ಬೆಳಗಾವಿ: ಸುವರ್ಣ ಸೌಧದ ಮುಂದೆ ಅಮರಣಾಂತ ಉಪವಾಸ ಸತ್ಯಾಗ್ರಹ ನಿರತ ಸಾರಿಗೆ ನೌಕರರನ್ನು ಎಬ್ಬಿಸಲು ಶುಕ್ರವಾರ ರಾತ್ರಿ ಮತ್ತು ಶನಿವಾರ ಸರ್ಕಾರ ಪೊಲೀಸರನ್ನು ಛೂ ಬಿಟ್ಟಿತ್ತು. ಆದರೆ ಇಂದು (ಭಾನುವಾರ) ಯಾವುದೇ ಸಮಸ್ಯೆ ಇಲ್ಲದೆ ನೌಕರರು ಉಪವಾಸ ಸತ್ಯಾಗ್ರಹದಲ್ಲಿ ನಿರತರಾಗಿದ್ದಾರೆ.
ಅಲ್ಲದೆ ಇಂದು ಬೇರೆ ಬೇರೆ ಕಡೆಯಿಂದ ಬರುತ್ತಿರುವ ಸಾರಿಗೆ ನೌಕರರಿಗೆ ಉಪವಾಸ ಸತ್ಯಾಗ್ರಹ ಸ್ಥಳದಿಂದ ಸುಮಾರು 500 ಮೀಟರ್‌ ದೂರದಲ್ಲಿ ಕುಳಿತುಕೊಳ್ಳಲು ವ್ಯವಸ್ಥೆ ಮಾಡಲಾಗಿದ್ದು, ಪೊಲೀಸರು ನಮ್ಮ ಹೋರಾಟಕ್ಕೆ ಸ್ಪಂದಿಸುತ್ತಿದ್ದಾರೆ ಎಂದು ನೌಕರರು ತಿಳಿಸಿದ್ದಾರೆ.
ಹೀಗಾಗಿ ಇಂದು ಪೊಲೀಸರ ಯಾವುದೇ ಕಿರಿಕಿರಿ ಇಲ್ಲದೆ ನೌಕರರು ಟೆಂಟ್‌ನಲ್ಲೇ ಉಪವಾಸ ಸತ್ಯಾಗ್ರಹ ಮುಂದುವರಿಸಿದ್ದಾರೆ. ಇನ್ನು ಅದೇ ಹೊರಗಿನಿಂದ ಬರುತ್ತಿರುವ ನೌಕರರನ್ನು ಮಾತ್ರ ಟೆಂಟ್‌ ಒಳಗೆ ಬಿಡದೆ ಅವರಿಗೆ ಪ್ರತ್ಯೇಕ ಸ್ಥಳವನ್ನು ವ್ಯವಸ್ಥೆ ಮಾಡಲಾಗಿದೆ.
ನಿನ್ನೆ ಏನು ನಡೆದಿತ್ತು: ನೌಕರರ ಉಪವಾಸ ಸತ್ಯಾಗ್ರಹವನ್ನು ಹತ್ತಿಕ್ಕಲು ಸರ್ಕಾರ ಹುನ್ನಾರ ನಡೆಸಿ ಪೊಲೀಸರ ಮೂಲಕ ಅವರನ್ನು ಎಬ್ಬಿಸುವ ಪ್ರಯತ್ನ ಮಾಡಿತ್ತು. ಹೀಗಾಗಿ ನೌರನ್ನು ಚದುರಿಸುವ ಪ್ರಯತ್ನವನ್ನು ಪೊಲೀಸರು ಮಾಡಿದ್ದರು.
ಅದರಂತೆ ಮುಂಜಾನೆ ಟೆಂಟ್‌ನಲ್ಲಿ ಉಪವಾಸ ಕುಳಿತಿರುವವರನ್ನು ಹೊರತುಪಡಿಸಿ ಬೇರೆ ಯಾವ ನೌಕರರನ್ನು ಟೆಂಟ್‌ ಒಳಗಡೆ ಬಿಡಲಿಲ್ಲ. ಆದರೂ ನಮ್ಮ ಹೋರಾಟ ಮುಂದುವರೆಸುತ್ತೇವೆ ಎಂದು ಟೆಂಟ್‌ನಿಂದ ಸುಮಾರು 200 ಮೀಟರ್‌ ದೂರದಲ್ಲಿದ್ದ ನಿರ್ಮಾಣ ಹಂತದ ಪೆಟ್ರೋಲ್‌ ಬಂಕ್‌ ಒಂದರ ಬಳಿ ಸತ್ಯಾಗ್ರಹಕ್ಕೆ ನೌಕರರು ಕುಳಿತರು. ಆ ವೇಳೆ ಪೊಲೀಸರು ಅಲ್ಲಿಯೂ ನೌಕರರನ್ನು ಕುಳಿತುಕೊಳ್ಳುವುದಕ್ಕೆ ಅವಕಾಶ ಮಾಡಿಕೊಡದೆ ಎಬ್ಬಿಸಿದ್ದರು.
ಆದರೂ ಹಠ ಬಿಡದ ಸಾರಿಗೆ ನೌಕರರು ಸುವರ್ಣಸೌಧದಿಂದ 700-800 ಮೀಟರ್‌ ದೂರದ ಜಮೀನೊಂದರಲ್ಲೇ ತಮ್ಮ ಹೋರಾಟವನ್ನು ಮುಂದರುವರಿಸಿದ್ದರು. ಆದರೆ ಅಲ್ಲಿಗೂ ಎರಡು ಬಸ್‌ಗಳಲ್ಲಿ ಹೋಗಿರುವ ಪೊಲೀಸರು ನೌಕರರ ಮೇಲೆ ತೀವ್ರ ನಿಗಾವಹಿಸಿದ್ದರು.
ಆದರೆ ಇಂದು ಅದಾವುದೇ ತೊಂದರೆ ಕೊಡದೆ ನೌಕರರಿಗೆ ಬೇರೆ ಸ್ಥಳವನ್ನು ವ್ಯವಸ್ಥೆ ಮಾಡಿದ್ದಾರೆ. ಹೀಗಾಗಿ ಉಪವಾಸ ಸತ್ಯಾಗ್ರಹ ನಿರತರು ಟೆಂಟ್‌ನಲ್ಲೇ ಹೋರಾಟ ಮಾಡುತ್ತಿದ್ದರೆ, ಹೊರಗಿನಿಂದ ಬರುತ್ತಿರುವ ನೌಕರರು ಬೇರೊಂದು ಸ್ಥಳದಲ್ಲಿ ಧರಣಿ ಕುಳಿತಿದ್ದಾರೆ.
ಈ ನಡುವೆ ಉಪವಾಸ ಸತ್ಯಾಗ್ರಹದ ನೇತೃತ್ವ ವಹಿಸಿರುವ ಚಂದ್ರಶೇಖರ್‌ ಅವರು ನಿನ್ನೆ ಬೆಳಗ್ಗೆ 5ಗಂಟೆಯಲ್ಲಿ ಎದೆನೋವು ಮತ್ತು ಉಸಿರಾಟದ ತೊಂದರೆಯಿಂದ ಆಸ್ಪತ್ರೆಗೆ ದಾಖಲಾಗಿದ್ದು, ಅವರಿಗೆ ಇಂದು ಕೂಡ ಚಿಕಿತ್ಸೆ ಮುಂದುವರಿಸಲಾಗುತ್ತಿದೆ.
