ವಿಜಯಪಥ ಸಮಗ್ರ ಸುದ್ದಿ
ಪಿರಿಯಾಪಟ್ಟಣ: ವಿಶ್ವಾದ್ಯಂತ ಕೊರೊನಾ ಎರಡನೇ ಅಲೆ ರೌದ್ರ ನರ್ತನವಾಡುತ್ತಿದೆ. ಇಂತಹ ವಿಷಮ ಪರಿಸ್ಥಿತಿಯಲ್ಲಿ ರಾಜ್ಯ ಸರ್ಕಾರ ಎರಡು ವಾರಗಳ ಕಟ್ಟುನಿಟ್ಟಿನ ಕ್ರಮ ಜರುಗಿಸಿದೆ. ಇದರಿಂದ ರಾಜ್ಯದ ಮಧ್ಯಮ ವರ್ಗದ ಜನತೆಯ ಜೀವ ಹಾಗೂ ಜೀವನ ನಿರ್ವಹಣೆಯ ಚಿಂತಗೀಡಗಿದ್ದು ಇಂತಹ ಸಂದಿಗ್ದ ಪರಿಸ್ಥಿತಿಯಲ್ಲಿ ಸರ್ಕಾರ ವಿಶೇಷ ಪ್ಯಾಕೇಜ್ ಘೋಷಣೆ ಮಾಡಬೇಕು ಎಂದು ಕಾರ್ಮಿಕ ಮುಖಂಡ ಪಿ.ಟಿ.ಲಕ್ಷ್ಮೀನಾರಾಯಣ್ ಒತ್ತಾಯಿಸಿದ್ದಾರೆ.
ಜೀವನಕ್ಕಿಂತ ಜೀವ ಮುಖ್ಯವಾದ ಕಾರಣ ಸರ್ಕಾರದ ನಿಲುವು ಉತ್ತಮವಾಗಿದ್ದರೂ, ಬಡವರ ಜೀವನ ನಿರ್ವಾಹಣೆಗೆ ಪರಿಹಾರ ಮಾರ್ಗೋಪಾಯಗಳನ್ನು ಒದಗಿಸುವುದು ಮುಖ್ಯವಾಗಿದೆ.
ಪುಟ್ಪಾತ್ ಹೊಟೇಲ್ ಗಳನ್ನು ನಡೆಸುವ ಬಡ ಕಾರ್ಮಿಕರು, ದಿನಗೂಲಿ ನೌಕರರು, ಚಿಕ್ಕಪುಟ್ಟ ಖಾಸಗಿ ಸಂಸ್ಥೆಗಳ ನೌಕರರು, ರಸ್ತೆ ಬದಿ ವ್ಯಾಪಾರಿಗಳು ಸೇರಿದಂತೆ ವಿವಿಧ ಚಿಕ್ಕಪುಟ್ಟ ಕೆಲಸ ಕಾರ್ಯಗಳನ್ನು ನಂಬಿದವರು. ಇತ್ತ ಕೆಲಸವು ಇಲ್ಲದೆ, ನಷ್ಟ ಅನುಭವಿಸಿ ಬೀದಿಗೆ ಬಂದಂತಾಗಿದೆ.
ಅವರ ದೈನಂದಿನ ಜೀವನ ನಿರ್ವಹಣೆಗೆ ನಿತ್ಯದ ಕಾಯಕದ ಅವಲಂಬಿಸಿದ್ದು, ಉಳಿತಾಯವೆಂಬುದು ಮರಿಚಿಕೆಯೇ ಸರಿ. ಇದ್ದುದ್ದರಲ್ಲಿ ಹೇಗೋ ಜೀವನ ಸಾಗಿಸುತ್ತಿರುತ್ತಾರೆ. ಇವರು ಮತ್ತೊಮ್ಮೆ ವೃತ್ತಿ ಆರಂಭಿಸಬೇಕಾದರೆ ಸಾಲ ಮಾಡಿಯೇ ಮುಂದುವರಿಯಬೇಕು. ಇಂತಹ ಆರ್ಥಿಕ ದುಸ್ಥಿತಿಯ ಕಾರ್ಮಿಕರಿಗೆ ಸರ್ಕಾರ ವಿಶೇಷ ಪ್ಯಾಕೇಜ್ ಘೋಷಣೆ ಮಾಡುವ ಅನಿವಾರ್ಯತೆ ಇದೆ ಎಂದು ಹೇಳಿದ್ದಾರೆ.
ಕುಲಕಸುಬು ಮಾಡಿಕೊಂಡು ಹಾಗೂ ಅಸಂಘಟಿತ ವಲಯದಲ್ಲಿ ಕೋಟ್ಯಂತರ ಜನತೆ ತತ್ತರಿಸಿದ್ದು, ಇವರ ನೆರವಿಗೆ ಸರ್ಕಾರಗಳು ಶೀಘ್ರ ಧಾವಿಸಬೇಕು. ಕಳೆದ ವರ್ಷದ ಲಾಕ್‌ಡೌನ್‌ನಿಂದ ಸಾಕಷ್ಟ ಉದ್ಯಮಗಳ ಕಾರ್ಮಿಕರ ಜೀವನ ಚೇತರಿಕೆ ಕಂಡಿಲ್ಲ, ಕಷ್ಟದಲ್ಲೇ ಜೀವನ ನಿರ್ವಾಹಣೆ ಮಾಡುತ್ತಿದ್ದಾರೆ.
