ವಿಜಯಪಥ ಸಮಗ್ರ ಸುದ್ದಿ
ಕೊಳ್ಳೇಗಾಲ: ಗಂಡ ಮತ್ತು ಆತ್ತೆಯ ಮೇಲೆ ಹಲ್ಲೆ ನಡೆಸುತ್ತಿದ್ದವರು ತಡೆಯಲು ಹೋದ ಗರ್ಭಿಣಿ ಹೊಟ್ಟೆಗೆ ಒದ್ದು ನಾಲ್ಕು ತಿಂಗಳ ಭ್ರೂಣ ಹತ್ಯೆ ಮಾಡಿರುವ ಘಟನೆ ತಾಲೂಕಿನ ಉತ್ತಂಬಳ್ಳಿಯಲ್ಲಿ ನಡೆದಿದೆ.
ಗ್ರಾಮದ ಸೋಮು ಎಂಬಾತನ ಹೆಂಡತಿ ಮಾದೇವಿ ಎಂಬುವರಿಗೆ ಗರ್ಭಪಾತವಾಗಿರುವುದು.
ಸೋಮು ಸ್ನೇಹಿತರೊಡನೆ ಜಿಮ್‌ ಮಾಡುತ್ತಿದ್ದಾಗ ನನ್ನ ಹೆಂಡತಿಯನ್ನು ನೋಡುತ್ತಿದ್ದ ಎಂದು ಅದೇ ಗ್ರಾಮದ ಬೆಳೆ ಮಹೇಶ ಎಂಬಾತ ತನ್ನ ಸಹೋದರ ಶಿವಣ್ಣ ಹಾಗೂ ಗೋವಿಂದ ಎಂಬುವರ ಜೊತೆಗೂಡಿ ಅವಾಚ್ಯ ಶಬ್ದಗಳಿಂದ ಬೈದು, ಸೋಮನ ಮೇಲೆ ಹಲ್ಲೆ ಮಾಡುವಾಗ ಅದನ್ನು ಬಿಡಿಸಲು ಹೋದ ಆತನ ತಾಯಿ ಮಲ್ಲಮ್ಮಳ ಮೇಲೂ ಹಲ್ಲೆ ಮಾಡಿದ್ದಾರೆ.
ಗರ್ಭಿಣಿ ಮಾದೇವಿ ಗಂಡ ಸೋಮು, ಆತ್ತೆ ಮಲ್ಲಮ್ಮಳ ಮೇಲೆ ಹಲ್ಲೆ ನಡೆಯುತ್ತಿರುವುದನ್ನು ನೋಡಿ, ತಡೆಯಲು ಹೋಗಿದ್ದಾರೆ. ವೇಳೆ ಮಾದೇವಿ ಹೊಟ್ಟೆಯ ಮೇಲೆ ಮಹೇಶ ಒದ್ದಿದ್ದಾನೆ. ಇದರಿಂದ ತೀವ್ರ ರಕ್ತಸ್ರಾವವಾಗಿ ಹೊಟ್ಟೆ ನೋವಿನಿಂದ ನರಳಾಡುತ್ತಿದ್ದಾಗ ಆಕೆಯನ್ನು ಆಸ್ಪತ್ರೆಗೆ ಕರೆದೊಯ್ದು ದಾಖಲಿಸಲಾಗಿದೆ. ಈ ಅಘಾತದಿಂದ ಮಹಿಳೆಗೆ ಗರ್ಭಪಾತವಾಗಿದೆ.
ಈ ಸಂಬಂಧ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.
