ಬಾಗಲಕೋಟೆ: ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ನಮ್ಮ ಪ್ರಾಡಕ್ಟ್ ಎಂದು ಹೆಮ್ಮೆಯಿಂದ ಹೇಳುತ್ತೀರಲ್ಲ ಅವರು ಜನತಾದಳ ಒದ್ದುಹೋಗಿದ್ದೇಕೆ? ಇದಕ್ಕೆ ಉತ್ತರ ಕೊಡಿ ಎಂದು ಮಾಜಿ ಸಚಿವ ಕೆ.ಎಸ್. ಈಶ್ವರಪ್ಪ ಮಾಜಿ ಸಿಎಂ ಎಚ್‌.ಡಿ. ಕುಮಾರಸ್ವಾಮಿ ಅವರಿಗೆ ಸವಾಲು ಹಾಕಿದ್ದಾರೆ.
ಬೊಮ್ಮಾಯಿ ನಮ್ಮ ಪ್ರಾಡಕ್ಟ್ ಎಂದಿದ್ದ ಕುಮಾರಸ್ವಾಮಿ ಹೇಳಿಕೆಗೆ ಬಾಗಲಕೋಟೆಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡುವ ವೇಳೆ ಪ್ರತಿಕ್ರಿಯಿಸಿದ ಈಶ್ವರಪ್ಪ, ಬಸವರಾಜ ಬೊಮ್ಮಾಯಿ ಜನತಾದಳವನ್ನು ಒದ್ದು ಬಿಜೆಪಿಗೆ ಬಂದರು, ಅದರ ಬಗ್ಗೆ ಹೇಳಿ ಕುಮಾರಸ್ವಾಮಿಯವರೇ. ಪಕ್ಷ ಸಂಘಟಿಸುವ ಯಾರಿಗಾದರೂ ಒಳ್ಳೆ ಸ್ಥಾನಮನ ಸಿಗುತ್ತದೆ ಎಂಬುದಕ್ಕೆ ಬೊಮ್ಮಾಯಿ ಅವರೇ ಸಾಕ್ಷಿ ಎಂದರು.
ಇಲ್ಲಿಗೆ ಬಂದಮೇಲೆ ತಲಹರಟೆ ಮಾಡಿದ್ರೆ ಚರಂಡಿಗೆ ಹೋಗಿ ವಾಂತಿ ಮಾಡುತ್ತೀವಿ. ಅಂದಹಾಗೆ ನಮಗೆ ಜೀರ್ಣ ಮಾಡಿಕೊಳ್ಳುವ ಶಕ್ತಿ ಜಾಸ್ತಿ ಇದೆ. ನಮ್ಮ ಕಡೆ ಬಂದಾಗ ಯಾವ ಕಾರ್ಯಕರ್ತರನ್ನು ತಿರಸ್ಕಾರ ಭಾವನೆಯಿಂದ ನೋಡಿಲ್ಲ ಕುಮಾರಸ್ವಾಮಿಯವರೇ ಎಂದು ಹೇಳಿದರು.
ನಿಮ್ಮಿಂದ ಇನ್ನು ಎಷ್ಟು ಜನ ಬರ್ತಾರೆ ಗೊತ್ತಿಲ್ಲ. ಜನತಾದಳ ಪಾರ್ಟಿ ಮುಚ್ಚುವ ಹಂತ ತಲುಪಿದೆ. ನೀವು ಅದನ್ನು ಮುಚ್ಚಿಕೊಂಡು ಬಿಜೆಪಿಯಲ್ಲೇ ನಮ್ಮವರಿಗೆ ಸಮಾನ ಸ್ಥಾನ ಸಿಗುತ್ತದೆ ಎಂದು ತೀರ್ಮಾನ ಮಾಡಿ, ಆನಂದ ಪಡಿ. ಆದರೆ ನಿಮ್ಮ ಶಾಸಕರನ್ನು ಉಳಿಸಿಕೊಳ್ಳಿ ಎಂದು ಕಿವಿಮಾತು ಹೇಳಿದರು.
