KSRTC ಬಸ್‌ ನಿಲ್ಲಿಸಿ ಮುಷ್ಕರ ಮಾಡುದಕ್ಕೆ ನಮ್ಮ ಬೆಂಬಲ ಇಲ್ಲ: ಅಧಿಕಾರಿಗಳು- ಆಡಳಿತ ಸಿಬ್ಬಂದಿ ಸಂಘಟನೆಗಳ ಸ್ಪಷ್ಟನೆ

ಬೆಂಗಳೂರು: ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆಯ ನಾಲ್ಕೂ ನಿಗಮಗಳ ಅಧಿಕಾರಿಗಳು/ನೌಕರರಿಗೆ 2024 ಜನವರಿ 1ರಿಂದ ಜಾರಿಗೆ ಬರುವಂತೆ ವೇತನ ಹೆಚ್ಚಳವಾಗಬೇಕಿದ್ದು, 14 ತಿಂಗಳುಗಳು ಕಳೆದರೂ ಕೂಡ ಈವರೆಗೂ ಸರ್ಕಾರ ಯಾವುದೇ ರೀತಿಯ ತೀರ್ಮಾನ ತೆಗೆದುಕೊಂಡಿಲ್ಲ. ಜತೆಗೆ 2020ರ 38 ತಿಂಗಳ ವೇತನ ಹೆಚ್ಚಳದ ಹಿಂಬಾಕಿ ಕೊಡಬೇಕು.

ಈ ಹಿನ್ನೆಲೆಯಲ್ಲಿ ಸಾರಿಗೆ ನೌಕರರ ಒಕ್ಕೂಟ ಮಾ.25ರ ಬಳಿಕ ಮುಷ್ಕರ ಮಾಡುವುದಾಗಿ ಮೊನ್ನೆ ನಡೆದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದೆ. ಆದರೆ, ಅಧಿಕಾರಿಗಳ ವರ್ಗ ಬರದಿದ್ದರೆ ನಾವು ಮುಷ್ಕರ ಮಾಡುವುದಕ್ಕೆ ಮುಂದಾಗುವುದಿಲ್ಲ ಎಂದು ಬಹುತೇಕ ನಾಲ್ಕೂ ನಿಗಮಗಳ ಎಲ್ಲ ನೌಕರರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಈ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಸೇರಿದಂತೆ ಇತರೆ ಆಡಳಿತ ಸಿಬ್ಬಂದಿ ವರ್ಗದ ಸಂಘಟನೆಗಳ ಪದಾಧಿಕಾರಿಗಳನ್ನು ಈ ಬಗ್ಗೆ ವಿಜಯಪಥ ಸ್ಪಷ್ಟನೆ ಕೇಳಿದಾಗ ಅದಕ್ಕೆ ಅಧಿಕಾರಿಗಳು ಹಾಗೂ ಇತರೆ ಆಡಳಿತ ಸಂಘಟನೆಗಳ ಮುಖಂಡರು ನಾವು ಯಾವುದೇ ಕಾರಣಕ್ಕೂ ಬಸ್‌ ನಿಲ್ಲಿಸಿ ಸಾರ್ವಜನಿಕರಿಗೆ ತೊಂದರೆ ಕೊಡುವ ಮುಷ್ಕರವನ್ನು ಬೆಂಬಲಿಸುವುದಿಲ್ಲ ಎಂದು ಹೇಳಿದ್ದಾರೆ.

ಇನ್ನು ನೀವು ಮುಷ್ಕರಕ್ಕೆ ಬೆಂಬಲ ಕೊಡದಿದ್ದರೆ ಟ್ರೇಡ್‌ ಯೂನಿಯನ್‌ಗಳು (ಜಂಟಿಕ್ರೀಯಾ ಸಮಿತಿ. ಸಾರಿಗೆ ನೌಕರರ ಒಕ್ಕೂಟಗಳು) ಕರೆ ಕೊಡುವ ಮುಷ್ಕರದಲ್ಲಿ ನೌಕರರು ಭಾಗಿಯಾದರೆ ಆ ವೇಳೆ ಅವರನ್ನು ವಜಾ, ಅಮಾನತು, ವರ್ಗಾವಣೆ ಹಾಗೂ ಪೊಲೀಸ್‌ ಕೇಸ್‌ ಮಾಡುವುದಿಲ್ಲ ಎಂದು ಪ್ರಶ್ನಿಸಿದ್ದಕ್ಕೆ, ಇದು ನಾವು ಮಾಡುವುದಲ್ಲ ಸರ್ಕಾರದ ನಿರ್ದೇಶನ ಅಥವಾ ಆದೇಶವನ್ನು ನಾವು ಪಾಲಿಸಬೇಕಾಗುತ್ತದೆ ಎಂದು ತಿಳಿಸಿದ್ದಾರೆ.

