ಬೆಂಗಳೂರು: ಜನ ಸೇವೆಯೇ ಜನಾರ್ಧನನ ಸೇವೆ ! ಉಳ್ಳವರು ಇಲ್ಲದವರಿಗೆ ಸಕಾಲದಲ್ಲಿ ನೆರವು ಕಲ್ಪಿಸಬೇಕು !! ಅದುವೇ ನಿಜವಾದ ಮಾನವ ಧರ್ಮ !! ಎಂದು ಶ್ರೀ ಶೃಂಗೇರಿ ಶಾರದಾ ಪೀಠದ ಆಡಳಿತಾಧಿಕಾರಿ ಹಾಗೂ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಪದ್ಮಶೀ ಪ್ರಶಸ್ತಿ ಪುರಸ್ಕೃತ ಡಾ.ವಿ. ಆರ್. ಗೌರಿ ಶಂಕರ್ ತಿಳಿಸಿದರು.
ಇಂದು ನಗರದ ಶಂಕರಪುರಂ ಬಡಾವಣೆಯ ಶೃಂಗೇರಿ ಶಂಕರ ಮಠದ ಆವರಣದಲ್ಲಿ ಆಯೋಜಿಸಲಾಗಿದ್ದ ವಿಶೇಷ ಕಾರ್ಯಕ್ರಮದಲ್ಲಿ ಬಸವನಗುಡಿ ಪ್ರದೇಶದಲ್ಲಿ ವಾಸಿಸುತ್ತಿರುವ ಕಡು ಬಡವರು ಹಾಗೂ ಇದೇ ಪ್ರದೇಶದಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಕೋವಿಡ್-19 ಸೈನಿಕರು ಎಂದೇ ಬಣ್ಣಿಸಲಾಗುವ ಅರೆ ವೈದ್ಯಕೀಯ ಸಿಬ್ಬಂದಿ, ಪೌರ ಕಾರ್ಮಿಕರು ಹಾಗೂ ಪೊಲೀಸರಿಗೆ ಧವಸ-ಧಾನ್ಯಗಳ ಆಹಾರ ಕಿಟ್ ವಿತರಿಸಿ ಔಪಚಾರಿಕವಾಗಿ ಮಾತನಾಡುತ್ತಿದ್ದರು.
ಸಾಮಾಜಿಕ ಅಂತರವನ್ನು ಕಾಯ್ದುಕೊಳ್ಳುವ ನಿಯಮ ಪಾಲಿಸಿ ಇಂದು ಒಂದು ಸಾವಿರ ಮಂದಿಗೆ ಆಹಾರ ಕಿಟ್‍ಗಳನ್ನು ವಿತರಿಸಿದ್ದೇವೆ. ಮುಂದಿನ ಮೂರು ದಿನಗಳಲ್ಲಿ ಅರ್ಹರ ಮನೆ-ಮನೆಗೇ ತೆರಳಿ ಐದು ಸಾವಿರ ಆಹಾರ ಕಿಟ್‍ಗಳನ್ನು ವಿತರಿಸಲು ಸಂಕಲ್ಪ ಮಾಡಿದ್ದೇವೆ ಎಂದರು.
ಸಮಯಕ್ಕಾದವನೇ ನೆಂಟ ಎಂದು ಬಣ್ಣಿಸುತ್ತಾರೆ. ಬಡವರು ಸಂಕಷ್ಟದಲ್ಲಿ ಸಿಲುಕಿರುವಾಗ ಸಹೃದಯರ ಸಹಕಾರದಿಂದ ಶ್ರೀ ಮಠವು ಈ ಪವಿತ್ರ ಕಾರ್ಯಕ್ಕೆ ಮುಂದಾಗಿದೆ. ಯಾವುದೇ ಜಾತಿ-ಮತ, ಭೇದ-ಭಾವ ಅಥವಾ ತಾರತಮ್ಯ ಇಲ್ಲದೇ ಈ ಕಾರ್ಯವನ್ನು ಸಾಕಾರಗೊಳಿಸಲು ಯೋಜಿಸಲಾಗಿದೆ ಎಂದರು.
ಶ್ರೀ ಮಠದ ಭಕ್ತಾಧಿಗಳೂ ಹಾಗೂ ಮಹಾ ದಾನಿಗಳೂ ಅದ ಟಿ ಸಿ ವೆಂಕಟೇಶ್, ಬಿ ಎಸ್ ಕಿರಣ್ ಕುಮಾರ್, ಎನ್ ನಿರಂಜನ್ ಮತ್ತಿತರರು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.
