ಕುಷ್ಟಗಿ: ಕೊಪ್ಪಳ- ಕುಷ್ಟಗಿ ಮಾರ್ಗಮಧ್ಯದ ಕುದುರಿಮೋತಿ ಕ್ರಾಸ್‌ ಬಳಿ ಕಲ್ಯಾಣ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ಚಾಲಕ ಮತ್ತು ನಿರ್ವಾಹಕರ ಮೇಲೆ 8ಜನರಿಂದ ಗುಂಪು ಹಲ್ಲೆ ಮಾಡಿರುವ ಘಟನೆ ಜರುಗಿದೆ.
ಹಲ್ಲೆಯಲ್ಲಿ ಕುಷ್ಟಗಿ ಘಟಕದ ನೌಕರರಾದ ಚಾಲಕ ಹನುಮಂತಗೌಡ ಮತ್ತು ನಿರ್ವಾಹಕ ರಾಜಸಾಬ್‌ ಎಂಬುವರು ಗಾಯಗೊಂಡಿದ್ದು ಈ ಇಬ್ಬರನ್ನು ಕುಷ್ಟಗಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗುತ್ತಿದೆ.
ಫುಟ್‌ಬೋರ್ಡ್‌ನಲ್ಲಿ ನಿಂತಿದ್ದವವರನ್ನು ಒಳಗಡೆ ಬನ್ನಿ ನಿರ್ವಾಹಕರು ಕರೆದಿದ್ದಕ್ಕೆ ಕೋಪಗೊಂಡ ವಿದ್ಯಾರ್ಥಿ ತನ್ನ ಸ್ನೇಹಿತರಿಗೆ ಕರೆ ಮಾಡಿ ಕರೆಸಿಕೊಂಡು ಕುದುರಿಮೋತಿ ಹತ್ತಿರ ಬಸ್‌ ಬರುತ್ತಿದ್ದಂತೆ ಏಕಾಏಕಿ ಬಂದು ಹಲ್ಲೆ ಮಾಡಿದ್ದಾರೆ.
ಹಲ್ಲೆಯಿಂದ ನೌಕರರು ಕೈ ಮತ್ತು ಮುಖ ಸೇರಿದಂತೆ ದೇಹದ ಇತರ ಭಾಗಗಳಲ್ಲಿ ಗಾಯಗಳಾಗಿವೆ. ಮೊಣಕೈ ಮುರಿದಿದ್ದು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಈ ಹಲ್ಲೆ ಸಂಬಂಧ ಕುಷ್ಟಗಿ ವಿಭಾಗೀಯ ಅಧಿಕಾರಿಗಳು ಬೇವೂರ ಪೊಲೀಸ್‌ ಠಾಣೆಯಲ್ಲಿ ನಿರ್ವಾಹಕ ರಾಜಸಾಬ್‌ ಜತೆ ಹೋಗಿ ದೂರು ನೀಡಿದ್ದಾರೆ. ಕೇಸು ದಾಖಲಿಸಿಕೊಂಡಿರುವ ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.
