ಮೈಸೂರು: ಕೃಷಿ ಪಂಪ್ ಸೆಟ್‌ಗಳಿಗೆ ಪದೇಪದೇ ವಿದ್ಯುತ್ ಕಡಿತವಾಗುತ್ತಿರುವ ಕಾರಣ ಮೋಟರ್‌ಗಳು ಸುಟ್ಟು ಹೋಗುತ್ತಿದ್ದು, ಈಗಾಗಲೇ ಸಾಲದ ಸುಳಿಯಲ್ಲಿ ಸಿಲುಕಿರುವ ರೈತರಿಗೆ ಗಾಯದ ಮೇಲೆ ಬರೆ ಎಳೆದಂತಾಗುತ್ತಿದೆ. ಹೀಗಾಗಿ ಸಮಪರ್ಕ ವಿದ್ಯುತ್ ಪೂರೈಸುವಂತೆ ಆಗ್ರಹಿಸಿ ರೈತರು ಪ್ರತಿಭಟನೆ ನಡೆಸಿದರು.
ಜಯಪುರ ಚೆಸ್ಕಾಂ ವ್ಯಾಪ್ತಿಯ ಕೃಷಿ ಪಂಪ್‌ಸೆಟ್‌ಗಳಿಗೆ ಅಸಮರ್ಪಕ ವಿದ್ಯುತ್ ಪೂರೈಕೆ ಮಾಡುತ್ತಿರುವ ಕಾರಣ ಬೆಳೆದು ನಿಂತಿರುವ ಬೆಳೆಗಳು ಒಣಗಿ ಹಾಳಾಗುತ್ತಿದ್ದು, ರೈತರ ಬದುಕಿನ ಜತೆ ಚೆಲ್ಲಾಟವಾಡುತ್ತಿರುವ ಚೆಸ್ಕಾಂ ನಡೆಯನ್ನು ಖಂಡಿಸಿ ಹಾಗೂ ಸರ್ಕಾರ ನಿಗದಿ ಪಡಿಸಿರುವ ಸಮಯದಂತೆ ವಿದ್ಯುತ್ ಸರಬರಾಜು ಮಾಡಬೇಕು ಎಂದು ಒತ್ತಾಯಿಸಿ ಇಂದು ಜಯಪುರದ ಚೆಸ್ಕಾಂ ಕಚೇರಿ ಮುಂದೆ ಪ್ರತಿಭಟನೆ ನಡೆಸಲಾಯಿತು.
ಅತಿಯಾದ ಬಿಸಿಲ ತಾಪಕ್ಕೆ ಬೆಳೆಗಳು ನೀರಿಲ್ಲದೆ ಒಣಗಿ ಹಾಳಾಗಿದ್ದು ಅದಕ್ಕೆ ಸೂಕ್ತ ಪರಿಹಾರ ನೀಡಬೇಕು ಎಂದು ಕಬ್ಬು ಬೆಳೆರ ಪರಿಹಾರಕ್ಕೆ ರಾಜ್ಯ ಕಬ್ಬು ಬೆಳೆಗಾರರ ಸಂಘದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಬರಡನಪುರ ನಾಗರಾಜ್ ಇದೇ ವೇಳೆ ಒತ್ತಾಯಿಸಿದರು.
ನಂತರ ಸಹಾಯಕ ಕಾರ್ಯಪಾಲಕ ಅಭಿಯಂತರರು ಪ್ರತಿಭಟನಾ ನಿರತ ರೈತರನ್ನು ಕಚೇರಿ ಒಳಗೆ ಕರೆದು ಸಮಸ್ಯೆಗಳನ್ನು ಆಲಿಸಿದರು. ಈ ವೇಳೆ ಮಾತನಾಡಿದ ಪ್ರತಿಭಟನಾ ನಿರತ ರೈತರು ಅಧಿಕಾರಿಯನ್ನು ತರಾಟೆಗೆ ತೆಗೆದುಕೊಂಡು ಹಗಲು ವೇಳೆ ನೀಡುವ ವಿದ್ಯುತ್ತನ್ನು ನೀವು ಪದೇಪದೇ ಕಟ್ ಮಾಡುವುದರಿಂದ ನಾಲ್ಕು ಗಂಟೆ ಹೇಗೆ ಪೂರೈಸಿದಿರಿ ನಾಲ್ಕು ಗಂಟೆ ಸಮರ್ಪಕವಾಗಿ ವಿದ್ಯುತ್ ನೀಡಬೇಕು ಎಂದು ಆಗ್ರಹಿಸಿದರು.
