ಯಾದಗಿರಿ: ಮುಷ್ಕರದ ಸಂದರ್ಭದಲ್ಲಿ ಸೇವೆಯಿಂದ ವಜಾ ಗೊಂಡಿರುವ ಸಾರಿಗೆ ನೌಕರರನ್ನು ಶೀಘ್ರದಲ್ಲೇ ಮರು ನಿಯೋಜನೆ ಮಾಡಲು ಸರಕಾರ ಬದ್ದವಾಗಿದೆ ಎಂದು ಸಾರಿಗೆ ಸಚಿವ ಬಿ. ಶ್ರೀರಾಮುಲು ಮತ್ತೊಮ್ಮೆ ಭರವಸೆ ನೀಡಿದ್ದಾರೆ.
ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನೌಕರರ ಕೂಟದ ಕಲ್ಯಾಣ ಕರ್ನಾಟಕ ಸಾರಿಗೆ ವಲಯ ಗೌರವಾಧ್ಯಕ್ಷ ಶೌಕತ್ ಅಲಿ ಆಲೂರು ಅವರ ನೇತೃತ್ವದ ನಿಯೋಗ ಯಾದಗಿರಿಯಲ್ಲಿ ಇಂದು ಸಾರಿಗೆ ಸಚಿವರನ್ನು ಭೇಟಿಯಾಗಿ ಮನವಿ ಸಲ್ಲಿಸಿತು. ಈ ವೇಳೆ ಭರವಸೆ ನೀಡಿದರು.
ಕಲ್ಯಾಣ ಕರ್ನಾಟಕ ಸಾರಿಗೆ ವಲಯದಲ್ಲಿ 70 ಜನ ಕಾರ್ಮಿಕರು ವಜಾ ಆಗಿದ್ದಾರೆ. ಅಧಿಕಾರಿಗಳು ಅನಗತ್ಯವಾಗಿ 74 ಜನರ ಮೇಲೆ ಸುಳ್ಳು ಪ್ರಕರಣ ದಾಖಲಿಸಿದ್ದಾರೆ.
ಮುಷ್ಕರ ಮತ್ತು ಲಾಕ್ ಡೌನ್ ಅವಧಿಯಲ್ಲಿ ಗೈರುಹಾಜರಿ ಮಾಡಿ ಶಿಸ್ತು ಮತ್ತು ನಡತೆ ನಿಯಮ 1971 ರ 22 ಮತ್ತು23 ರಡಿ ಜಾರಿ ಮಾಡಲಾದ ಆಪಾದನಾ ಪತ್ರಗಳನ್ನು ರದ್ದು ಪಡಿಸಲು ಅಧಿಕಾರಿಗಳಿಗೆ ಸೂಚಿಸುವಂತೆ ಸಚಿವರ ಗಮನಕ್ಕೆ ತರಲಾಯಿತು.
ಮನವಿ ಆಲಿಸಿದ ಸಚಿವರು ಈ ವಿಷಯ ಕುರಿತು ಮಂಡಳಿಯ ಸಭೆಯಲ್ಲಿ ಚರ್ಚಿಸಿದ್ದು ಶೀಘ್ರ ದಲ್ಲಿಯೆ ಅಂತಿಮಗೊಳಿಸಿ ಇತ್ಯರ್ಥಪಡಿಸಲಾಗುವುದು ಎಂದು ತಿಳಿಸಿದರು.
ಇನ್ನು ಮುಂದೆ ಸಾರಿಗೆ ಇಲಾಖೆಯಲ್ಲಿ ಅಧಿಕಾರಿಗಳ ದೌರ್ಜನ್ಯ ಮತ್ತು ಹಿಂಸೆ ನಡೆಯುವದಿಲ್ಲ ಅಂತಹ ಅಧಿಕಾರಿಗಳ ಮೇಲೆ ದೂರು ನೀಡಿದರೆ ಕ್ರಮ ತೆಗೆದುಕೊಳ್ಳುವ ದಾಗಿ ಸಚಿವರು ಹೇಳಿದರು.
ಇನ್ನು ಮುಷ್ಕರದ ಸಮಯದಲ್ಲಿ ವರ್ಗಾವಣೆಗೊಂಡ ಸಿಬ್ಬಂದಿಗಳನ್ನು ಮೂಲ ಘಟಕಗಳಿಗೆ ನಿಯೋಜನೆ ಮಾಡಲು ಎಲ್ಲಾ ಅಧಿಕಾರಿಗಳಿಗೆ ಸೂಚಿಸಿರುವುದಾಗಿ ಸಚಿವರು ತಿಳಿಸಿದರು.
ನಿಯೋಗದಲ್ಲಿ ಕಾರ್ಮಿಕ ಮುಖಂಡರಾದ ಜಯರಾಮ ರಾಠೋಡ. ಬಸವರಾಜ ಚಾಮರಡ್ಡಿ, ಸುಭಾಸ ಎಸ್ ಆಲೂರು, ಜಗನಾಥ ಶಿವಯೋಗಿ, ಶಿವಪುತ್ರ ಪೂಜಾರಿ, ಸಾಹೇ ಪಟೇಲ, ರುದ್ರಗೌಡ ಪಾಟೀಲ್ ಸೇರಿದಂತೆ ಮುಂತಾದವರಿದ್ದರು.
