ಪಿರಿಯಾಪಟ್ಟಣ: ತಾಲೂಕಿನ ದಂಡಾಧಿಕಾರಿ ಕೆ.ಚಂದ್ರಮೌಳಿ, ರೆವೆನ್ಯೂ ಇನ್ಸ್ ಪೆಕ್ಟರ್, ಸರ್ವೇಯರ್, ಪೊಲೀಸ್ ಇಲಾಖೆ ಹಾಗೂ ಗ್ರಾಮ ಲೆಕ್ಕಾಧಿಕಾರಿಗಳು ನ್ಯಾಯಾಲಯದ ಆದೇಶ ಉಲ್ಲಂಘನೆ ಮಾಡಿ ಅಸಹಾಯಕ ರೈತರ ಹಾಗೂ ಬಡ ಕುಟುಂಬಗಳ ಮೇಲೆ ದೌರ್ಜನ್ಯ ಮೆರೆದಿದ್ದಾರೆ ಎಂದು ಆಮ್ ಆದ್ಮಿ ಪಕ್ಷದ ಹಿಂದುಳಿದ ವರ್ಗಗಳ ರಾಜ್ಯಾಧ್ಯಕ್ಷ ರಾಜಶೇಖರ್ ದೊಡ್ಡಣ್ಣ ಮೌರ್ಯ ಆರೋಪಿಸಿದರು.
ಈ ಬಗ್ಗೆ ಪಟ್ಟಣದಲ್ಲಿ ಮಾತನಾಡಿದ ಅವರು ತಾಲೂಕಿನ ಬೆಮ್ಮತ್ತಿ ಗ್ರಾಮದ ಸರ್ವೆ ನಂಬರ್ 126 ರಲ್ಲಿ ಬೈರಾ, ಮತ್ತು ಮಹದೇವ್ ಎಂಬುವ ರೈತರು ಉಳುಮೆ ಮಾಡಿಕೊಡು ಬರುತ್ತಿದ್ದಾರೆ ಹಾಗೂ ಅನೇಕ ಅಸಸ್ಮೆಂಟ್ ಗಳಲ್ಲಿ ಬಡವರು ಅಸಹಾಯಕರು ಮನೆ ನಿರ್ಮಿಸಿಕೊಂಡು ವಾಸಿಸುತ್ತ ಬರುತ್ತಿದ್ದು, ಇದು ಹಿಡುವಳಿ ಭೂಮಿಯಾದ ಕಾರಣ ಮಾಲೀಕತ್ವದ ವಿಚಾರಕ್ಕೆ ಸಂಬಂಧಿಸಿದಂತೆ ನ್ಯಾಯಾಲಯದಲ್ಲಿ ವ್ಯಾಜ್ಯ ನಡೆಯುತ್ತಿರುವ ಸಂದರ್ಭದಲ್ಲಿ ಭೂಮಾಫಿಯಾ ಹಿನ್ನೆಲೆಯುಳ್ಳ ಬಲಾಢ್ಯರು ಸ್ಥಳೀಯ ರಾಜಕೀಯ ಹಾಗೂ ಅಧಿಕಾರಿಗಳ ಜೊತೆಗೂಡಿ ಅಕ್ರಮ ಖಾತೆ ಮಾಡಿಸಿಕೊಂಡು ಸ್ಥಳೀಯ ರೈತರು ಹಾಗೂ ಬಡ ಕುಟುಂಬಗಳ ಮೇಲೆ ದೌರ್ಜನ್ಯ ಎಸಗಿದ್ದಾರೆ ಎಂದು ಆರೋಪಿಸಿದರು.
ಇನ್ನು ಇರುವ ಮನೆಗಳನ್ನು ನೆಲಸಮ ಮಾಡಿ, ಭೂಮಿಯ ವ್ಯಾಜ್ಯ ನ್ಯಾಯಾಲಯದಲ್ಲಿರುವಾಗ ತಹಸೀಲ್ದಾರ್ ಕೆ.ಚಂದ್ರಮೌಳಿ ಹಾಗೂ ಪೊಲೀಸ್ ಇಲಾಖೆಯವರು ರೈತರ ಮೇಲೆ ದಬ್ಬಾಳಿಕೆ ನಡೆಸಿ ಅವರನ್ನು ಭೂಮಿಯಿಂದ ಹೊರದಬ್ಬಿ ದೌರ್ಜನ್ಯ ಮೆರೆದಿದ್ದಾರೆ.
ಈ ಅನ್ಯಾಯದ ವಿರುದ್ಧ ಪ್ರತಿಭಟನೆ ನಡೆಸಲು ಪೊಲೀಸನ್ನು ಅನುಮತಿ ಕೇಳಿದಾಗ ಪ್ರತಿಭಟನಾ ಮೆರವಣಿಗೆಗೆ ಅವಕಾಶ ನೀಡುವುದಿಲ್ಲ, ಮಿತಿಮೀರಿ ಪ್ರತಿಭಟನೆಗೆ ಮುಂದಾದರೆ ಜೈಲುಪಾಲಾಗುವ ಬೆದರಿಕೆ ಒಡ್ಡುತ್ತಿದ್ದಾರೆ ಎಂದು ಆರೋಪಿಸಿದ ಅವರು, ನ.4ರ ಶುಕ್ರವಾರ ಪಟ್ಟಣದ ಬಿ.ಎಂ.ರಸ್ತೆಯ ಉಪ್ಪಾರಗೇರಿಯಿಂದ ತಾಲೂಕು ಆಡಳಿತ ಭವನದಲ್ಲಿರುವ ತಹಸೀಲ್ದಾರ್ ಕಚೇರಿಯ ವರೆಗೆ ರೈತರ ಹಾಗೂ ಅಸಹಾಯಕರ ಮೆಲೆ ದೌರ್ಜ್ಯನ್ಯ ಮೆರೆಯುತ್ತಿರುವ ತಾಲೂಕು ಆಡಳಿತ ಹಾಗೂ ಪೊಲೀಸ್ ಅಧಿಕಾರಿಗಳ ವಿರುದ್ಧ ಪ್ರತಿಭಟನೆ ನಡೆಸುವುದಾಗಿ ತಿಳಿಸಿದ್ದಾರೆ.
ಈ ಸಂದರ್ಭದಲ್ಲಿ ರೈತರಾದ ನಾಗೇಂದ್ರ, ಭೈರಯ್ಯ, ಸುಶೀಲಾ, ಶೃತಿ, ರೇಣುಕುಮಾರ್, ಗೋವಿಂದರಾಜ್, ತಿಮ್ಮೇಗೌಡ, ಬಸವರಾಜು, ಲಕ್ಷ್ಮಿ, ಜಯಮ್ಮ, ಜ್ಯೋತಿ, ರೇಣುಕಾ, ಹೊನ್ನಮ್ಮ ಸೇರಿದಂತೆ ಮತ್ತಿತರರು ಉಪಸ್ಥಿತರಿದ್ದರು.
