ಬಳ್ಳಾರಿ: ಸಾರಿಗೆ ನೌಕರರಿಗೆ ಸಚಿವರು ಕೊಟ್ಟ ಭರವಸೆಗೆ ವರ್ಷ – ಆದರೂ ಈಡೇರಿಲ್ಲ

ಬಳ್ಳಾರಿ: ಸಾರಿಗೆ ಮುಷ್ಕರದ ಸಮಯದಲ್ಲಿ ಆಗಿರುವ ನೌಕರರ ವಜಾ, ಪೊಲೀಸ್‌ ಪ್ರಕರಣ, ವರ್ಗಾವಣೆ ಮತ್ತು ಅಮಾನತು ಪ್ರಕರಣಗಳನ್ನು ರದ್ದುಗೊಳಿಸುವಂತೆ ಸಾರಿಗೆ ಸಚಿವರಿಗೆ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನೌಕರರ ಕೂಟದ ಪದಾಧಿಕಾರಿಗಳು ಮನವಿ ಸಲ್ಲಿಸಿ ಇದೇ ಆಗಸ್ಟ್‌ 27ಕ್ಕೆ ಒಂದು ವರ್ಷವಾಗಲಿದೆ.

ಸಾರಿಗೆ ಸಚಿವ ಬಿ. ಶ್ರೀರಾಮುಲು ಅವರನ್ನು ಬಳ್ಳಾರಿಯಲ್ಲಿ ಆ.27-2021ರಂದು ಭೇಟಿ ಮಾಡಿದ ಕೂಟದ ಪದಾಧಿಕಾರಿಗಳು ಸಾರಿಗೆ ನೌಕರರ ಸಮಸ್ಯೆ ಪರಿಹರಿಸುವಂತೆ ಮನವಿ ಮಾಡಿದ್ದರು. ಈ ವೇಳೆ ಸಚಿವರಿಗೆ ನೌಕರರು ಅನುಭವಿಸುತ್ತಿರುವ ಕಷ್ಟ-ನಷ್ಟಗಳ ಬಗ್ಗೆ ಮನವರಿಕೆ ಮಾಡಿಕೊಟ್ಟಿದ್ದರು. ಅಲ್ಲದೆ ಕೋರ್ಟ್ ವಿಚಾರಣೆ ಬಗ್ಗೆಯೂ ವಿವರಿಸಿದ್ದರು. ಆ ವೇಳೆ ಇರುವ ದಾಖಲೆಗಳನ್ನು ಕೊಡಿ ಎಂದು ಕೇಳಿದ್ದರು.

ಇನ್ನು ನೌಕರರಿಗೆ ಸಂಬಂಧಪಟ್ಟ ಆ ಅಂಕಿ ಅಂಶಗಳನ್ನೊಳಗೊಂಡ ದಾಖಲೆಗಳನ್ನು ನೀಡಿದರೆ ಆದಷ್ಟು ಬೇಗ ವಜಾ, ವರ್ಗಾವಣೆ, ಅಮಾನತು ಹಾಗೂ ಪೊಲೀಸ್ ಪ್ರಕರಣಗಳು ಸೇರಿ ಇತರ ಸಮಸ್ಯೆಗಳನ್ನು ನಿವಾರಣೆ ಮಾಡಿಕೊಡುತ್ತೇವೆ ಎಂದು ಸಚಿವರ ಸಂಪೂರ್ಣ ಭರವಸೆ ನೀಡಿದ್ದರು ಆದರೆ, ಈವರೆಗೂ ಆ ಕೆಲಸ ಆಮೆ ವೇಗದಲ್ಲೇ ಸಾಗುತ್ತಿರುವುದು ವಜಾಗೊಂಡ ನೌಕರರ ತಾಳ್ಮೆಯನ್ನು ಕೆಡಿಸುತ್ತಿದೆ.

ಹೀಗಾಗಿ ಸಚಿವರ ಬಗ್ಗೆ ಪೂರ್ಣವಿಶ್ವಾಸವಿಟ್ಟಿದ್ದ, ನೌಕರರು ಹತಾಶರಾಗಿದ್ದಾರೆ. ಕೊಟ್ಟ ಭರವಸೆ ಈಡೇರಿಸುವಲ್ಲಿ ಸಚಿವರು ವರ್‌ ಕಳೆದರೂ ಸುಮ್ಮನಿರುವುದು ಏತಕ್ಕೆ ಎಂದು ಆಕ್ರೋಶ ಹೊರಹಾಕುತ್ತಿದ್ದಾರೆ.

