ಕಬ್ಬು ಕಟಾವು ವಿಳಂಬ, ತೂಕದಲ್ಲಿ ನಷ್ಟ ತಪ್ಪಿಸಲು ಜಿಲ್ಲಾಡಳಿತ ಕ್ರಮ ಕೈಗೊಳ್ಳಬೇಕು: ಕುರುಬೂರು ಶಾಂತಕುಮಾರ್‌

ತಿ.ನರಸೀಪುರ: ಕಬ್ಬು ಕಟಾವು ವಿಳಂಬ, ಕಬ್ಬು ತೂಕದಲ್ಲಿ ರೈತರಿಗೆ ನಷ್ಟ ತಪ್ಪಿಸಲು, ಕೂಡಲೇ ಜಿಲ್ಲಾಡಳಿತ ಕ್ರಮ ಕೈಗೊಳ್ಳಬೇಕು ಎಂದು ರಾಜ್ಯ ಕಬ್ಬು ಬೆಳೆಗಾರರ ಸಂಘದ ರಾಜ್ಯಾಧ್ಯಕ್ಷ ರೈತರತ್ನ ಕುರುಬೂರು ಶಾಂತಕುಮಾರ್ ಆಗ್ರಹಿಸಿದ್ದಾರೆ.

ನರಸೀಪುರ ತಾಲೂಕು ಕಬ್ಬು ಬೆಳೆಗಾರ ರೈತರು ಇಂದು ಪಟ್ಟಣದ ವೀರಶೈವ ವಿದ್ಯಾರ್ಥಿ ನಿಲಯದಲ್ಲಿ ಆಯೋಜಿಸಿದ್ದ ರೈತರ ಸಭೆಯಲ್ಲಿ ಮಾತನಾಡಿದ ಅವರು, ರಾಜ್ಯ ಸರ್ಕಾರ ಘೋಷಣೆ ಮಾಡಿರುವ ಕಬ್ಬಿಗೆ ಹೆಚ್ಚುವರಿ 150 ರೂ. ಕೊಡಿಸಲು, ಕಬ್ಬು ಕಟಾವು 18 ತಿಂಗಳು ವಿಳಂಬವಾಗುತ್ತಿರುವುದನ್ನು ತಪ್ಪಿಸಲು ಹೋರಾಟ ಮಾಡಿದ್ದೇವೆ.

ಆದರೂ ಸರಿಯಾದ ಸಮಯಕ್ಕೆ ಕಬ್ಬು ಕಟಾವು ಮಾಡದೆ ಇರುವುದರಿಂದ ಇಳುವರಿಯಲ್ಲಿ ರೈತರಿಗೆ ನಷ್ಟವಾಗುತ್ತಿದೆ. ಇದರಿಂದ ಬ್ಯಾಂಕ್‌ಗೆ ಹೆಚ್ಚು ಬಡ್ಡಿ ಪಾವತಿಸಬೇಕಾಗಿದೆ. ಆದ್ದರಿಂದ ಕೂಡಲೇ ಜಿಲ್ಲಾಡಳಿತ ಸಕ್ಕರೆ ಕಾರ್ಖಾನೆಗೆ ಕಠಿಣ ಸೂಚನೆ ನೀಡಬೇಕು ಎಂದು ಒತ್ತಾಯಿಸಿದರು.

ರೈತರು ಸಂಘಟಿತ ಮತ್ತು ನಿರಂತರ ಹೋರಾಟ ಮಾಡಿದ್ದರಿಂದ ಕಬ್ಬುದರ 150 ರೂ. ಏರಿಕೆಯಾಗಲು ಕಾರಣವಾಗಿದೆ. ಯಾವುದೇ ಜನಪ್ರತಿನಿಧಿಗಳು ನಮ್ಮ ಹೋರಾಟಕ್ಕೆ ಬೆಂಬಲಿಸದೆ ದೂರ ಉಳಿದರು. ಇದು ದುರ್ದೈವದ ಸಂಗತಿ. ಮುಂದೆ ಚುನಾವಣೆ ಬರುತ್ತಿರುವುದರಿಂದ ಎಲ್ಲ ಪಕ್ಷಗಳ ಮುಖಂಡರು ತಮ್ಮ ಪಕ್ಷಗಳ ಬಾವುಟ, ಶಾಲುಗಳನ್ನು ದೂರವಿಟ್ಟು, ರೈತರ ಹಸಿರು ಶಾಲು ಬಳಸಿಕೊಂಡು ನಾಟಕವಾಡುತ್ತಿದ್ದಾರೆ. ಈ ಬಗ್ಗೆ ರೈತರು ಎಚ್ಚರವಾಗಿರಬೇಕು ಎಂದು ಕಿವಿ ಮಾತು ಹೇಳಿದರು.

