ಮಳವಳ್ಳಿ: ಬ್ರಿಟಿಷರಿಂದ ಹಿಡಿದು ಬಂಡವಾಳಶಾಹಿವರೆಗೂ ಬಿಜೆಪಿಯದು ಬ್ರೋಕರ್ ಸಂಸ್ಕೃತಿನೆ. ರೈತರ ಪರ ದೇಶಪ್ರೇಮಿ ಹೋರಾಟದ ಬಗ್ಗೆ ಮಾತನಾಡಲು ಶೋಭಾ ಕರಂದ್ಲಾಜೆಗೆ ಯಾವ ಯೋಗ್ಯತೆಯು ಇಲ್ಲವೆಂದು ಕರ್ನಾಟಕ ಪ್ರಾಂತ ರೈತ ಸಂಘ ಕಿಡಿಕಾರಿದೆ.
ರೈತರ ಬಗ್ಗೆ ಲಘುವಾಗಿ ಮಾತನಾಡಿರುವ ಶೋಭ ಕರಾಂದ್ಲಾಜೆ ರಾಜಿನಾಮೆ ನೀಡಬೇಕೆಂದು ಮಳವಳ್ಳಿಯಲ್ಲಿ ಪ್ರಾಂತ ರೈತ ಸಂಘ ಡಿವೈಎಫ್‌ಐ ಸಂಘಟನೆಗಳು ಹಮ್ಮಕೊಂಡಿದ್ದ ಪ್ರತಿಭಟನೆಯಲ್ಲಿ ಮಾತನಾಡಿದ ರೈತ ಸಂಘದ ಅಧ್ಯಕ್ಷ ಎನ್.ಎಲ್. ಭರತ್ ರಾಜ್, ಇವರಿಗೆ ರೈತ ಕಾರ್ಮಿಕ ಮಹಿಳೆಯರು ಹಾಗೂ ದೇಶಪ್ರೇಮಿ ಹೋರಾಟ ನಡೆಸಿದ ಹಿನ್ನೆಲೆಯಿಲ್ಲದ ಶೋಭಾ ಕರಂದ್ಲಾಜೆಗೆ ರೈತ ಚಳವಳಿಯ ಬಗ್ಗೆ ಮಾತನಾಡಲು ಯಾವ ಯೋಗ್ಯತೆ ಇದೆ ಎಂದು ಪ್ರಶ್ನಿಸಿದರು.
ಒಕ್ಕೂಟ ಸರ್ಕಾರ ಲೂಟಿಕೋರ ಕಾರ್ಪೊರೇಟ್ ಕಂಪನಿಗಳ ಪರವಾದ ರೈತ ಕಾರ್ಮಿಕ ವಿರೋಧಿ, ಕೃಷಿ ಕಾಯ್ದೆ, ಎಪಿಎಂಸಿ ಕಾಯ್ದೆ , ವಿದ್ಯುತ್ ಕಾಯ್ದೆ, ಅಗತ್ಯ ವಸ್ತುಗಳ ಕಾಯ್ದೆಗೆ ತಿದ್ದುಪಡಿ ತಂದು ರೈತರಿಗೆ ಮರಣಶಾಸನ ಬರೆದಿದೆ. ರೈತರ ಉತ್ಪನ್ನಗಳಿಗೆ ಕನಿಷ್ಠ ಬೆಂಬಲ ಬೆಲೆ ನೀಡದ ಸರ್ಕಾರವಿದು ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಇನ್ನು ಕಾರ್ಮಿಕ ವಿರೋಧಿ ನೀತಿಗಳ ವಿರುದ್ಧ ದೆಹಲಿಯಲ್ಲಿ 9 ತಿಂಗಳಿಂದ ಹೋರಾಟ ನಡೆಸುತ್ತಿರುವ ಸ್ವಾತಂತ್ರ್ಯ ನಂತರದ ಐತಿಹಾಸಿಕ ಚಳವಳಿಯನ್ನು ಅಪಮಾನ ಮಾಡಿರುವ ಕರಾಂದ್ಲಾಜೆ ಈ ನಾಡಿನ ಮಂತ್ರಿಯಾಗಲು ಜನಪ್ರತಿನಿಧಿಯಾಗಲು ಯೋಗ್ಯತೆಯಿಲ್ಲ. ಹಾಗಾಗಿ ರಾಜೀನಾಮೆ ನೀಡಿ ರೈತರನ್ನು ಅಪಮಾನ ಮಾಡಿರುವುದರಿಂದ ಕ್ಷಮೆಯಾಚಿಸಬೇಕೆಂದು ಒತ್ತಾಯಿಸಿದರು.
