KSRTC: ಯಾವ ಶತ್ರುಗಳಿಗೂ ಬೇಡ ನಮ್ಮ ಈ ಪರಿಸ್ಥಿತಿ: ನೊಂದ ಅಶಕ್ತ ನೌಕರರು

ಬೆಂಗಳೂರು: ಸತ್ಯವಾಗಿಯೂ ನನ್ನ 21 ವರ್ಷದ ಅನುಭವದಲ್ಲಿ ಕೆಎಸ್ಆರ್ಟಿಸಿ ಅಂತಹ ನಿಯಮಗಳು ಯಾವ ಸಂವಿಧಾನದಲ್ಲೂ ಇಲ್ಲ. ಅಂತಹ ಕಠಿಣ ಕಾನೂನುಗಳು ನಮ್ಮ ಕೆಎಸ್ಆರ್ಟಿಸಿ ಆಡಳಿತ ವ್ಯವಸ್ಥೆಯಲ್ಲಿ ಇವೆ ಎಂದು ನೊಂದ ಸಂಸ್ಥೆಯ ನೌಕರರು ಭಾರಿ ಖಿನ್ನತೆಯಿಂದ ಹೇಳಿಕೆ ನೀಡಿದ್ದಾರೆ.

ಸಾಮಾನ್ಯವಾಗಿ ಕೊಲೆ ಆರೋಪಿಗಳಿಗೂ ಸಹ ಇಂತಹ ಕಠಿಣ ಕಾನೂನುಗಳು ನಮ್ಮ ಸಂವಿಧಾನದ ಅಡಿಯಲ್ಲಿ ಇಲ್ಲ, ಅವರಿಗೂ ಸಹ ಗೌರವವಿದೆ. ಆದರೆ ನಮ್ಮ ಕೆಎಸ್ಆರ್ಟಿಸಿ ಆಡಳಿತ ವ್ಯವಸ್ಥೆಯಲ್ಲಿ ನೌಕರರನ್ನು ಭೂಮಿ ಮಟ್ಟಕ್ಕೆ ತುಳಿಯುವಂತಹ ಕಠಿಣ ಕಾನೂನುಗಳಿವೆ.

ಇನ್ನು ಅಧಿಕಾರಿ ವರ್ಗದವರು ಏನೇ ತಪ್ಪು ಮಾಡಿದರು ಅವರಿಗೆ ರಾಜಕಾರಣಿಗಳು ಸೇರಿದಂತೆ ಯಾರದೋ ಕೃಪಾಕಟಾಕ್ಷ ಇದ್ದೇ ಇರುತ್ತದೆ. ಆದರೆ, ಸಂಸ್ಥೆಗೆ ಆದಾಯದ ಮೂಲವಾಗಿರುವ ಚಾಲಕರು- ನಿರ್ವಾಹಕರಿಗೆ ಬೆನ್ನುಲುಬಾಗಿ ನಿಲ್ಲಬೇಕಾದ ಅಧಿಕಾರಿಗಳೇ ಕಾಲ್‌ಕಸಕ್ಕಿಂತಲೂ ಕೀಳಾಗಿ ನಡೆಸಿಕೊಂಡರೆ ನಾವು ಯಾರ ಬಳಿ ಹೋಗಬೇಕು?

ಇನ್ನು ಡ್ಯೂಟಿ ಮೇಲೆ ಚಾಲಕ ನಿರ್ವಾಹಕರಿಗೆ ಏನಾದರೂ ಆದರೆ ಯಾರು ಹೊಣೆ ಇರುತ್ತಾರೆ, ಆ ದೇವರನ್ನು ಬಿಟ್ಟರೆ. ಬೇರೆ ಯಾರು ಸಹಾಯಕ ಬರುವುದಿಲ್ಲ. ಅದರಲ್ಲೂ ಆಡಳಿತ ಅಧಿಕಾರಿಗಳು ಬಳಸುವ ಭಾಷೆ ನಮ್ಮನ್ನು ನೋಡುವ ದೃಷ್ಟಿಕೋನ ಜೀತ ಪದ್ಧತಿ ಇನ್ನೂ ಜೀವಂತವಾಗಿರುವುದಕ್ಕೆ ಸಾಕ್ಷೀಕರಿಸತ್ತಿದೆ.