ಅಲ್ಲದೆ, ಶಾಂತಿಯುತ ಧರಣಿಗೆ ನಾವು ಬಾಹ್ಯಬೆಂಬಲ ನೀಡತ್ತೇವೆ. ಬಸ್‌ ನಿಲ್ಲಿಸಿ ಮುಷ್ಕರ ಮಾಡುವುದಕ್ಕೆ ಯಾವುದೇ ಕಾರಣಕ್ಕೂ ನಾವು ಸಪೋರ್ಟ್‌ ಮಾಡುವುದಿಲ್ಲ ಎಂದು ಸ್ಪಷ್ಟವಾಗಿ ಅಧಿಕಾರಿಗಳು ಹಾಗೂ ಇತರೆ ಸಂಘಟನೆಗಳ ಪದಾಧಿಕಾರಿಗಳು ತಿಳಿಸಿದ್ದಾರೆ.

ಇನ್ನು ಇತ್ತ ಅಧಿಕಾರಿಗಳು ನಿಮ್ಮ ಮುಷ್ಕರವನ್ನು ಬೆಂಬಲಿಸುವುದಕ್ಕೆ ಮುಂದಾಗುತ್ತಿಲ್ಲ ಅಂದಮೇಲೆ ನೀವು ಮುಷ್ಕರ ಮಾಡುವ ವೇಳೆ ಬೆಂಬಲಿಸುವ ನೌಕರರನ್ನು ಅಮಾನತು, ವಜಾ ಮಾಡಿದರೆ ಅದರ ಹೊಣೆಯನ್ನು ನೀವು ಹೊರಲು ಸಿದ್ದರಿದ್ದೀರಾ ಎಂದು ಟ್ರೇಡ್‌ ಯೂನಿಯನ್‌ಗಳ ಮುಖಂಡರನ್ನು ಪ್ರಶ್ನಿಸಿದ್ದಕ್ಕೆ ಆ ಮುಖಂಡರು ಮೌನಕ್ಕೆ ಶರಣಾದರು.

ಈ ಎಲ್ಲವನ್ನು ಗಮನಿಸಿದರೆ ಇಲ್ಲಿ ಅಧಿಕಾರಿಗಳು ಬಸ್‌ ನಿಲ್ಲಿಸಿ ಮುಷ್ಕರ ಮಾಡುವ ನೌಕರರ ವಿರುದ್ಧ ಸರ್ಕಾರದ ನಿರ್ದೇಶನದಂತೆ ಕ್ರಮ ತೆಗೆದುಕೊಳ್ಳುತ್ತಾರೆ. ಆ ಬಳಿಕ ಮುಂದಿನ ಸಾಲಿನಲ್ಲಿ ಗುರುತಿಸಿಕೊಳ್ಳುವ ನೌಕರರು ಹಲವಾರು ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ಅಲ್ಲದೆ ಅಧಿಕಾರಿಗಳಿಗೆ ವೈಯಕ್ತಿವಾಗಿ ಆಗದ ಕೆಲ ನೌಕರರು ಕೂಡ ಇಲ್ಲಿ ಬಲಿಪಶುಗಳಾಗುತ್ತಾರೆ.

ಹೀಗಾಗಿ ಟ್ರೇಡ್‌ ಯೂನಿಯನ್‌ಗಳು ಕರೆ ನೀಡುವ ಮುಷ್ಕರದ ವೇಳೆ ನೌಕರರು ಅಮಾನತು, ವಜಾ, ವರ್ಗಾವಣೆ ಮತ್ತು ಪೊಲೀಸ್‌ ಕೇಸ್‌ ಆದರೆ ಅದರ ಹೊಣೆಯನ್ನು ನೌಕರನೇ ಹೊತ್ತುಕೊಳ್ಳಬೇಕು. ಅಂದರೆ ಯಾವುದೇ ಟ್ರೇಡ್‌ ಯೂನಿಯನ್‌ಗಳು ನಿಮ್ಮ ಪರ ಕಾನೂನು ಹೋರಾಟ ಮಾಡುವುದಕ್ಕೆ ಸಿದ್ಧರಿರುವುದಿಲ್ಲ.

