡಿಲ್ಲ. ಒಂದೇರಡು ವರ್ಷ ಕಳೆದ ಮೇಲೆಯೇ ಹೆಚ್ಚಳ ಮಾಡಿರುವುದು ಕಣ್ಣಮುಂದೆಯೇ ಇದೆ. ಇದನ್ನು ಮರೆತು ಈ ರೀತಿ ಹಿಂದಿನ ಬಿಜೆಪಿ ಸರ್ಕಾರ 2020 ಜನವರಿ 1ರಿಂದ ವೇತನ ಹೆಚ್ಚಳ ಮಾಡಿರುವುದಾಗಿ ಹೇಳಿಲ್ಲ ಎಂದು ವಾದಿಸಿ ನೌಕರರ ಹೊಟ್ಟೆ ಮೇಲೆ ಹೊಡೆಯುತ್ತಿರುವುದು ಸರಿಯಲ್ಲ.

2020 ಜನವರಿ 1ರಿಂದ ಶೇ.15ರಷ್ಟು ವೇತನ ಹೆಚ್ಚಳ ಮಾಡಿರುವುದಕ್ಕೆ ಅಂದಿನ ಬಿಜೆಪಿ ಸರ್ಕಾರ 31-12-2019ರಲ್ಲಿ ಇದ್ದ ಮೂಲ ವೇತನಕ್ಕೆ 2023 ಮಾರ್ಚ್‌ನಲ್ಲಿ ವೇತನ ಹೆಚ್ಚಳ ಘೊಷಣೆ ಮಾಡಿರುವುದೇ ಉತ್ತರವಾಗಿದೆ. ಇದು 2020ರ ಜನವರಿ 1ರಿಂದ ಅನ್ವಯವಾಗುತ್ತದೆ ಎಂಬುವುದೆ ಆಗಿದೆ. ಅದನ್ನು ಬಿಟ್ಟು ಈ ರೀತಿ ನೌಕರರಿಗೆ ಅನ್ಯಾಯ ಮಾಡುತ್ತಿರುವುದು ಸರಿಯಲ್ಲ.

ಇನ್ನು ಸಿಎಂ ಅಧ್ಯಕ್ಷತೆಯಲ್ಲಿ ನಾಲ್ಕು ಸಭೆಗಳು ನಡೆದರೂ ಕೂಡ ಸಾರಿಗೆ ನೌಕರರ ಸಂಘಟನೆಗಳ ಮುಖಂಡರು ಆ ಸಭೆಗಳಿಗೆ ಹೋಗಿ ಬರಿಗೈಯಲ್ಲಿ ವಾಪಸ್‌ ಆಗಿರುವುದು  ಮನಸ್ಸಿಗೆ ಭಾರಿ ನೋವಾಗುತ್ತಿದೆ. ನಾವು ಇನ್ನು ಎಷ್ಟು ದಿನ ಹೀಗೆ ಇರಬೇಕು ಎಂಬ ಹತಾಶೆಗೆ ನೌಕರರು ಒಳಗಾಗುತ್ತಿದ್ದಾರೆ.

ಹೀಗಾಗಿ ಇನ್ನಾದರೂ ಸಾರಿಗೆ ಸಂಘಟನೆಗಳ ಮುಖಂಡರು ದೃಢನಿರ್ಧಾರ ತೆಗೆದುಕೊಳ್ಳಬೇಕು. ಇಲ್ಲ ನಾವು ನೌಕರರಿಗೆ ಸರ್ಕಾರದಿಂದ ಸೌಲಭ್ಯ ಕೊಡಿಸಲು ಸಾಧ್ಯವಾಗುತ್ತಿಲ್ಲ ಎಂದು ಹೇಳಿ ಹೊರಬರಬೇಕು.

ಇನ್ನು ಸಾರಿಗೆ ಅಧಿಕಾರಿಗಳು ಮತ್ತು ನೌಕರರು ಒಟ್ಟಾಗಿ ಸರ್ಕಾರದ ಮುಂದೆ ಹೋಗದ ಹೊರತು ಇದಕ್ಕೆ ಶಾಶ್ವತ ಪರಿಹಾರ ಸಿಗುವುದಿಲ್ಲ. ಇದು ಒಂದು ತಾರ್ಕಿಕ ಅಂತ್ಯ ಕಾಣಬೇಕು ಎಂಬುವುದು ಅಧಿಕಾರಿಗಳಲ್ಲಿ ಇದ್ದರೆ ತಾವು ನೌಕರರನ್ನು ಒಂದೇಕಡೆ ಸೇರಿಸಿ ಸರ್ಕಾರದ ಮುಂದೆ ಹೋಗಿ ಇಲ್ಲದಿದ್ದರೆ ಈ ಅನ್ಯಾಯ ಮುಂದುರಿಯುತ್ತಲೇ ಇರುತ್ತದೆ. ಇದರಿಂದ ನಿಮಗೂ ಲಕ್ಷಾಂತರ ರೂಪಾಯಿ ನಷ್ಟವಾಗುತ್ತದೆ.

ಭಯದಿಂದ ಮೂಲೆಯಲ್ಲಿ ಕುಳಿತುಕೊಂಡರೆ ಆ ಮೂಲೆಯೇ ನಿಮಗೆ ಇನ್ನಷ್ಟು ಭಯವನ್ನು ಉಂಟು ಮಾಡುತ್ತದೆ. ಆ ಮೂಲೆ ಬಿಟ್ಟು ಧೈರ್ಯವಾಗಿ ಹೊರಬರುವ ಜತೆಗೆ ಮುಂದೆ ಬಂದರೆ KEB ಅಧಿಕಾರಿಗಳು ಹಾಗೂ ನೌಕರರು ಪಡೆಯುತ್ತಿರುವಂತೆ ವೇತನ ಪಡೆಯುವುದಕ್ಕೆ ಸಾಧ್ಯವಾಗುತ್ತದೆ ಇಲ್ಲ ಇದೇ ಪರಿಸ್ಥಿತಿಯಲ್ಲಿ ಇರಬೇಕಾಗುತ್ತದೆ. ಈಗಲಾದರೂ ನಿಮ್ಮ ಕಾನೂನಾತ್ಮಕ ಹಕ್ಕನು ಪಡೆಯಲು ಮುಂದಾಗಬೇಕಿದೆ.