ಇದು ನಿಗಮಗೆ ಗೊತ್ತೆ? ಗ್ರಾಚ್ಯುಟಿ, ರಜೆ ನಗದೀಕರಣ ಸೇರಿ 10 ಆದಾಯಗಳ ಮೇಲೆ ಸರ್ಕಾರ ಯಾವುದೇ ತೆರಿಗೆ ವಿಧಿಸುವಂತಿಲ್ಲ

ನ್ಯೂಡೆಲ್ಲಿ: ಸರ್ಕಾರಿ ಹಾಗೂ ಖಾಸಗಿ ವಲಯದಲ್ಲಿನ ನೌಕರರು ಅಂದರೆ ಉದ್ಯೋಗಸ್ಥರು, ಉದ್ಯಮಿಗಳು ಸೇರಿದಂತೆ ಪ್ರತಿಯೊಬ್ಬರೂ ತಾವು ಗಳಿಸಿದ ಆದಾಯಕ್ಕೆ ಪ್ರತಿವರ್ಷ ಆದಾಯ ತೆರಿಗೆ ಕಟ್ಟುವುದು ಕಡ್ಡಾಯ. ಇನ್ನು ಈ ಸಮಯದಲ್ಲಿ ಪ್ರತಿಯೊಬ್ಬರೂ ತಾವು ಕಷ್ಟದಿಂದ ಗಳಿಸಿದ್ದರಲ್ಲಿ ಒಂದಿಷ್ಟು ಹಣ ತೆರಿಗೆಯಿಂದ ಉಳಿಸಲು ವಿವಿಧ ಕಸರತ್ತು ಮಾಡುವುದು ಸಾಮಾನ್ಯವಾಗಿದೆ.

ಈ ಎಲ್ಲದರ ನಡುವೆ ವಿವಿಧ ಯೋಜನೆಗಳಲ್ಲಿ ಹೂಡಿಕೆ ಮಾಡುವುದು, ಕಡಿತಗಳನ್ನು ಕ್ಲೈಮ್ ಮಾಡುವುದು ಮಾಮೂಲಿಯಾಗಿರುತ್ತದೆ. ಆದರೆ, ಭಾರತೀಯ ಆದಾಯ ತೆರಿಗೆ ಕಾಯ್ದೆಯಡಿ ಕೆಲವು ನಿರ್ದಿಷ್ಟ ಆದಾಯಗಳಿಗೆ ಸರ್ಕಾರ ಸಂಪೂರ್ಣವಾಗಿ ತೆರಿಗೆ ವಿನಾಯಿತಿ ನೀಡಿದೆ ಎಂಬ ವಿಷಯ ನಿಮಗೆ ಗೊತ್ತೇ?

ನೋಡಿ ಕೆಲವು ನಿಯಮ ಮತ್ತು ಷರತ್ತುಗಳಿಗೆ ಒಳಪಟ್ಟು, ನೀವು ಪಡೆಯುವ ಈ ಕೆಳಗಿನ 10 ಆದಾಯಗಳ ಮೇಲೆ ಸರ್ಕಾರ ಯಾವುದೇ ತೆರಿಗೆಯನ್ನು ವಿಧಿಸುವುದಿಲ್ಲ. ಆ ಪ್ರಮುಖ 10 ಆದಾಯದ ಮೂಲಗಳು ಯಾವುವು ಎಂದು ನೋಡುವುದಾದರೆ..

1. ಕೃಷಿ ಆದಾಯ (Agricultural Income): ಭಾರತದಲ್ಲಿ ಕೃಷಿ ಅಥವಾ ಕೃಷಿ ಭೂಮಿಯಿಂದ ಬರುವ ಆದಾಯಕ್ಕೆ ಯಾವುದೇ ತೆರಿಗೆ ಇರುವುದಿಲ್ಲ. ಬೆಳೆಗಳ ಮಾರಾಟದಿಂದ ಬರುವ ಹಣ, ಕೃಷಿ ಭೂಮಿಯ ಗುತ್ತಿಗೆ ಅಥವಾ ಬಾಡಿಗೆ ಮತ್ತು ಕೃಷಿಗೆ ಸಂಬಂಧಿಸಿದ ಇತರೆ ಯಾವುದೇ ಆದಾಯಗಳು ಸಂಪೂರ್ಣವಾಗಿ ತೆರಿಗೆ ಮುಕ್ತವಾಗಿವೆ.