ಇನ್ನು ದೂರವಾಣಿ ಕರೆಗಳನ್ನು ಸ್ವೀಕರಿಸುತ್ತಿಲ್ಲ ಹಾಗೂ ಕಚೇರಿಯಲ್ಲಿ ದೂರು ನೀಡಲು ಒಂದು ಪುಸ್ತಕವನ್ನು ಇಡಬೇಕು ಎಂಬ ನಿಯಮವಿದೆ ಆದರೂ ಅದನ್ನು ಸಹ ಇಟ್ಟಿಲ್ಲ. ಈಗಾಗಲೇ ಒಂದು ಎಕರೆಗೆ 50 ರಿಂದ 60 ಸಾವಿರ ರೂಪಾಯಿಗಳನ್ನು ಖರ್ಚು ಮಾಡಿ ಫಸಲೊಡ್ಡಿ ಕಷ್ಟ ಅನುಭವಿಸುತ್ತಿದ್ದಾರೆ. ಇನ್ನು ಬೆಳೆದ ಬೆಳೆಗಳಿಗೆ ಉತ್ತಮ ಬೆಲೆಯು ಸಿಗುತ್ತಿಲ್ಲ ಜೊತೆಗೆ ನಿಮ್ಮಿಂದಲೂ ಕಿರುಕುಳ ತಪ್ಪುತಿಲ್ಲ ಎಂದು ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಆಕ್ರೋಶ ವ್ಯಕ್ತಪಡಿಸಿದರು.
ಈ ವೇಳೆ ಜಯಪುರ ಉಪ ವಿಭಾಗದ ಸಹಾಯಕ ಕಾರ್ಯಪಾಲಕ ಅಭಿಯಂತರರಾದ ಧರಣಿ ದೇವಿ, ಮುಂದಿನ ನಾಲ್ಕು ತಿಂಗಳ ಒಳಗಾಗಿ ಡಿ.ಸಾಲುಂಡಿ ಗ್ರಾಮದಲ್ಲಿ ವಿದ್ಯುತ್ ವಿತರಣಾ ಕೇಂದ್ರ ಆಗಲಿದ್ದು ಅದಾದರೆ ಈ ಭಾಗದ ರೈತರ ಸಮಸ್ಯೆಗೆ ಪರಿಹಾರ ಸಿಗಲಿದೆ ಎಂದ ಅವರು, ಈಗ ಆಗುತ್ತಿರುವ ಸಮಸ್ಯೆಯನ್ನು ಒಂದು ವಾರದ ಒಳಗೆ ಬಗೆಹರಿಸುವುದಾಗಿ ಭರವಸೆ ನೀಡಿದರು.
ಇನ್ನು ಬಿಸಿಲಿನ ತಾಪ ಹೆಚ್ಚಾಗಿದ್ದು, ಇತ್ತ ಸಿಬ್ಬಂದಿಯ ಕೊರತೆಯೂ ಇದೆ. ಒಂದು ಪಂಚಾಯಿತಿಗೆ ಒಬ್ಬರೇ ಇಂಜಿನಿಯರ್ ಹಾಗೂ ಕೇವಲ ಎಂಟು ಮಂದಿ ಅಧಿಕಾರಿಗಳು ಇದ್ದು ಇದರಿಂದ ಈ ರೀತಿಯ ತೊಂದರೆಗಳಾಗುತ್ತಿದೆ. ಹೆಚ್ಚಿನ ಲೋಡಿಂಗ್ ಇರುವುದರಿಂದ ಈ ರೀತಿ ಸಮಸ್ಯೆಗಳಾಗುತ್ತಿದ್ದು ಶೀಘ್ರದಲ್ಲೇ ಇದಕ್ಕೆ ಪರಿಹಾರ ಕಂಡುಕೊಳ್ಳಲಾಗುವುದು ಎಂದು ರೈತರ ಮನವೊಲಿಸಿದರು.
ಈ ವೇಳೆ ಇಂಜಿನಿಯರ್ ಸುರೇಶ್, ಗುಜ್ಜೆ ಗೌಡನಪುರ ವಿಭಾಗದ ಇಂಜಿನಿಯರ್ ಸುರೇಶ್, ರೈತರಾದ ಬರಡನಪುರ ಗ್ರಾಮದ ಮಹೇಶ್, ಕೆಂಪನಂಜಪ್ಪ, ಗಿರೀಶ್, ಶಿವಣ್ಣ, ರವಿ, ಶಿವ ಮಲ್ಲು ರಾಜೇಂದ್ರ, ದಾರಿಪುರ ಗ್ರಾಮದ ಗುರು, ಕಂಠಿ, ದೊಡ್ಡ ಕಾಟೂರು ಮಹಾದೇವಸ್ವಾಮಿ, ಮಾವಿನಹಳ್ಳಿ ಗ್ರಾಮದ ರೈತರು ಇದ್ದರು.
