ಬೆಂಗಳೂರು: ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆಯ ಕೆಂಗೇರಿ – ಬನಶಂಕರಿ ನಡುವೆ ಸಂಚರಿಸುವ ( ಮಾರ್ಗ ಸಂಖ್ಯೆ 375) ಬಸ್‌ನಲ್ಲಿ ಪ್ರಯಾಣಿಕರೊಬ್ಬರು ಬಿಟ್ಟುಹೋಗಿದ್ದ ಲ್ಯಾಪ್‌ಟಾಪ್‌ ಮತ್ತು ಬ್ಯಾಗನ್ನು ಮತ್ತೆ ಅವರಿಗೆ ತಲುಪಿಸುವ ಮೂಲಕ ಬಿಎಂಟಿಸಿ ನೌಕರರು ಪ್ರಾಮಾಣಿಕತೆ ಮೆರೆದಿದ್ದಾರೆ.
ಸಾರಿಗೆ ನೌಕರರು ಇಂಥ ಹಲವಾರು ಪ್ರಾಮಾಣಿಕ ಸೇವೆ ಮಾಡುತ್ತಿರುತ್ತಾರೆ. ಆದರೆ ಅವುಗಳಲ್ಲಿ ಬೆಳಕಿಗೆ ಬರುವುದು ತೀರ ಕಡಿಮೆ. ಜತೆಗೆ ಅವರಿಗೆ ಕೊಡುತ್ತಿರುವ ವೇತನವೂ ಅಷ್ಟೇ ಕಡಿಮೆ ಇದೆ. ಆದರೂ ನೌಕರರು ಪ್ರಾಮಾಣಿಕತೆ ಬಿಡುವುದಿಲ್ಲ ಎಂಬುದು ಮತ್ತೆ ಮತ್ತೆ ಸಾಬೀತಾಗುತ್ತುತಲೇ ಇರುತ್ತದೆ.
ಹೌದು ! ಇಂದು (ನ.28) ಕೆಂಗೇರಿ – ಬನಶಂಕರಿ ನಡುವೆ ಸಂಚರಿಸುವ ಮಾರ್ಗ ಸಂಖ್ಯೆ 375 ರಲ್ಲಿ ಅಶ್ವಿನಿ ಎಂಬುವವರು ಪ್ರಯಾಣಿಸುವಾಗ ಮರೆತು ಬ್ಯಾಗು ಮತ್ತು ಲ್ಯಾಪ್‌ಟಾಪ್‌ ಬಿಟ್ಟುಹೋಗಿದ್ದರು. ಈ ವೇಳೆ ಅದನ್ನು ಗಮನಿಸಿದ ನಿರ್ವಾಹಕರು ಮತ್ತು ಚಾಲಕರು ಆ ಬ್ಯಾಗು ಮತ್ತು ಲ್ಯಾಪ್‌ಟಾಪ್‌ಅನ್ನು ಬನಶಂಕರಿ ಬಸ್ ನಿಲ್ದಾಣದಲ್ಲಿದ್ದ ಅಧಿಕಾರಿಗಳಿಗೆ ತಲುಪಿಸಿದರು.
ಆ ಬಳಿಕ ಬ್ಯಾಗ್‌ನಲ್ಲಿ ಇದ್ದ ಫೋನ್‌ಮೂಲಕ ಅಶ್ವಿನಿಯವರನ್ನು ಸಂಪರ್ಕಿಸಿದ ಅಧಿಕಾರಿಗಳು ಬಳಿಕ ಅದನ್ನು ಆಕೆಗೆ ರಾತ್ರಿ 7.30ರಲ್ಲಿ ತಲುಪಿಸಿದ್ದಾರೆ. ಈ ವೇಳೆ ನಿಲ್ದಾಣಾಧಿಕಾರಿ ಮಹಾದೇವಯ್ಯ ಹಾಗೂ ಮೆಕ್ಯಾನಿಕ್ ಲಕ್ಕಪ್ಪ ಅವರು ಅಶ್ವಿನಿ ಅವರಿಗೆ ಬ್ಯಾಗು ಮತ್ತು ಲ್ಯಾಪ್‌ಟಾಪ್‌ಅನ್ನು ಮರಳಿಸಿದ್ದಾರೆ.
ಈ ವೇಳೆ ಮಾತನಾಡಿದ ಅಶ್ವಿನಿ, ಬಿಎಂಟಿಸಿಯ ಪ್ರಾಮಾಣಿಕ ನೌಕರರ ಸೇವೆಯನ್ನು ಶ್ಲಾಘಿಸಿದ್ದು ಸಂಸ್ಥೆಗೆ ತುಂಬು ಹೃದಯದ ಅಭಿನಂದನೆಗಳನ್ನು ಸಲ್ಲಿಸಿದರು.
ಇನ್ನು ಇಂತಹ ಶ್ಲಾಘನೀಯ ಕಾರ್ಯಗಳು ಎಲ್ಲರಿಗೂ ಮಾರ್ಗದರ್ಶನವಾಗಿ ಸಂಸ್ಥೆಗೆ ಒಳ್ಳೆಯ ಹೆಸರು ತರುವಲ್ಲಿ ನಮ್ಮ ನೌಕರರು ಹಿಂದೆ ಸರಿಯುವುದಿಲ್ಲ ಎಂದು ನಿಗಮದ ವ್ಯವಸ್ಥಾಪಕ ನಿರ್ದೇಶಕರಾದ ಸತ್ಯವತಿ ಸಂತಸ ವ್ಯಕ್ತಪಡಿಸಿದರು.