2. ವಿದ್ಯಾರ್ಥಿವೇತನ (Scholarships): ಶಿಕ್ಷಣಕ್ಕಾಗಿ ಸರ್ಕಾರದಿಂದ ಅಥವಾ ಯಾವುದೇ ಖಾಸಗಿ ಸಂಸ್ಥೆಯಿಂದ ವಿದ್ಯಾರ್ಥಿಗಳು ಪಡೆಯುವ ವಿದ್ಯಾರ್ಥಿವೇತನಕ್ಕೆ (Scholarship) ಯಾವುದೇ ತೆರಿಗೆ ಇರುವುದಿಲ್ಲ. ಈ ವಿನಾಯಿತಿಯು ಎಲ್ಲಾ ವಯಸ್ಸಿನ ವಿದ್ಯಾರ್ಥಿಗಳಿಗೂ ಅನ್ವಯಿಸುತ್ತದೆ.

3. ಗ್ರಾಚ್ಯುಟಿ (Gratuity): ಸರ್ಕಾರಿ ನೌಕರರು ನಿವೃತ್ತಿಯ ಸಮಯದಲ್ಲಿ ಪಡೆಯುವ ಗ್ರಾಚ್ಯುಟಿ ಹಣಕ್ಕೆ ಸಂಪೂರ್ಣವಾಗಿ ತೆರಿಗೆ ವಿನಾಯಿತಿ ಇರುತ್ತದೆ. ಇನ್ನು ಖಾಸಗಿ ವಲಯದ ಉದ್ಯೋಗಿಗಳಿಗೆ ಗರಿಷ್ಠ 20 ಲಕ್ಷ ರೂಪಾಯಿಗಳವರೆಗಿನ ಗ್ರಾಚ್ಯುಟಿ ಮೊತ್ತಕ್ಕೆ ತೆರಿಗೆ ವಿನಾಯಿತಿ ಸಿಗುತ್ತದೆ.

4. ರಜೆ ನಗದೀಕರಣ (Leave Encashment): ಸರ್ಕಾರಿ ನೌಕರರು ನಿವೃತ್ತಿ ಹೊಂದುವಾಗ ಪಡೆಯುವ ರಜೆ ನಗದೀಕರಣ (Leave Encashment) ಮೊತ್ತವು ಸಂಪೂರ್ಣವಾಗಿ ತೆರಿಗೆ ಮುಕ್ತವಾಗಿದೆ. ಖಾಸಗಿ ವಲಯದ ಉದ್ಯೋಗಿಗಳಿಗೆ ಇತ್ತೀಚಿನ ನಿಯಮಗಳ ಪ್ರಕಾರ ಗರಿಷ್ಠ 25 ಲಕ್ಷ ರೂಪಾಯಿಗಳವರೆಗಿನ ರಜೆ ನಗದೀಕರಣಕ್ಕೆ ವಿನಾಯಿತಿ ನೀಡಲಾಗಿದೆ.

5. ಎಲ್‌ಐಸಿ ಪಾಲಿಸಿ ಮೆಚುರಿಟಿ (LIC Policy Maturity): ನೀವು ಎಲ್‌ಐಸಿ (LIC) ಪಾಲಿಸಿ ಹೊಂದಿದ್ದು, ಅದು ಮೆಚೂರ್ (ಮಾಗಿದ) ಆದಾಗ ಬರುವ ಹಣದ ಮೇಲೆ ಯಾವುದೇ ತೆರಿಗೆ ಇರುವುದಿಲ್ಲ. ಆದರೆ, ಇದಕ್ಕೆ ವಿಮಾ ಕಾಯ್ದೆಯಡಿ ಇರುವ ಕೆಲವು ನಿರ್ದಿಷ್ಟ ಷರತ್ತುಗಳನ್ನು ಪೂರೈಸಿರಬೇಕಾಗುತ್ತದೆ.

6. ಅವಿಭಕ್ತ ಹಿಂದೂ ಕುಟುಂಬದಿಂದ ಬರುವ ಆದಾಯ: ಒಂದು ವೇಳೆ ಅವಿಭಕ್ತ ಹಿಂದೂ ಕುಟುಂಬವು ತನ್ನ ಒಟ್ಟು ಆದಾಯದ ಮೇಲೆ ಈಗಾಗಲೇ ಆದಾಯ ತೆರಿಗೆ ಪಾವತಿಸಿದ್ದರೆ, ಆ ಕುಟುಂಬದ ಸದಸ್ಯರು ಪಡೆಯುವ ಪಾಲಿನ ಹಣಕ್ಕೆ ಮತ್ತೊಮ್ಮೆ ತೆರಿಗೆ ವಿಧಿಸಲಾಗುವುದಿಲ್ಲ.