ಇನ್ನು ಕೇಂದ್ರ ಸರ್ಕಾರ ರೈತರಿಗೆ ಪದೇಪದೇ ಪಂಗನಾಮ ಹಾಕುತ್ತಿದೆ. ಸ್ವಾಮಿನಾಥನ್ ವರದಿ ಜಾರಿ, ರೈತರ ಆದಾಯ ದ್ವಿಗುಣಗೊಳಿಸುತ್ತೇವೆ, ಕೃಷಿ ಉತ್ಪನ್ನಗಳಿಗೆ ಶಾಸನಬದ್ಧ ಖಾತ್ರಿ ಬೆಂಬಲ ಬೆಲೆ ನಿಗದಿ ಮಾಡುವ ಭರವಸೆ ನೀಡಿ ಯಾವುದನ್ನು ಜಾರಿ ಮಾಡಿಲ್ಲ. ಈ ರೀತಿಯಾಗಿ ರೈತರನ್ನ ದಿಕ್ಕು ತಪ್ಪಿಸುತ್ತಿದ್ದಾರೆ ಎಂದು ಕಿಡಿಕಾರಿದರು.

ರೈತರ ಸಭೆಯಲ್ಲಿ, ನಿರಂತರ ಹೋರಾಟದಿಂದ ಕಬ್ಬು ಬೆಳೆಗೆ ಹೆಚ್ಚುವರಿ ದರ ನಿಗದಿಯಾದ ಕಾರಣ ರೈತರ ಹೋರಾಟಕ್ಕೆ ಸಂದ ಜಯ ಎಂದು ಎಲ್ಲ ರೈತರು ಅಭಿಪ್ರಾಯ ವ್ಯಕ್ತಪಡಿಸಿದರು. ಸಭೆಯಲ್ಲಿ ರೈತರು ಬ್ಯಾಂಕುಗಳ ಕಿರುಕುಳ, ವಿದ್ಯಾರ್ಥಿಗಳಿಗೆ ಸಾಲ ಕೊಡಲು ಕಾನೂನು ಬಾಹಿರ, ಕ್ರಮಗಳು, ಕೃಷಿ ಪಂಪಸೆಟ್ಟಗಳಿಗೆ ವಿದ್ಯುತ್ ಸಮಸ್ಯೆ ಬಗ್ಗೆ, ಬೇಸಿಗೆ ಬೆಳೆಗೆ ನೀರು ಹರಿಸಲು ಸರ್ಕಾರಕ್ಕೆ ಒತ್ತಾಯಿಸುವ ಬಗ್ಗೆ ಸಭೆಯಲ್ಲಿ ರೈತರು ತಿಳಿಸಿದರು.

ಸಭೆಯಲ್ಲಿ ತಾಲೂಕು ಅಧ್ಯಕ್ಷ ಕುರುಬೂರು ಸಿದ್ದೇಶ್, ಅತ್ತಹಳ್ಳಿ ದೇವರಾಜ್, ಕಿರಗಸೂರು ಶಂಕರ, ಬರಡನಪುರ ನಾಗರಾಜ್, ಪ್ರದೀಪ್, ಪ್ರಸಾದನಾಯಕ, ಪರಶಿವಮೂರ್ತಿ, ಅಪ್ಪಣ್ಣ, ಗುರುಸ್ವಾಮಿ, ಗೌರಿಶಂಕರ್, ರಾಜೇಶ್, ಕುಮಾರ್, ರೂಪಾ, ಪ್ರಭುಸ್ವಾಮಿ ಮತಿತರು ಇದ್ದರು.