ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಡಾ: ರಾಮಕೃಷ್ಣೇಗೌಡರ ಸಾಧನೆ ಅಪಾರ
ಕೆ.ಆರ್.ಪೇಟೆ: ರಾಜ್ಯಮಟ್ಟದ ರಾಜ್ಯೋತ್ಸವ ಪ್ರಶಸ್ತಿ ಸ್ವೀಕರಿಸಿದ ಬಿಜಿಎಸ್ ಶಾಖಾಮಠದ ಕಾರ್ಯದರ್ಶಿ ಡಾ: ಜೆ.ಎನ್. ರಾಮಕೃಷ್ಣೇಗೌಡ ಅವರಿಗೆ ತಾಲೂಕಿನ ಹೇಮಗಿರಿ ಬಿಜಿಎಸ್ ಪಬ್ಲಿಕ್ ಸ್ಕೂಲ್ ವತಿಯಿಂದ ಅಭಿನಂದನಾ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿತ್ತು.
ಮಕ್ಕಳ ವಿದ್ಯಾಭ್ಯಾಸಕ್ಕೆ ಬಳಸುವ ಪರಿಕರಗಳನ್ನು ವಿತರಿಸುವ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಮಾಜಿ ಶಾಸಕ ಕೆ.ಬಿ.ಚಂದ್ರಶೇಖರ್, ಡಾ.ರಾಮಕೃಷ್ಣ ಗೌಡ ಅವರ ಸಾಧನೆ ಹಲವಾರು. ಪ್ರಮುಖವಾಗಿ ಇಂದು ಬಿಜಿಎಸ್ ಮಠ ಸದೃಢವಾಗಿ ಹೊರಹೊಮ್ಮುವುದಕ್ಕೆ ಅವರ ಪರಿಶ್ರಮವೂ ಅಪಾರ ಎಂದರು.
ಇನ್ನು ಪರಮಪೂಜ್ಯ ಭೈರವೈಕ್ಯ ಡಾ: ಬಾಲಗಂಗಾಧರನಾಥ ಸ್ವಾಮೀಜಿ ಅವರ ಮಾನಸ ಕಾರ್ಯದರ್ಶಿಯಾಗಿ 45 ವರ್ಷಗಳ ಕಾಲ ಮಠದ ಏಳಿಗೆಗಾಗಿ ಸಮಾಜ ಸೇವೆ ಮಾಡುತ್ತಲೇ ಹಗಲಿರುಳು ಶ್ರಮಿಸಿದ ಮಹಾನ್ ವ್ಯಕ್ತಿ ಎಂದರು.
ರಾಮಕೃಷ್ಣೇಗೌಡ ಅವರ ಪ್ರಾಮಾಣಿಕ ಸಮಾಜಸೇವೆ ಗುರುತಿಸಿ ರಾಜ್ಯೋತ್ಸವ ಪ್ರಶಸ್ತಿ ನೀಡಿರುವುದು ಶ್ಲಾಘನೀಯ ಎಂದು ಅಭಿಪ್ರಾಯಪಟ್ಟರು.
ಹೇಮಗಿರಿ ಮುಖ್ಯಶಿಕ್ಷಕಿ ಪವಿತ್ರ, ಲೆಕ್ಕಪರಿಶೋಧಕ ಕುಮಾರ್, ಸುರೇಶ್ ಮತ್ತು ಬೋಧಕ – ಬೋಧಕೇತರ ಸಿಬ್ಬಂದಿಗಳು ಹಾಗೂ ಮಕ್ಕಳು ಉಪಸ್ಥಿತರಿದ್ದರು.
Leave a reply