ಇನ್ನು ನೌಕರರು ಬಿಸಿಲು, ಮಳೆ, ಚಳಿ- ಗಾಳಿ, ಹಬ್ಬ-ಹರಿದಿನ ಎನ್ನದೆ ಅತಿ ಹೆಚ್ಚು ಸಮಯ ಒತ್ತಡದಲ್ಲೇ ಕುಟುಂಬವನ್ನು ತೊರೆದು ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಂಸ್ಥೆ ಸರ್ಕಾರದ ಒಂದು ಅಂಗವಾಗಿದ್ದರೂ ನಾವು ಇತರ ಇಲಾಖೆಯ ನಿಗಮಗಳಿಗೆ ಹೋಲಿಸಿದರೆ ಕಡಿಮೆ ವೇತನ ಪಡೆಯುತ್ತಿದ್ದೇವ. ಆರೋಗ್ಯ ಸೇರಿದಂತೆ ಹಲವು ಸೌಲಭ್ಯಗಳಿಂದಲೂ ವಂಚಿತರಾಗಿದ್ದೇವೆ.

ಕಳೆದ ಹಲವಾರು ವರ್ಷಗಳಿಂದ ಈ ಎಲ್ಲ ಕಷ್ಟ-ನಷ್ಟ ಅನುಭವಿಸಿಕೊಂಡು ಶಾಂತಿಯುತವಾಗಿ ಹೋರಾಟ ಮಾಡುತ್ತಾ ಸರ್ಕಾರವನ್ನು ಒತ್ತಾಯಿಸುತ್ತಾ ಬಂದಿದ್ದೇವೆ. ಎಲ್ಲ ಸವಲತ್ತುಗಳನ್ನು ನಮ್ಮ ಜನಪರವಾದ ಸರ್ಕಾರ ಇರುವಾಗ ಮಾತ್ರ ಪಡೆಯಬಹುದೆಂದು ಗಮನಸೆಳೆಯಲು ಡಿಸೆಂಬರ್‌ನಲ್ಲಿ ಹೋರಾಟ ಮಾಡಿದ್ದೇವೆ ಹೊರತು ನಮಗೆ ಅನ್ಯ ಉದ್ದೇಶ ಇರಲಿಲ್ಲ ಎಂದು ನೌಕರರು ಸ್ಪಷ್ಟಪಡಿಸಿದ್ದಾರೆ.

ಇನ್ನು ಆ ವೇಳೆ ಸರ್ಕಾರವೇ ಕೊಟ್ಟ ಭರವಸೆಯನ್ನು ನಾಲ್ಕು ತಿಂಗಳು ಕಳೆದರೂ ಈಡೇರಿಸದೆ ಇದ್ದ ಕಾರಣ ಕೊಟ್ಟ ಭರವಸೆಗಳ ಈಡೇರಿಕೆ ಆಗ್ರಹಿಸಿ ಏಪ್ರಿಲ್‌ನಲ್ಲಿ ಸಾರಿಗೆ ಮುಷ್ಕರ ಮಾಡಿದ ಸಂದರ್ಭದಲ್ಲಿ ಸಂಸ್ಥೆ ಶಿಸ್ತು ಕ್ರಮದ ಹೆಸರಿನಲ್ಲಿ ಹಲವಾರು ನೌಕರರನ್ನು (ಮಹಿಳಾ, ಅಂಗವಿಕಲ ಸಿಬ್ಬಂದಿಗಳು ಎಂದು ಸಹ ನೋಡದೆ) ದೂರದ ಸ್ಥಳಗಳಿಗೆ (ಸುಮಾರು 300 ರಿಂದ 450 ಕಿಲೋಮೀಟರ್) ವರ್ಗಾವಣೆ ಮಾಡಿತ್ತು. ಅದರಿಂದ ನೌಕರರು ಸಂಕಷ್ಟಕ್ಕೆ ಸಿಲುಕಿದ್ದರು.

ಇನ್ನು ಮಹಿಳಾ ಸಿಬ್ಬಂದಿ ಹಾಗೂ ಇತರ ನೌಕರರು ತಮ್ಮ ಕುಟುಂಬವನ್ನು ಬಿಟ್ಟು ದೂರದ ಸ್ಥಳಗಳಲ್ಲಿ ಕೆಲಸ ನಿರ್ವಹಿಸಲು ತುಂಬಾ ಕಷ್ಟಪಟ್ಟರು. ಇದಿಷ್ಟೇ ಸಾಲದು ಎಂಬಂತೆ ಮತ್ತಷ್ಟು ನೌಕರರನ್ನು ಸೇವೆಯಿಂದ ವಜಾ ಮಾಡಿದ್ದರು. ಇದರಿಂದ ತಮ್ಮ ಆದಾಯದ ಮೂಲವನ್ನೇ ಕಳೆದುಕೊಂಡರು. ಆದರೆ ಈವರೆಗೂ ಅವರಿಗೆ ನ್ಯಾಯ ದೊರಕಿಸಿಕೊಡುವಲ್ಲಿ ಸಚಿವರು ಎಡವಿದ್ದಾರೆ.

