ರಾಸಲೀಲೆ ಸಿಡಿ ಪ್ರಕರಣದ ಸಂತ್ರಸ್ತೆ ಪರ ವಕೀಲರಿಗೆ ಬಂತು ಕೊಲೆ ಬೆದರಿಕೆ ಕರೆ

ವಿಜಯಪಥ ಸಮಗ್ರ ಸುದ್ದಿ
ಬೆಂಗಳೂರು: ಮಾಜಿ ಸಚಿವ ರಮೇಶ್‌ ಜಾರಕಿಹೊಳಿಗೆ ಸಂಬಂಧಿಸಿದ್ದು ಎನ್ನಲಾದ ಸಿಡಿ ಪ್ರಕರಣದ ಸಂತ್ರಸ್ತ ಯುವತಿ ಪರ ವಕೀಲರಿಗೆ ಕೊಲೆ ಬೆದರಿಕೆ ಕರೆಗಳು ಬರುತ್ತಿವೆ ಎಂದು ವಕಾಲತ್ತು ವಹಿಸಿರುವ ವಕೀಲ ಜಗದೀಶ್‌ ಅವರೆ ಹೇಳಿದ್ದಾರೆ.

ನನಗೆ ಕೊಲೆ ಬೆದರಿಕೆ ಕರೆಗಳು ಬರುತ್ತಿದ್ದು, ಅವುಗಳಿಗೆ ನಾನು ಬಗ್ಗೋದಿಲ್ಲ ಎಂದು ಫೇಸ್‌ಬುಕ್ ಲೈವ್‌ಗೆ ಬಂದು ತಿಳಿಸಿದ್ದಾರೆ.

ನಾವು ಸಂತ್ರಸ್ತೆ ಪರವಾಗಿ ಕೆಲಸ ಮಾಡಿ ಆಕೆಗೆ ನ್ಯಾಯ ಕೊಡಿಸುವ ಪ್ರಯತ್ನ ಮಾಡುತ್ತಿದ್ದೇವೆ. ನನ್ನ ಸಹದ್ಯೋಗಿ ಮಂಜುನಾಥ್ ಅವರ ವಾಹನವನ್ನು ಕೆಲವರು ಹಿಂಬಾಲಿಸಿದ್ದಾರೆ. ನಮಗೆ ಇಷ್ಟೊಂದು ಬೆದರಿಕೆ ಇರುವಾಗ ಸಂತ್ರಸ್ತೆಯ ಸ್ಥಿತಿ ಹೇಗಿರಬಹುದು? ಈ ಪ್ರಕರಣದಲ್ಲಿ ನಾವು ನಾಶವಾದರೂ ಸಂತ್ರಸ್ತೆಗೆ ನ್ಯಾಯ ಕೊಡಿಸದೆ ಬಿಡುವುದಿಲ್ಲ ಎಂದಿದ್ದಾರೆ.

ರಮೇಶ್ ಜಾರಕಿಹೊಳಿ ತುಂಬಾ ಪ್ರಭಾವಿ ವ್ಯಕ್ತಿ. ಅವರ ಸಿಡಿ ಪ್ರಕರಣ ಕೈಗೆತ್ತಿಕೊಂಡ ನಂತರ ಹಲವಾರು ಪ್ರಶಂಸೆ ಹಾಗೂ ಬೆದರಿಕೆ ಕರೆಗಳು ಬರಲು ಪ್ರಾರಂಭವಾಗಿವೆ. ಮಂಗಳೂರು ಅಥವಾ ಚಿಕ್ಕಮಗಳೂರು ವ್ಯಾಪ್ತಿಯಿಂದ ಕರೆ ಮಾಡಿದ ಯುವಕನೊಬ್ಬ ನನ್ನ ತಲೆ ಕಡಿಯುವ ಬೆದರಿಕೆ ಒಡ್ಡಿದ್ದಾನೆ. ಈ ರೀತಿಯ ಬೆದರಿಕೆ ಕರೆಗಳಿಗೆ ಹೆದರುವ ಪ್ರಶ್ನೆಯೇ ಇಲ್ಲ ಎಂದು ತಿಳಿಸಿದ್ದಾರೆ.

ನಮಗೆ ಬರುತ್ತಿರುವ ಈ ಪ್ರಾಣ ಬೆದರಿಕೆಗಳನ್ನು ಸಂಬಾಳಿಸಿಕೊಳ್ಳುವಷ್ಟು ಸಾಮರ್ಥ್ಯ ಇದೆ. ಆದರೆ, ಸಂತ್ರಸ್ತೆ ನ್ಯಾಯಾಲಯ, ಪೊಲೀಸರ ಮುಂದೆ ಹಾಜರಾದರೆ ರಕ್ಷಣೆ ದೊರೆಯುವ ನಂಬಿಕೆ ಇಲ್ಲ. ಅಷ್ಟರಮಟ್ಟಿಗೆ ಕಾನೂನು ಸುವ್ಯವಸ್ಥೆ ಹದಗೆಟ್ಟಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.