ದೇಶಕ್ಕೆ ಸ್ವಾತಂತ್ರ್ಯ ಬಂದು 77 ವರ್ಷ ಕಳೆದರೂ ಸಹ ಈ ಕೆಎಸ್ಆರ್ಟಿಸಿನಲ್ಲಿ ತುಕ್ಕು ಹಿಡಿದಿರುವಂತಹ ಕಠಿಣ ಕಾನೂನುಗಳು ಜೀವಂತವಾಗಿ ನೌಕರರ ಸುಡುತ್ತಿರುವುದು ಮಾತ್ರ ವ್ಯವಸ್ಥೆಯನ್ನು ಅಣಕಿಸುತ್ತಿದೆ. ಇಂಥ ವ್ಯವಸ್ಥೆಯನ್ನು ನಾವು ಇಲ್ಲಿ ಕಾಣಬಹುದಾಗಿದೆ.

ಕರ್ತವ್ಯದಲ್ಲಿ ಅನಿರೀಕ್ಷಿತವಾಗಿ ಘಟಿಸುವ ಘಟನೆಗಳಿಗೆ ಚಾಲಕ ನಿರ್ವಾಹಕರೇ ಕಾರಣರೆಂಬಂತೆ ಬಿಂಬಿಸಿ ನಮ್ಮ ಮೇಲೆ ಇಲ್ಲ ಸಲ್ಲದ ಕಾನೂನುಗಳನ್ನು ಹೇಳಿ ಇಂಕ್ರಿಮೆಂಟ್‌ ಅಥವಾ ಇತರೆ ಇನ್ಯಾವುದೇ ಸೌಲಭ್ಯಗಳನ್ನು ಕೊಡದೆ ಬದಲಿಗೆ ಶಿಕ್ಷೆಗಳನ್ನು ವಿಧಿಸುತ್ತಾರೆ.

ಮಾನವ ಸಂಪನ್ಮೂಲಗಳಿಂದ ನಡೆಯಬಹುದಾದಂತಹ ಈ ಕೆಲಸಕ್ಕೆ ನಾವು ಸಹ ಸಂಬಂಧಿಕರು ಅಣ್ಣತಮ್ಮಂದಿರ ಸಾಮಾಜಿಕ ಸಂಬಂಧವನ್ನು ನಾವು ಹೊಂದಿರುತ್ತೇವೆ. ಹೀಗೇನೇ ಜೀವನ ನಡೆಸುವ ಸಂದರ್ಭದಲ್ಲಿ ಕಷ್ಟ ಸುಖಗಳಿಗೆ ಹೋಗಲೇಬೇಕಾಗುತ್ತದೆ. ಸಾವು ನೋವುಗಳಲ್ಲಿ ಭಾಗವಹಿಸಬೇಕಾಗುತ್ತದೆ. ಇಂತಹ ಸಂದರ್ಭಗಳಿಗೂ ನಮಗೆ ಅನ್ವಯಿಸಬಹುದಾದಂತ ರಜೆ ಪಡೆಯಲು ಕೂಡ ನಾವು ಅಶಕ್ತರಾಗಿದ್ದು ಅಧಿಕಾರಿಗಳ ಕಾಲಿಗೆ ಬಿದ್ದು ಕಾಡಿಬೇಡಿ ಪಡೆಯಬೇಕಾದ ಸ್ಥಿತಿ ನಿರ್ಮಾಣವಾಗಿದೆ.

ಅದನ್ನು ನಾವು ಮಾಡಿಲ್ಲ ಎಂದರೆ ಅಧಿಕಾರಿಗಳು ಗೈರು ಹಾಜರಿ ಎಂಬ ಪ್ರಕರಣವನ್ನು ದಾಖಲಿಸಿ ಇಲ್ಲಸಲ್ಲದ ನೋವುಗಳನ್ನು ಕೊಡುತ್ತಾರೆ. ಹೃದಯ ಸಂಬಂಧಿ ಇತರೆ ಕಾಯಿಲೆಗಳಿಗೆ ಖುದ್ದು ನಾವೇ ನಿರ್ವಹಿಸಬೇಕಾದಂತಹ ಕೆಲವು ಸಮಸ್ಯೆಗಳಿಗ ನಿವಾರಣೆಗಾಗಿ ನಾವು ರಜೆ ಕೇಳಿದರೆ ಇಲ್ಲಸಲ್ಲದ ನೆಪವನ್ನು ಹೇಳಿ ಕಾನೂನುಗಳನ್ನು ಮುಂದೆ ತಂದು ನಮಗೆ ಗೈರು ಹಾಜರಿ ವರದಿ ನೀಡುತ್ತಾರೆ.

