ಪುತ್ತೂರು: ಪ್ರತ್ಯೇಕ ಎರಡು ಸ್ಥಳಗಳಲ್ಲಿ ಸಿಕ್ಕಿದ ಹೆಬ್ಬಾವಿನ ಮೊಟ್ಟೆಗಳನ್ನು ರಕ್ಷಣೆ ಮಾಡಿದ ಬಳಿಕ ಅವುಗಳಿಗೆ ಕೃತಕ ಕಾವು ನೀಡಿ ಎಲ್ಲಾ ಮರಿಗಳನ್ನು ರಕ್ಷಣೆ ಮಾಡಿದ ಉರಗ ಪ್ರಿಯ ಬನ್ನೂರಿನ ತೇಜಸ್ ಅರಣ್ಯ ಅಧಿಕಾರಿಗಳ ಉಪಸ್ಥಿತಿಯಲ್ಲಿ ಮೊನ್ನೆ (ಜೂ.27) ಅರಣ್ಯಕ್ಕೆ ಬಿಟ್ಟಿದ್ದಾರೆ.
ಸವಣೂರಿನಲ್ಲಿ 16 ಹೆಬ್ಬಾವಿನ ಮೊಟ್ಟೆಗಳು ಮತ್ತು ಲೋಕೋಪಯೋಗಿ ಇಲಾಖೆ ಸಹಾಯಕ ಅಭಿಯಂತರ ಪ್ರಮೋದ್ ಅವರ ಮಾಹಿತಿಯಂತೆ ಪುತ್ತೂರಿನ ಪರಿಸರದಲ್ಲಿ 22 ಹೆಬ್ಬಾವಿನ ಮೊಟ್ಟೆಗಳನ್ನು ಬನ್ನೂರು ಕರ್ಮಲ ನಿವಾಸಿ ತೇಜಸ್ ಅವರು ಫಾರೆಸ್ಟ್ ಗಾರ್ಡ್ ಸತ್ಯ ಡಿ.ಜೆ. ಮತ್ತು ಪ್ರೀತಮ್ ಜೊತೆಯಲ್ಲಿ ಒಟ್ಟು 38 ಮೊಟ್ಟೆಗಳನ್ನು ರಕ್ಷಣೆ ಮಾಡಿದ್ದರು.
ಆ 38 ಮೊಟ್ಟೆಗಳಿಗೂ ಕೃತಕ ಕಾವು ಕೊಡುವ ಮೂಲಕ 38 ಮರಿಗಳು ಮೊಟ್ಟೆಗಳಿಂದ ಹೊರ ಬಂದಿವೆ. ಅವುಗಳನ್ನು ರಕ್ಷಣೆ ಮಾಡಿ ಜೂ. 27ರಂದು ಸಂಜೆ ಅರಣ್ಯ ಇಲಾಖೆ ಅಧಿಕಾರಿಗಳ ಜೊತೆಗೆ ರಕ್ಷಿತಾರಣ್ಯಕ್ಕೆ ಬಿಟ್ಟಿದ್ದಾರೆ.
ಉಪ ವಲಯ ಅರಣ್ಯ ಅಧಿಕಾರಿ ಶಿವಾನಂದ ಆಚಾರ್ಯ, ಶೇಖರ್, ವಲಯ ಅರಣ್ಯ ಅಧಿಕಾರಿಗಳ ಮಾರ್ಗ ದರ್ಶನದಲ್ಲಿ ಪುನೀತ್ ಮತ್ತು ತೇಜಸ್ ಮರಿಗಳನ್ನು ಅರಣ್ಯಕ್ಕೆ ಬಿಟ್ಟರು.
