ಪಿರಿಯಾಪಟ್ಟಣ: ಖಾತೆ ಬದಲಾವಣೆ ತಡೆ ಹಿಡಿಯುವಂತೆ ಆಗ್ರಹಿಸಿ ತಾಲೂಕಿನ ಕಂಪಲಾಪುರದ ವಿಷ್ಣು ಟೆಕ್ಸ್ ಟೈಲ್ಸ್ ನ ಕಾರ್ಮಿಕರು ಪ್ರತಿಭಟನೆ ನಡೆಸಿ ಪ್ರಭಾರ ತಹಸೀಲ್ದಾರ್ ಅವರಿಗೆ ಮನವಿ ಸಲ್ಲಿಸಿದರು.
ಪ್ರತಿಭಟನೆ ನೇತೃತ್ವ ವಹಿಸಿದ್ದ ವಕೀಲ ಪಿ.ಟಿ.ಕಿರಣ್ ಕುಮಾರ್ ಮಾತನಾಡಿ, ಕಳೆದ 20 ವರ್ಷಗಳಿಂದಲೂ ಕಾರ್ಮಿಕರು ಕಾರ್ಖಾನೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದು, ಇತ್ತೀಚೆಗೆ 7 ವರ್ಷಗಳ ಹಿಂದೆ ಕಾರ್ಮಿಕರನ್ನು ಅಮಾನತುಗೊಳಿಸಿದ್ದು, ಮೈಸೂರಿನ ಕಾರ್ಮಿಕ ನ್ಯಾಯಾಲಯದಲ್ಲಿ ಕಾರ್ಖಾನೆಯ ಆಡಳಿತ ಮಂಡಳಿಯವರ ವಿರುದ್ದ ಪ್ರಕರಣ ದಾಖಲಿಸಿದ್ದು, ಈ ನ್ಯಾಯಾಲಯವು ಕಾರ್ಮಿಕರನ್ನು ಕೆಲಸಕ್ಕೆ ಮರು ನೇಮಕ ಮತ್ತು ಹಿಂದಿನ ಸಂಬಳ ನೀಡುವಂತೆಯೂ ಆಡಳಿತ ಮಂಡಳಿಗೆ ನಿರ್ದೆಶನ ನೀಡಿದೆ.
ಆದರೆ ಈ ಆದೇಶವನ್ನು ತಿರಸ್ಕರಿಸಿದ ಪರಿಣಾಮ ಕರ್ನಾಟಕ ಸರ್ಕಾರದ ಕಾರ್ಮಿಕ ಆಯುಕ್ತರಿಗೆ ಆಡಳಿತ ಮಂಡಳಿಯ ವಿರುದ್ದ ಪ್ರಕರಣ ದಾಖಲಿಸಲು ಅನುಮತಿ ಕೋರಿರುತ್ತೇವೆ. ಇದರಿಂದ ಕಾರ್ಮಿಕ ಆಯುಕ್ತರ ಅನುಮತಿಯೊಂದಿಗೆ ಪಿರಿಯಾಪಟ್ಟಣದ ಸಿವಿಲ್ ಮತ್ತು ಜೆಎಂಎಫ್‌ಸಿ ನ್ಯಾಯಾಲಯದಲ್ಲಿ ದಾವೆಯನ್ನು ದಾಖಲಿಸಲಾಗಿದೆ. ಹೀಗಿದ್ದರೂ ನ್ಯಾಯಾಲಯದ ಆದೇಶವನ್ನು ಧಿಕ್ಕರಿಸಿ ಕಾರ್ಖಾನೆಯ ಚರ ಮತ್ತು ಸ್ಥಿರ ಆಸ್ತಿಯನ್ನು ಚೆನ್ನೈ ಮೂಲದ ಧನ್ಯಕುಮಾರ್ ಎಂಬುವವರಿಗೆ ಮಾರಾಟ ಮಾಡಿದ್ದಾರೆ.
ಹೀಗಾಗಿ ಈ ಆಸ್ತಿಗಳ ಖಾತೆ ಬದಲಾವಣೆಗಾಗಿ ತಮ್ಮ ಇಲಾಖೆಗೆ ಅರ್ಜಿ ಸಲ್ಲಿಸಿದ್ದಾರೆ ಆದ್ದರಿಂದ ನ್ಯಾಯಾಲಯದ ಆದೇಶವನ್ನು ಹಾಗೂ ಕಾರ್ಮಿಕರಿಗೆ ವಂಚಿಸಿರುವ ಆಡಳಿತ ಮಂಡಳಿಯವರ ಖಾತೆ ಬದಲಾವಣೆ ಅರ್ಜಿಯನ್ನು ವಜಾಗೊಳಿಸಿ ಕಾರ್ಮಿಕರಿಗೆ ನ್ಯಾಯ ಒದಗಿಸಬೇಕು ಎಂದು ಒತ್ತಾಯಿಸಿದರು.
ಪಟ್ಟಣದ ಬಸವೇಶ್ವರ ವೃತ್ತದಿಂದ ವಿಷ್ಣು ಟೆಕ್ಸ್ಟೆಲ್ಸ್ ಆಡಳಿತ ಮಂಡಳಿ ವಿರುದ್ದ ಧಿಕ್ಕಾರ ಕೂಗುತ್ತ ಪ್ರತಿಭಟನಾ ಮೆರವಣಿಗೆ ಹೊರಟು ತಹಶೀಲ್ದಾರ್ ರವರಿಗೆ ಮನವಿ ಪತ್ರ ಸಲ್ಲಿಸಿದರು.
ಪ್ರತಿಭಟನೆಯಲ್ಲಿ ಕಾರ್ಮಿಕರಾದ ಕೆಂಪರಾಜು, ಶಿವಮಣಿ, ದೇವರಾಜು, ಮಂಜುನಾಥ್, ರಾಜಣ್ಣ, ಗಣೇಶ್, ಸುರೇಶ್, ನಂಜುಂಡನಾಯ್ಕ, ತೀರ್ಥೇಗೌಡ, ಹರೀಶ್, ಆನಂದ್, ಪ್ರಸನ್ನ, ವೆಂಕಟೇಶ್, ಗೋಪಾಲ, ಮಹದೇವಮ್ಮ ಹೇಮ, ರವಿ, ಪಾರ್ವತಮ್ಮ ಸೇರಿದಂತೆ ಮತ್ತಿತರರು ಇದ್ದರು.
