ಹೆಂಡತಿಗೆ ಅನೈತಿಕ ಸಂಬಂಧವಿದೆ ಎಂಬ ಸಂಶಯ – ಕೊಡಲಿಯಿಂದ ಕಡಿದು ಪೊಲೀಸರಿಗೆ ಶರಣಾದ ಪತಿ

ರಾಯಚೂರು: ಹೆಂಡತಿ ಪರಪುರಷರ ಜತೆ ಇರುತ್ತಾಳೆ ಎಂದು ಸದಾ ಸಂಶಯ ಪಡುತ್ತಿದ್ದ ದುರುಳನೊಬ್ಬ ಆಕೆಯನ್ನು ಕೊಡಲಿಯಿಂದ ಕೊಚ್ಚಿ ಹತ್ಯೆ ಮಾಡಿ ಬಳಿಕ ತನ್ನ ಮಕ್ಕಳೊಂದಿಗೆ ಪೊಲೀಸ್‌ ಠಾಣೆಗೆ ಹೋಗಿದ್ದಾನೆ.

ರಾಯಚೂರು ಜಿಲ್ಲೆಯ ಲಿಂಗಸುಗೂರು ತಾಲೂಕಿನ ಗುಡದನಾಳ ಗ್ರಾಮದಲ್ಲಿ ಈ ಘಟನೆ ನಡೆದಿದೆ. ಬೆಟ್ಟಪ್ಪ ಎಂಬಾತ ತನ್ನ ಪತ್ನಿ ರೇಣುಕಾ (26)ಳನ್ನು ಕೊಡಲಿಯಿಂದ ಕಡಿದ ಆರೋಪಿ.

ಬೆಟ್ಟಪ್ಪ ಮತ್ತು ರೇಣುಕಾಳ ಮದುವೆ ಏಳು ವರ್ಷದ ಹಿಂದೆ ಆಗಿತ್ತು. ಆದರೆ ಬೆಟ್ಟಪ್ಪ ಆರಂಭದಿಂದಲೂ ಸಂಶಯ ಪಿಶಾಚಿ. ರೇಣುಕಾಳಿಗೆ ಅನೈತಿಕ ಸಂಬಂಧವಿದೆ ಎಂದು ಆರೋಪ ಮಾಡುತ್ತಿದ್ದ. ಮನೆಯಲ್ಲಿ ಗಂಡ-ಹೆಂಡತಿ ಮಧ್ಯೆ ಈ ವಿಷಯಕ್ಕೆ ನಿತ್ಯ ಜಗಳ ನಡೆಯುತ್ತಲೇ ಇತ್ತು.

ಅಲ್ಲದೆ ರೇಣುಕಾಗೆ ಅನೈತಿಕ ಸಂಬಂಧವಿದೆ ಎಂದು ಬೆಟ್ಟಪ್ಪ ರೇಣುಕಾಳ ತಾಯಿಗೂ ದೂರು ನೀಡಿದ್ದ. ಇನ್ನು ಮಂಗಳವಾರ ತಡರಾತ್ರಿಯೂ ಇದೇ ವಿಚಾರದಲ್ಲಿ ಇಬ್ಬರ ನಡುವೆ ಜಗಳ ಆಗಿದೆ. ಜಗಳದಿಂದ ಸಿಟ್ಟಿಗೆದ್ದ ರೇಣುಕಾ ತಾನು ಮನೆ ಬಿಟ್ಟು ತವರಿಗೆ ಹೋಗುವುದಾಗಿ ಹೇಳಿದ್ದಳು. ಇದರಿಂದ ಸಿಟ್ಟಿಗೆದ್ದ ಬೆಟ್ಟಪ್ಪ ಮನೆಯಲ್ಲಿದ್ದ ಕೊಡಲಿಯಿಂದ ರೇಣುಕಾಳ ಮೇಲೆ ಹಲ್ಲೆ ಮಾಡಿದ್ದಾನೆ.

ನಾಲ್ಕು ಬಾರಿ ಕೊಡಲಿಯಿಂದ ಹೊಡೆದ ಬೆಟ್ಟಪ್ಪ ಬಳಿಕ ತನ್ನ ಇಬ್ಬರು ಮಕ್ಕಳನ್ನು ಕರೆದುಕೊಂಡು ಠಾಣೆಗೆ ಹೋಗಿ ಶರಣಾಗತನಾಗಿದ್ದಾನೆ. ಲಿಂಗಸುಗೂರು ಠಾಣೆ ಪೊಲೀಸರು ಆತನನ್ನು ಬಂಧಿಸಿದ್ದು, ಮುಂದಿನ ಕ್ರಮ ಜರುಗಿಸಿದ್ದಾರೆ.