ಬೆಂಗಳೂರು: ಮುಷ್ಕರದ ವೇಳೆ ವಜಾಗೊಂಡಿದ್ದ ಬಿಎಂಟಿಸಿಯ 6ನೇ ಘಟಕದ ನೌಕರನೊಬ್ಬ ಘಟಕದಲೇ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿರುವ ಘಟನೆ ಗುರುವಾರ (ಇಂದು) ಬೆಳಗ್ಗೆ 10ಗಂಟೆ ಸುಮಾರಿನಲ್ಲಿ ನಡೆದಿದೆ.
ಬಿಎಂಟಿಸಿ 6ನೇ ಘಟಕದ ಚಾಲಕ ಕೇಶವ ಎಂಬುವರೆ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿರುವವರು.
ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಕಳೆದ ಏಪ್ರಿಲ್‌ನಲ್ಲಿ ಮುಷ್ಕರ ನಡೆಸುತ್ತಿದ್ದ ವೇಳೆ ನೌಕರರ ಮೇಲೆ ಯಾವುದೇ ಕಾರಣ ನೀಡದೆ ಅಮಾನುಷವಾಗಿ ನಡೆದುಕೊಂಡಿರುವ ಸಾರಿಗೆ ಆಡಳಿತ ವರ್ಗ ಏಕಾಏಕಿ ವಜಾ, ಅಮಾನತು, ವರ್ಗಾವಣೆ ಸೇರಿದಂತೆ ಪೊಲೀಸ್‌ ಪ್ರಕರಣಗಳನ್ನು ದಾಖಲಿಸಿ ಇನ್ನಿಲ್ಲ ಕಿರುಕುಳವನ್ನು ನೀಡುತ್ತಿದೆ.
ಇದರಿಂದ ಮನನೊಂದ ಅದೆಷ್ಟೋ ನೌಕರರು ಈಗಾಗಲೇ ಜೀವವನ್ನು ಕಳೆದುಕೊಂಡಿದ್ದಾರೆ. ಆದರೂ ಅಧಿಕಾರಿಗಳಿಗೆ ನೌಕರರ ಮೇಲೆ ಕಿಂಚಿತ್ತು ಕಾಳಜಿ ಇಲ್ಲದಂತಾಗಿದೆ.
ಹೀಗಾಗಿ ಇಂದು ಕೂಡ ಚಾಲಕ ಕೇಶವ ಅಧಿಕಾರಿಗಳ ಕಿರುಕುಳ ನಡೆಯಿಂದ ಮನನೊಂದು ಆತ್ಮಹತ್ಯೆಗೆ ಯತ್ನಿಸಿದ್ದು ಸದ್ಯ ಬೆಂಗಳೂರಿನ ಬೌರಿಂಗ್‌ ಆಸ್ಪತ್ರೆಯ ತೀವ್ರನಿಗಾ ಘಟಕದಲ್ಲಿ ಚಿಕಿತ್ಸೆಗೆ ದಾಖಲಿಸಾಲಗಿದೆ.