ನರೇಂದ್ರ ಮೋದಿ ಚುನಾವಣೆಗೆ ಮುನ್ನ ನೀಡಿದ್ದ ಭರವಸೆಗಳಲ್ಲಿ ರೈತರ ಆದಾಯ ದ್ವೀಗುಣಗೊಳಿಸುವುದು ಡಾ. ಸ್ವಾಮಿನಾಥನ್ ವರದಿ ಆಧಾರದ ಮೇಲೆ ಕೃಷಿ ಉತ್ಪನ್ನಗಳಿಗೆ ಬೆಂಬಲ ಬೆಲೆ ಖಾತ್ರಿ ಮಾಡುವುದು. ವರ್ಷಕ್ಕೆ 2 ಕೋಟಿ ಉದ್ಯೋಗ ಸೃಷ್ಟಿಸುವುದು, ಕಪ್ಪು ಹಣ ತಂದು ತಲಾ ಕುಟುಂಬಕ್ಕೆ 15 ಲಕ್ಷ ಹಣ ಹಾಕುತ್ತೇನೆ ಎಂದು ಹೇಳಿ ಅಧಿಕಾರಕ್ಕೆ ಬಂದು ದೇಶದ ಜನತೆಗೆ ವಂಚನೆ ಮಾಡಿದ್ದಾರೆ.
ಈಗ ಕಾರ್ಪೊರೇಟ್ ಕುಳಗಳಾದ ಗೌತಮ್ ಅದಾನಿ, ಅನಿಲ್ ಅಂಬಾನಿ, ಕಿಸಾನ್ ದಮಾನಿ ಇಂಥವರಿಗೆ ಬ್ರೋಕರ್ ಆಗಿ ಸಾರ್ವಜನಿಕ ಕಂಪನಿಗಳನ್ನು ಕವಡೆ ಕಾಸಿಗೆ ಮಾರಾಟ ಮಾಡಿ ನಿರುದ್ಯೋಗ, ಬಡತನ, ಹಸಿವು, ಆತ್ಮಹತ್ಯೆ ಮಾಡಿಕೊಳ್ಳುವ ದಾರಿಯನು ಬಿಜೆಪಿಯ ನರೇಂದ್ರ ಮೋದಿ ಸರ್ಕಾರ ತೋರಿಸುತ್ತಿದೆ ಎಂದು ಆರೋಪಿಸಿದರು.
ಕರ್ನಾಟಕ ಪ್ರಾಂತ ರೈತ ಸಂಘದ ಕಾರ್ಯದರ್ಶಿ ಎನ್ ಲಿಂಗರಾಜಮೂರ್ತಿ, ಆನಂದ್, ಲಿಂಗರಾಜ್ ಆನಂದಸ್ವಾಮಿ ಡಿ ಕೆ ಹಳ್ಳಿ, ಶಿವಪ್ಪ, ಡಿವೈಎಫ್ ಐನ ಗುರುಸ್ವಾಮಿ, ಶಿವಕುಮಾರ್, ಮರಿಗೌಡ, ಚನ್ನಬಸಪ್ಪ. ಮಯೂರ, ಡಿಎಸ್ಎಸ್ ನ ಮಹೇಶ್, ಯತೀಶ್, ಜಯರಾಜ್, ಪ್ರಸಾದ್, ಡಿಎಚ್ಎಸ್ ನ ಶಂಕರ್, ಮಲ್ಲಿಕಾರ್ಜುನ ಮತ್ತಿತರರು ಇದ್ದರು.
