ಪ್ರಧಾನಮಂತ್ರಿ ಮೋದಿ ನಿವಾಸದ ಮೇಲೆ ಡ್ರೋನ್​ ಹಾರಾಟ: ಆತಂಕ

ನ್ಯೂಡೆಲ್ಲಿ: ಪ್ರಧಾನಿ ಮೋದಿ ಅವರ ನಿವಾಸದ ಮೇಲೆ ಅಪರಿಚಿತ ಡ್ರೋನ್​ವೊಂದು ಇಂದು ಬೆಳಗಿನ ಜಾವ ಹಾರಾಟ ನಡೆಸಿ ಆತಂಕವುನ್ನುಂಟು ಮಾಡಿದೆ.

ಪ್ರಧಾನಿ ರಕ್ಷಿಸುವ ಗಣ್ಯ ಪಡೆಯಾದ ವಿಶೇಷ ರಕ್ಷಣಾ ಗುಂಪಿನ ಅಧಿಕಾರಿಗಳು ಡ್ರೋನ್ ಹಾರಾಟ ಮಾಡಿರುವುದನ್ನು ನೋಡಿರುವ ಬಗ್ಗೆ ದೆಹಲಿ ಪೊಲೀಸರಿಗೆ ಮಾಹಿತಿ ನೀಡಿದ್ದು ತನಿಖೆ ಚುರುಕುಗೊಳಿಸಿದ್ದಾರೆ.

ದೆಹಲಿಯ ಪ್ರಧಾನಿ ಮೋದಿ ಅವರ ನಿವಾಸ ಯಾವುದೇ ವಸ್ತುಗಳ ಹಾರಾಟ ನಡೆಸದಂತಹ ನಿಷೇಧಿತ ಸ್ಥಳವಾಗಿದೆ. ಹೀಗಾಗಿ ದಿನದ 24 ಗಂಟೆಯು ರಕ್ಷಣೆ ಪಡೆಗಳು ಹದ್ದಿನ ಕಣ್ಣಿಟ್ಟು ಕಾವಲು ಕಾಯುತ್ತಿರುತ್ತವೆ. ಆದರೆ, ಇಂದು ಬೆಳಗಿನ ಜಾವ ಡ್ರೋನ್​ವೊಂದು ಪ್ರಧಾನಿ ಮನೆ ಮೇಲೆ ಅನುಮಾನಸ್ಪದವಾಗಿ ಹಾರಾಟ ನಡೆಸಿದೆ ಎಂದು ರಕ್ಷಣಾ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಹಿನ್ನೆಲೆಯಲ್ಲಿ ದೆಹಲಿ ಪೊಲೀಸರು ಬೆಳಗ್ಗೆಯಿಂದಲೇ ಡ್ರೋನ್ ಬಗ್ಗೆ ಹುಡುಕಾಟ ನಡೆಸಿದ್ದು ಮುಂದಿನ ಕ್ರಮ ಕೈಗೊಂಡಿದ್ದಾರೆ. ಏರ್ ಟ್ರಾಫಿಕ್ ಕಂಟ್ರೋಲ್ ರೂಮ್ (ATC) ಅನ್ನು ಸಂಪರ್ಕಿಸಿದ್ದು, ಈ ವರೆಗೂ ಯಾವುದೆ ಡ್ರೋನ್ ಪತ್ತೆಯಾಗಿಲ್ಲ. ಹೀಗಾಗಿ ಪೊಲೀಸರು ಶೋಧ ಕಾರ್ಯ ಮುಂದುವರಿಸಿದ್ದಾರೆ.