7. ಪಾಲುದಾರಿಕೆ ಸಂಸ್ಥೆಯ ಲಾಭದ ಪಾಲು (LLP/Partnership Firm Profit): ನೀವು ಯಾವುದೇ ಪಾಲುದಾರಿಕೆ ಸಂಸ್ಥೆ ಅಥವಾ ಎಲ್‌ಎಲ್‌ಪಿ (LLP) ಯಲ್ಲಿ ಪಾಲುದಾರರಾಗಿದ್ದರೆ, ಆ ಸಂಸ್ಥೆಯಿಂದ ಬರುವ ಲಾಭದ ಪಾಲಿಗೆ (Share of Profit) ತೆರಿಗೆ ಇರುವುದಿಲ್ಲ. ಏಕೆಂದರೆ ಸಂಸ್ಥೆಯು ಈಗಾಗಲೇ ಆ ಆದಾಯದ ಮೇಲೆ ತೆರಿಗೆ ಪಾವತಿಸಿರುತ್ತದೆ. ಆದರೆ, ಸಂಸ್ಥೆಯಿಂದ ನೀವು ಪಡೆಯುವ ಸಂಬಳ, ಕಮಿಷನ್ ಅಥವಾ ಬಡ್ಡಿಗೆ ತೆರಿಗೆ ಅನ್ವಯವಾಗುತ್ತದೆ.

8. ಸಾರ್ವಜನಿಕ ಭವಿಷ್ಯ ನಿಧಿ ಮತ್ತು ಸುಕನ್ಯಾ ಸಮೃದ್ಧಿ ಯೋಜನೆ ಬಡ್ಡಿ (PPF & SSY Interest): ಸುಕನ್ಯಾ ಸಮೃದ್ಧಿ ಯೋಜನೆ (SSY), ಪಿಪಿಎಫ್ (PPF), ಕೆಲವು ನಿರ್ದಿಷ್ಟ ತೆರಿಗೆ ಮುಕ್ತ ಬಾಂಡ್‌ಗಳು ಮತ್ತು ಎನ್‌ಆರ್‌ಐ (NRI) ಖಾತೆಗಳಿಂದ ಗಳಿಸುವ ಬಡ್ಡಿಯು ಸಂಪೂರ್ಣವಾಗಿ ತೆರಿಗೆ ಮುಕ್ತವಾಗಿರುತ್ತದೆ.

9. ಪಿಎಫ್ ಹಣ ಹಿಂಪಡೆಯುವಿಕೆ (PF Withdrawal): ಭವಿಷ್ಯ ನಿಧಿ (PF) ಖಾತೆಯಿಂದ ಹಣ ಹಿಂಪಡೆಯುವುದು ತೆರಿಗೆ ಮುಕ್ತವಾಗಿದೆ. ಆದರೆ, ನೀವು ಯಾವುದೇ ಮಾನ್ಯತೆ ಪಡೆದ ಸಂಸ್ಥೆಯಲ್ಲಿ ಸತತ 5 ವರ್ಷಗಳ ಕಾಲ ಉದ್ಯೋಗ ಮಾಡಿ ಹಣ ಹಿಂಪಡೆದರೆ ಮಾತ್ರ ಈ ವಿನಾಯಿತಿ ಸಿಗುತ್ತದೆ. 5 ವರ್ಷಗಳಿಗಿಂತ ಕಡಿಮೆ ಅವಧಿಯಲ್ಲಿ ಹಿಂಪಡೆದರೆ ತೆರಿಗೆ ಕಡಿತವಾಗಬಹುದು.

10. ಉಡುಗೊರೆಗಳು ಮತ್ತು ಪಿತ್ರಾರ್ಜಿತ ಆಸ್ತಿ (Gifts & Inheritance): ಮದುವೆಯ ಸಂದರ್ಭದಲ್ಲಿ ಹತ್ತಿರದ ಸಂಬಂಧಿಕರು ಅಥವಾ ಸ್ನೇಹಿತರಿಂದ ಬರುವ ಉಡುಗೊರೆಗಳಿಗೆ ಹಾಗೂ ಪಿತ್ರಾರ್ಜಿತವಾಗಿ ಬರುವ ಆಸ್ತಿಗೆ ಯಾವುದೇ ತೆರಿಗೆ ಇರುವುದಿಲ್ಲ. ಆದರೆ, ರಕ್ತಸಂಬಂಧಿ ಅಲ್ಲದವರಿಂದ (Non-relatives) ಪಡೆಯುವ ಉಡುಗೊರೆಯ ಮೌಲ್ಯ ವರ್ಷಕ್ಕೆ 50,000 ರೂಪಾಯಿ ಮೀರಬಾರದು. ಅದಕ್ಕಿಂತ ಹೆಚ್ಚಾದರೆ ತೆರಿಗೆ ತೆರಬೇಕಾಗುತ್ತದೆ. ಈ ಎಲ್ಲ ವಿನಾಯಿತಿಗಳನ್ನು ಪಡೆಯಲು ಆದಾಯ ತೆರಿಗೆ ಇಲಾಖೆಯ ನಿಯಮಾವಳಿಗಳು ಮತ್ತು ಅಗತ್ಯ ದಾಖಲೆಗಳನ್ನು ಸರಿಯಾಗಿ ಪಾಲಿಸುವುದು ಅತ್ಯಗತ್ಯವಾಗಿದೆ.