ಇತ್ತ ಅಂದು ನಿವೃತ್ತಿ ಅಂಚಿನಲ್ಲಿರುವ ನೌಕರರು ಒಳಗೊಂಡಂತೆ ಸಾವಿರಾರು ನೌಕರರನ್ನು ವಜಾ ಮಾಡಿದ್ದರು. ನೌಕರರು ಅಧಿಕಾರಿಗಳ ನಡೆಯಿಂದ ಬೇಸತ್ತು ಹಲವರು ಪ್ರಾಣವನ್ನೇ ಕಳೆದುಕೊಂಡರು. ಆದರೂ ಸೌಜನ್ಯಕ್ಕೂ ಅವರ ಮನೆಗಳಿಗೆ ಭೇಟಿ ಕೊಟ್ಟು ಸಾಂತ್ವನ ಹೇಳುವ ಔದಾರ್ಯವನ್ನು ಸಚಿವರು ತೋರಲೇ ಇಲ್ಲ.

ಪ್ರಸ್ತುತ ಕೆಎಸ್‌ಆರ್‌ಟಿಸಿ ಹೊರತು ಪಡಿಸಿದರೆ ಉಳಿದ ನಿಗಮಗಳಲ್ಲಿ ಅಧಿಕಾರಿಗಳು ಕ್ಷುಲ್ಲಕ ಕಾರಣಗಳಿಗೂ ಅಮಾನತು ಮಾಡುವುದನ್ನು ಮುಂದುವರಿಸಿದ್ದಾರೆ. ಇದರಿಂದ ನೌಕರರು ಮತ್ತಷ್ಟು ಕಷ್ಟಕ್ಕೆ ಸಿಲುಕುತ್ತಿದ್ದಾರೆ. ಅಲ್ಲದೆ ನಿಗಮಗಳು ನೌಕರರಿಲ್ಲದೇ ರೂಟ್‌ಗಳಿಗೆ ಬಸ್‌ಗಳನ್ನು ಇಳಿಸಲು ಸಮಸ್ಯೆಯಾಗುತ್ತಿದೆ.

ಮುಷ್ಕರದ ಸಮಯದಲ್ಲಿ ಕರ್ತವ್ಯಕ್ಕೆ ಬಂದಿಲ್ಲ ಎಂಬ ಕಾರಣ ನೀಡಿ ಕಲಂ -23 ಸೇರಿ ಇತರ ನಿಯಮಗಳಡಿಯಲ್ಲಿ ಆರೋಪ ಪತ್ರಗಳನ್ನು ನೀಡಿ ಗಾಯದ ಮೇಲೆ ಬರೆ ಎಳೆಯುತ್ತಿದ್ದಾರೆ. ಮುಷ್ಕರದ ಸಮಯದಲ್ಲಿ ರಾಜ್ಯಾದ್ಯಂತ ಅನೇಕ ನೌಕರರ ಮೇಲೆ ಶೇ.95ರಷ್ಟು ಸುಳ್ಳು ಕೇಸ್‌ಗಳನ್ನು ದಾಖಲಿಸಿದ್ದಾರೆ.

ಈಗಲಾದರೂ ತಾವು ಸಾರಿಗೆ ನಾಲ್ಕೂ ನಿಗಮಗಳಲ್ಲಿ ಸಾರಿಗೆ ಮುಷ್ಕರದ ಸಮಯದಲ್ಲಿ ಮಾಡಿರುವ ವಜಾ, ವರ್ಗಾವಣೆ ಹಾಗೂ ಅಮಾನತು ಪ್ರಕರಣಗಳನ್ನು ರದ್ದುಪಡಿಸಿ ನೌಕರರ ಮೇಲೆ ದಾಖಲಾಗಿರುವ ಪ್ರಕರಣಗಳನ್ನು ಹಿಂಪಡೆಯಲು, ಮುಷ್ಕರದ ಪೂರ್ವದಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಕಾರ್ಯಸ್ಥಳಗಳಿಗೆ ಮತ್ತೆ ನಿಯೋಜಿಸಿ ಸಾರಿಗೆ ನೌಕರರ ಸಮಸ್ಯೆಗಳ ಪರಿಹಾರಕ್ಕೆ ಕ್ರಮ ಕೈಗೊಳ್ಳಬೇಕು.

ಇನ್ನು ಆಡಳಿತವರ್ಗ ಮುಷ್ಕರ ಸಮಯದಲ್ಲಿ ನೌಕರರ ವಿರುದ್ಧ ತೆಗೆದುಕೊಂಡ ಕ್ರಮಗಳಾದ ವರ್ಗಾವಣೆ, ವಜಾ ಅಮಾನತು ಮತ್ತು ಪೊಲೀಸ್ ಪ್ರಕರಣಗಳನ್ನು ತೆರವುಗೊಳಿಸಿ ಏಪ್ರಿಲ್ 6- 2021ರ ಸಂದರ್ಭದಲ್ಲಿ ಇದ್ದಂತಹ ಸ್ಥಿತಿಗೆ ತರಬೇಕೆಂದು ಕೂಟದ ಪದಾಧಿಕಾರಿಗಳೂ ಮನವಿ ಮಾಡಿದ್ದಾರೆ.