ಇನ್ನು ಇದಕ್ಕೆ ಸಂಬಂಧಿಸಿದ ಅಗತ್ಯ ದಾಖಲಾತಿ ವೈದ್ಯಕೀಯ ದೃಢೀಕರಣ ಪತ್ರಗಳನ್ನು ಕೊಟ್ಟರೂ ಸಹ “ನೀವು ನೀಡಿದ ಉತ್ತರವು ಸಮಂಜಸವಾಗಿರುವುದಿಲ್ಲವೆಂದು ದಂಡವನ್ನು ಹಾಕುವ ಜತೆಗೆ ಇಂಕ್ರಿಮೆಂಟುಗಳನ್ನು ತೆಗೆಯುತ್ತಾರೆ. ಯಾವ ವಕೀಲಿ ಗಿರಿ ಓದಿರ್ತಕಂತ ಮಹಾನೀಯ ಸಿ ಅಂಡ್ ಆರ್  ರೂಲ್ಸ್ ಗಳನ್ನು ಮಾಡಿರುತ್ತಾರೋ ಆ ದೇವರಿಗೆ ಬಲ್ಲ…

ಅದರಲ್ಲೂ ಕೇಂದ್ರ ಕಚೇರಿ ಮತ್ತು ವಿಭಾಗಿಯ ಕಚೇರಿಗಳಲ್ಲಿ ಕೆಲಸ ಮಾಡುವ ಅಧಿಕಾರಿ ವರ್ಗದವರಂತೂ ಸಹ ನಮ್ಮ ಚಾಲಕ ನಿರ್ವಾಹಕರನ್ನು ಕಾಲಡಿಯ  ಕಸಕಿಂತಲೂ ಕೀಳಾಗಿ ನೋಡುತ್ತಾರೆ. ಅದರಲ್ಲಿ ಕೆಲಸ ಮಾಡುವ ಅಧಿಕಾರಿ ವರ್ಗದವರಂತೂ ಮುಕ್ಕಾಲು ಭಾಗ ಅನುಕಂಪದ ಆಧಾರದಲ್ಲಿ ಕೆಲಸ ಪಡೆದಿರುವಂತಹ ನಮ್ಮ ಸಹೋದರ ಮಿತ್ರರಾಗಿದ್ದು ಅವರ ನಡೆ ನುಡಿಗಳನ್ನು ಗಮನಿಸಿದರೆ ಖಂಡಿತವಾಗಿಯೂ ಬಹಳ ನೋವಾಗುತ್ತದೆ.

ನಾನಂತೂ ಕುದ್ದು ನೋಡಿ ಅನುಭವಿಸಿದ್ದೇನೆ. ಯಾವ ಶತ್ರುಗಳಿಗೂ ಸಹ ಇಂತಹ ದುಸ್ಥಿತಿ ಬರಬಾರದು! ಇದರ ಬಗ್ಗೆ ಒಂದು ದೊಡ್ಡ ಕಥೆಯನ್ನೇ ನಾನು ಬರೆಯಲು ಸಿದ್ಧನಿದ್ದೇನೆ..ಅಷ್ಟೊಂದು ನೋವನ್ನ ಅನುಭವಿಸಿದ್ದೇನೆ ಈ ಸಂಸ್ಥೆಗೆ ಸೇರಿದ ನಂತರ ಉದ್ಯೋಗಂ ಪುರುಷ ಲಕ್ಷಣಂ ಎನ್ನುವಂತೆ ಕರ್ತವ್ಯ ನಿರ್ವಹಿಸಿಕೊಂಡು ಮುಂದುವರಿಯುತ್ತಿದ್ದೇನೆ ನನ್ನ ಸಹೋದ್ಯೋಗಿ ಬಂಧುಗಳೇ ಇದಕ್ಕೆ ಕಾಲವೇ ಉತ್ತರಿಸಬೇಕು ಎಂದು ನೌಕರರೊಬ್ಬರು ನೊಂದು ಬರೆದಿದ್ದಾರೆ.