ವಿಜಯಪಥ ಸಮಗ್ರ ಸುದ್ದಿ
ಮಡಿಕೇರಿ: ಕೊಡಗು ಜಿಲ್ಲೆಯ ಗಡಿಭಾಗ ಶನಿವಾರಸಂತೆ ಸುತ್ತಮುತ್ತ ಶುಕ್ರವಾರ ಆಲಿಕಲ್ಲು ಸಹಿತ ಭಾರೀ ಮಳೆಯಾಗಿದೆ. ಅದರಲ್ಲೂ ಶನಿವಾರಸಂತೆ ಸಮೀಪದ ಹಳ್ಳಿಯಲ್ಲಿ ಭಾರಿ ಗಾತ್ರದ ಆಲಿಕಲ್ಲು ಸಹಿತ ಮಳೆಯಾಗಿದ್ದು ರಸ್ತೆ ಮೇಲೆ ಅರ್ಧ ಅಡಿಯಷ್ಟು ಆಲಿಕಲ್ಲುಗಳು ಬಿತ್ತಿದ್ದನ್ನು ನೂರಾರು ಗ್ರಾಮಸ್ಥರು ತಮ್ಮ ಮೊಬೈಲ್‌ ಫೋನ್‌ಗಳಲ್ಲಿ ಸೆರೆಹಿಡಿದಿದ್ದಾರೆ.
ಇದು ಪ್ರಕೃತಿಯ ವಿಚಿತ್ರವೋ ಅಥವಾ ವಿಪರ್ಯಾಸವೋ ಗೊತ್ತಿಲ್ಲ. ಆದರೆ, ಈ ರೀತಿ ಮಳೆಯಾಗಿರುವುದರಿಂದ ರೈತರ ಬೆಳೆದಿರುವ ಫಸಲಿಗೆ ಹಾನಿಯಾಗಿರುವುದು ಖಚಿತ. ಇಂಥ ಮಳೆಯಾಗುವುದರಿಂದ ರೈತರ ಬದುಕು ಮೂರಾಬಟ್ಟೆಯಾಗುತ್ತದೆ. ಆದ್ದರಿಂದ ಸರ್ಕಾರ ಇತ್ತ ಕಣ್ಣುತೆರೆದು ನೋಡಬೇಕಾಗಿದೆ ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.
ಇನ್ನು ಈ ಕುರಿತು ಅನಿಸಿಕೆ ಹಂಚಿಕೊಂಡರು ಸ್ಥಳೀಯರು ತಾವು ಜೀವಮಾನದಲ್ಲೇ ಇಷ್ಟೊಂದು ಆಲಿಕಲ್ಲು ಬಿದ್ದಿದ್ದನ್ನು ನೋಡೇ ಇಲ್ಲ ಎಂದು ಆಶ್ಚರ್ಯ ಪಡಿಸಿದ್ದಾರೆ ಇಂದು ಬೆಳಗ್ಗೆ 11 ಗಂಟೆಗೆ ಆರಂಭಗೊಂಡ ಮುಸಲಧಾರೆ ಒಂದೂವರೆ ಗಂಟೆಗಳು ಬಿದ್ದಿದ್ದು, ಇದು ಪ್ರಕೃತಿಯ ಮುನಿಸು ಇರಬಹುದು ಎಂದು ಹೇಳಲಾಗುತ್ತಿದೆ.
ಸುಮಾರು ಒಂದೂವರೆ ಇಂಚಿನಷ್ಟು ಮಳೆ ಸುರಿದಿದ್ದು ಇದರಿಂದ ಕಾಳುಮೆಣಸು ಬೆಳೆಗೆ ಹಾನಿಯಾಗಿದೆ ಎಂದು ರೈತ ಮಧುಸೂದನ್‌ ಎಂಬುವರು ಹೇಳಿದ್ದಾರೆ. ಕಾಳುಮೆಣಸಿಗೆ ಈಗ ಕೊಯ್ಲಿನ ಸಮಯ. ಬಳಿಯಲ್ಲಿದ್ದ ಮೆಣಸು ಕೆಳಕ್ಕೆ ಬಿದ್ದಿದೆ. ಈಗಲೇ ಕಾಳುಮೆಣಸಿಗೂ ಬೆಲೆ ಕುಸಿದಿದ್ದು, 1ಕೆಜಿಗೆ 330 ರೂ.ಗಳಿದೆ. ಈ ಸಂದರ್ಭದಲ್ಲಿ ಬೆಳೆ ಹಾನಿಯಾದರೆ ರೈತರ ಬದುಕು ಕಷ್ಟ ಎಂದು ಹೇಳಿದ್ದಾರೆ.
ಇನ್ನು ಸಾಮಾಜಿಕ ಜಾಲತಾಣಗಳಲ್ಲಿ ರಸ್ತೆಮೇಲೆ, ಮನೆಗಳ ಸುತ್ತಮುತ್ತ ಬಿದ್ದಿರುವ ಭಾರಿ ಪ್ರಮಾಣದ ಆಲಿಕಲ್ಲುಗಳ ದೃಶ್ಯ ವೈರಲ್ ಆಗಿದೆ.
ಬೆಂಗಳೂರಿನಲ್ಲೂ ಮಳೆ
ಇನ್ನು ಸಂಜೆ ಸುಮಾರು 5.45ರಲ್ಲಿ ಬೆಂಗಳೂರಿನ ಹಲವೆಡೆ ಸಾಧಾರಣ ಮಳೆಯಾಗಿದೆ. ಮಂಡ್ಯ, ಮೈಸೂರು, ಹಾಸನ, ಹುಬ್ಬಳ್ಳಿ ಸೇರಿದಂತೆ ಹಲವೆಡೆ ಮಳೆಯಾಗಿದ್ದು, ಈ ಮಳೆಯಿಂದ ಲಾಭಕ್ಕಿಂತ ಲಾಸ್‌ ಹೆಚ್ಚು ಎಂದು ಹೇಳಲಾಗುತ್ತಿದೆ.
