ನ್ಯೂಡೆಲ್ಲಿ: ಇಂದಿನಿಂದ ಇನ್ನು ಮುಂದೆ ನೀವು ಶನಿವಾರ, ಭಾನುವಾರ ಮತ್ತು ಇತರ ರಜಾದಿನವಾದ್ದರಿಂದ ವೇತನ ಸೋಮವಾರ ಆಗುತ್ತದೆ ಎನ್ನುವ ಚಿಂತೆ ಇಲ್ಲ.
ಹೌದು! ನಿಮ್ಮ ವೇತನ, ಪಿಂಚಣಿ, ಇಎಂಐ ಪಾವತಿಗೆ ಬ್ಯಾಂಕ್‌ ರಜಾ ದಿನಗಳು ಆಗಸ್ಟ್‌ 1ರಿಂದ ಅಡ್ಡಿಯಾಗುತ್ತಿಲ್ಲ. ಆ ರೀತಿ ನ್ಯಾಷನಲ್‌ ಆಟೋಮೇಟೆಡ್‌ ಕ್ಲಿಯರಿಂಗ್‌ ಹೌಸ್‌ನ ಸೇವೆ ವಾರದ ಎಲ್ಲ ದಿನಗಳಲ್ಲೂ, ದಿನದ 24 ಗಂಟೆಯೂ ದೊರೆಯಲಿದೆ.
ಕ್ಲಿಯರಿಂಗ್‌ ಹೌಸ್‌ನ ಸೇವೆ ಇದುವರೆಗೆ ಸೋಮವಾರದಿಂದ ಶುಕ್ರವಾರದ ವರೆಗೆ ಮಾತ್ರ ಲಭ್ಯವಾಗುತ್ತಿತ್ತು. ಇಂದಿನಿಂದ ವಾರದ ಎಲ್ಲ ದಿನವೂ ಸೇವೆ ಲಭ್ಯವಾಗಲಿದೆ. ಈ ಬದಲಾವಣೆ ಬಗ್ಗೆ ಆರ್‌ಬಿಐ ಇತ್ತೀಚೆಗೆ ಸೂಚಿಸಿದ್ದು, ಜಾರಿಯಾಗಿದೆ.
ಹೀಗಾಗಿ ವೇತನ, ಇಎಂಐ, ಬಿಲ್‌ ಪಾವತಿ, ವಿಮೆ ಪ್ರೀಮಿಯಂ ಪಾವತಿ, ಪಿಂಚಣಿ ವರ್ಗಾವಣೆಗಳನ್ನು ವಾರಾಂತ್ಯದ ದಿನಗಳಲ್ಲೂ ಮಾಡಬಹುದು. ಇಲ್ಲಿಯವರೆಗೆ ಬ್ಯಾಂಕ್‌ ರಜಾ ದಿನಗಳಲ್ಲಿ ಇಂಥ ಹಣಕಾಸು ವರ್ಗಾವಣೆಗಳು ನಡೆಯದೆ ವಿಳಂಬವಾಗುತ್ತಿತ್ತು.
ನ್ಯಾಷನಲ್‌ ಪೇಮೆಂಟ್ಸ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾ (ಎನ್‌ಪಿಸಿಐ) ಸಂಸ್ಥೆಯು ನ್ಯಾಷನಲ್‌ ಆಟೋಮೇಟೆಡ್‌ ಕ್ಲಿಯರಿಂಗ್‌ ಹೌಸ್‌ (ಎನ್‌ಎಸಿಎಚ್‌) ಅನ್ನು ನಿರ್ವಹಿಸುತ್ತಿದೆ.
ಬ್ಯಾಂಕ್‌, ಹಣಕಾಸು ಸಂಸ್ಥೆಗಳು, ಕಾರ್ಪೊರೇಟ್‌ ಕಂಪನಿಗಳು, ಸರ್ಕಾರಗಳು ಇದರ ವೆಬ್‌ ಆಧಾರಿತ ಸಲ್ಯೂಷನ್‌ ಸೇವೆಯನ್ನು ಪಡೆಯುತ್ತವೆ. ದೊಡ್ಡ ಮೊತ್ತದ ಆನ್‌ಲೈನ್‌ ಹಣಕಾಸು ವರ್ಗಾವಣೆಗಳಿಗೆ ಇದು ಸುಲಭ.
ಸಬ್ಸಿಡಿ, ಡಿವಿಡೆಂಡ್‌, ಬಡ್ಡಿ ದರ, ವೇತನ, ಪಿಂಚಣಿ ಪಾವತಿಗೆ, ಟೆಲಿಫೋನ್‌, ವಿದ್ಯುತ್‌, ನೀರು, ಸಾಲದ ಇಎಂಐ, ವಿಮೆ, ಮ್ಯೂಚುವಲ್‌ ಫಂಡ್‌ ಪಾವತಿಗೆ ಇದು ಸಹಕಾರಿ. ರಜಾ ದಿನಗಳಲ್ಲಿಯೂ ಇವುಗಳ ವರ್ಗಾವಣೆಗೆ ಯಾವುದೇ ಅಡ್ಡಿ ಉಂಟಾಗುವುದಿಲ್ಲ ಎಂದು ಆರ್‌ಬಿಐ ತಿಳಿಸಿದೆ.