ಇನ್ನು ವಜಾ, ವರ್ಗಾವಣೆ, ಅಮಾನತು ಮತ್ತು ಪೊಲೀಸ್‌ ಕೇಸ್‌ ಆದ ನೌಕರರು ಇದೇ ಯೂನಿಯನ್‌ಗಳ ಮುಖಂಡರಿಗೆ ಅವರು ನಿಗದಿ ಪಡಿಸಿದಷ್ಟು ಹಣವನ್ನು ಕೊಟ್ಟು ಅವರ ಮೂಲಕ ವಕೀಲರನ್ನು ನೇಮಕ ಮಾಡಿಕೊಂಡು ಕಾನೂನು ಹೋರಾಟ ಮಾಡಬೇಕು. ಇದೆಲ್ಲವನ್ನು ಗಮನಿಸಿದರೆ ಈ ಯೂನಿಯನ್‌ಗಳು ಕರೆ ಕೊಡುವ ಹೋರಾಟ ಒಂದು ರೀತಿಯಲ್ಲಿ ಅಧಿಕಾರಿಗಳಿಗೆ ಲಾಭ ನೌಕರರಿಗೆ ಸಂಚಕಾರ ಎಂಬಂತೆ ಇದೆ.

ಹೀಗಾಗಿ ಪ್ರತಿಯೊಬ್ಬ ನೌಕರರು ಯೋಚಿಸಿ, ನಾವು ಟ್ರೇಡ್‌ ಯೂನಿಯನ್‌ಗಳು ಈ ಮೊದಲೇ ಹೇಳಿದಂತ ಜಂಟಿ ಕ್ರಿಯಾ ಸಮಿತಿ ಹಾಗೂ ಸಾರಿಗೆ ನೌಕರರ ಒಕ್ಕೂಟ ಕರೆ ಕೊಡುವ ಮುಷ್ಕರಕ್ಕೆ ನಾವು ಹೋಗಬೇಕಾ ಬೇಡವೆ ಎಂದು. ಕಾರಣ ಇಲ್ಲಿ ಅಧಿಕಾರಿಗಳು ಸರ್ಕಾರದ ನಿರ್ದೇಶನವನ್ನು ಪಾಲನೆ ಮಾಡುತ್ತಿದ್ದೇವೆ ಎಂದು ನಿಮ್ಮ ವಿರುದ್ಧ ಕ್ರಮಕ್ಕೆ ಮುಂದಾಗುತ್ತಾರೆ ಇದು ಕಟು ಸತ್ಯ.

ಅದನ್ನು ಎದರಿಸಲು ಅಧಿಕಾರಿಗಳು ಅಥವಾ ಸರ್ಕಾರದ ವಿರುದ್ಧ ಯೂನಿಯನ್‌ಗಳು ಮತ್ತೆ ಹೋರಾಟ ಮಾಡುವುದಿಲ್ಲ. ಬದಲಿಗೆ ನಾವು ಹೋರಾಟ ಮಾಡಿದ್ದರಿಂದ ನೌಕರರಿಗೆ ಇಷ್ಟು ಪರ್ಸೆಂಟ್‌ ವೇತನ ಹೆಚ್ಚಾಯಿತು ಎಂದು ಹೇಳಿ ಹೊರಟು ಹೋಗುತ್ತವೆ. ಇದರಿಂದ ಮುಷ್ಕರದ ವೇಳೆ ಆದ ವಜಾ, ಅಮಾನತು, ವರ್ಗಾವಣೆ ಹಾಗೂ ಪೊಲೀಸ್‌ ಪ್ರಕರಣಗಳನ್ನು ಮೈಮೇಲೆ ಎದುಕೊಳ್ಳುವ ನೌಕರರು ಇತ್ತ ಡ್ಯೂಟಿಯೂ ಇಲ್ಲದೆ ವೇತನವೂ ಇಲ್ಲದೆ ಸಂಸಾರವನ್ನು ಬೀದಿಗೆ ತಂದು ನಿಂತುಕೊಳ್ಳಬೇಕಾ? ಯೋಚಿಸಿ ನಿರ್ಧರಿಸಿ ಇದು ನೌಕರರಿಗೆ ಬಿಟ್ಟ ವಿಚಾರ.