ಉತ್ತರ ಕನ್ನಡ: ಪತ್ನಿಯ ಮೇಲೆ ಸುಮಾರು 40 ವರ್ಷಗಳ ಹಿಂದೆ ಕೋಪ ಮಾಡಿಕೊಂಡಿದ್ದ ಪತಿ, ಸಾಯುವ ವೇಳೆಯೂ ಮಾತನಾಡದೇ ಕೊನೆಯುಸಿರೆಳೆದಿರುವ ಪ್ರಸಂಗ ಜಿಲ್ಲೆಯ ಜೊಯಿಡಾ ತಾಲೂಕಿನ ರಾಮನಗರ ಠಾಣಾ ವ್ಯಾಪ್ತಿಯಲ್ಲಿ ಜರುಗಿದೆ.
ಲೂಯಿಸ್ ಫರ್ನಾಂಡಿಸ್ (75) ನಿಧನ ಹೊಂದಿದವರು. ಕಳೆದ 40 ವರ್ಷಗಳ ಹಿಂದೆ ಪತ್ನಿ ಜೊತೆ ಕೋಪಿಸಿಕೊಂಡು ಲೂಯಿಸ್ ಮಾತು ಬಿಟ್ಟಿದ್ದರಂತೆ. ಇದರಿಂದ ನೊಂದ ಪತ್ನಿ ಕೆಲಸ ಅರಸಿ ಮುಂಬೈಗೆ ಹೋಗಿದ್ದರು.
ಇನ್ನು ಇತ್ತ ಕೂಲಿ ಕೆಲಸದ ಜೊತೆಗೆ ಪ್ಲಾಸ್ಟಿಕ್ ಆರಿಸುತ್ತಿದ್ದ ಲೂಯಿಸ್, ಎಂಎಸ್ಐಎಲ್ ಮದ್ಯದಂಗಡಿ ಪಕ್ಕ ವಾಸವಿದ್ದ. ಇತ್ತೀಚೆಗೆ ಜಿಲ್ಲೆಯಲ್ಲಿ ಭಾರೀ ಮಳೆಯಾಗುತ್ತಿದ್ದರಿಂದ ಗಾಳಿ, ಮಳೆಗೆ ಚಳಿಯಿಂದ ಲೂಯಿಸ್ ನಡಗುತ್ತಿದ್ದರು. ಅದನ್ನು ಗಮನಿಸಿದ ಕೆಪಿಸಿ ಕಾಲೋನಿಯ ಸ್ಥಳೀಯ ಸ್ಟಿವನ್ ತಮ್ಮ ಮನೆಗೆ ಬರುವಂತೆ ಕೇಳಿಕೊಂಡಿದ್ದಾರೆ. ಆದರೆ ಲೂಯಿಸ್ ಅವರ ಮನೆಗೆ ಹೋಗಲು ಒಪ್ಪಲಿಲ್ಲ ಎನ್ನಲಾಗಿದೆ.
ಜುಲೈ 23 ರಂದು ಸಂಜೆ ಸ್ಟಿವನ್ ವಡಾಪಾವ್ ನೀಡಿ ಲೂಯಿಸ್ನನ್ನು ಕೊನೆಯದಾಗಿ ಮಾತನಾಡಿಸಿಕೊಂಡು ಬಂದಿದ್ದರು. ಈ ವೇಳೆ ಸ್ಟಿವನ್, ಲೂಯಿಸ್ ಪತ್ನಿಗೆ ಕರೆ ಮಾಡಿ ವಿಚಾರ ಹೇಳಿದ್ದರಂತೆ. ಆಗ ಲೂಯಿಸ್ ಜೊತೆ ಆತನ ಪತ್ನಿ ಮಾತನಾಡೋದಾಗಿ ಹೇಳಿದ್ದಾರೆ.
ಆದರೆ ಲೂಯಿಸ್ ಮಾತನಾಡಲು ಇಷ್ಟಪಡಲಿಲ್ಲ ಎನ್ನಲಾಗಿದೆ. ಜುಲೈ 25 ರಂದು ಸಂಜೆ 6 ಗಂಟೆ ವೇಳೆಗೆ ಲೂಯಿಸ್ ನಿಧನರಾಗಿದ್ದಾರೆ ಎಂದು ಮಾಹಿತಿ ಸಿಕ್ಕಿದೆ. ನಿಧನ ಹೊಂದಿದ ಬಳಿಕ ಆತನ ಪತ್ನಿಗೆ ಫೋನ್ ಮಾಡಿ ಮಾಹಿತಿ ನೀಡಲಾಗಿದೆ.
![](https://vijayapatha.in/wp-content/uploads/2024/02/QR-Code-VP-1-1-300x62.png)