ನ್ಯೂಡೆಲ್ಲಿ: ಕ್ರಿಕೆಟ್‌ ದೇವರು ಸಚಿನ್‌ ತೆಂಡೂಲ್ಕರ್‌ ಅವರಿಗೆ ಬೆಳ್ಳಿ ಪದಕ ತೋರಿಸಿ ಅವರೊಟ್ಟಿಗೆ ಸಂಭ್ರಮಾಚರಣೆ ಮಾಡಬೇಕು ಎಂಬ ಆಸೆ ಇದೆ ಎಂದು ಟೋಕಿಯೋ ಪ್ಯಾರಾಲಿಂಪಿಕ್ಸ್‌ನಲ್ಲಿ ಭಾರತಕ್ಕೆ ಐತಿಹಾಸಿಕ ಬೆಳ್ಳಿ ಪದಕ ತಂದುಕೊಟ್ಟ ಭಾವಿನಾ ಪಟೇಲ್‌ ತಮ್ಮ ಮನದಾಸೆಯನ್ನು ಹೇಳಿಕೊಂಡಿದ್ದಾರೆ.
ಪ್ಯಾರಾ ಟೇಬಲ್‌ ಟೆನ್ನಿಸ್‌ನಲ್ಲಿ ಬೆಳ್ಳಿ ಪದಕ ಜಯಿಸಿದ ಭಾವಿನಾ ಅವರನ್ನು ಎನ್‌ಡಿಟಿವಿ ವರದಿಗಾರರು ಸಂದರ್ಶಿಸಿದರು. ಪದಕ ಗೆದ್ದ ಖುಷಿಯನ್ನು ಹಂಚಿಕೊಂಡ ಸಂದರ್ಭದಲ್ಲಿ, ʻಸಚಿವ ತೆಂಡೂಲ್ಕರ್‌ ಅವರನ್ನು ಹತ್ತಿರದಿಂದ ಮಾತನಾಡಿಸಬೇಕು. ಅವರಿಗೆ ಪದಕ ತೋರಿಸಬೇಕುʼ ಎಂಬ ಆಸೆಯನ್ನು ತೋಡಿಕೊಂಡಿದ್ದಾರೆ.
ಪದಕ ಗೆಲ್ಲುವ ಭರವಸೆ ಇಟ್ಟುಕೊಂಡು ಈ ಬಾರಿ ಹೆಚ್ಚಿನ ಪರಿಶ್ರಮ ಹಾಕಿ ತರಬೇತಿ ಪಡೆದೆ. ಪ್ಯಾರಾಲಿಂಪಿಕ್ಸ್‌ಗೆ ನನ್ನೊಟ್ಟಿಗೆ ಕೋಚ್‌ ಬರಲಿಲ್ಲ. ಆದರೆ, ದಿನದ 24ಗಂಟೆಯೂ ಅವರು ನನಗೆ ಸೂಕ್ತ ಮಾರ್ಗದರ್ಶನ ನೀಡಿದರು. ವಿಡಿಯೋ ಕರೆ ಮಾಡಿ ಸಾಕಷ್ಟು ಸಲಹೆಗಳನ್ನು ನೀಡಿದರು. ಪದಕದ ಗೆಲುವಿಗೆ ಅವರ ಕೊಡುಗೆಯೂ ಇದೆ ಎಂದು ಕೃತಜ್ಞತೆ ಸಲ್ಲಿಸಿದರು.
ವಿಶ್ವದಲ್ಲೇ ಬಹಳ ವೇಗವಾಗಿ ಆಡುವ 2ನೇ ಕ್ರೀಡೆ ಟೇಬಲ್‌ ಟೆನ್ನಿಸ್. ಈ ಆಟ ಆಡಲು ಮನಸ್ಸನ್ನು ಕೇಂದ್ರೀಕರಿಸುವುದು ತುಂಬಾ ಮುಖ್ಯ. ಮನಸ್ಸನ್ನು ಕೇಂದ್ರೀಕರಿಸಲು ಹೆಚ್ಚಾಗಿ ಧಾನ್ಯ ಮಾಡುತ್ತೇನೆ. ಧ್ಯಾನವೇ ನನ್ನ ಯಶಸ್ಸಿನ ಗುಟ್ಟು ಎಂದು ತಿಳಿಸಿದರು.
