ಸಚಿವರ ಕೆರೆ ಕಬಳಿಕೆ ಹುನ್ನಾರದ ವಿರುದ್ಧ ಎಎಪಿ ಪ್ರತಿಭಟನೆ: ಹಲವರ ಬಂಧನ

ವಿಜಯಪಥ ಸಮಗ್ರ ಸುದ್ದಿ
ಬೆಂಗಳೂರು: ಜುನ್ನಸಂದ್ರ ಕೆರೆ ಅಂಗಳದ 24 ಎಕರೆ 33 ಗುಂಟೆ ಜಮೀನನ್ನು ಕಬಳಿಸಲು ಹುನ್ನಾರ ನಡೆಸುತ್ತಿದ್ದ ಸಚಿವ ಅರವಿಂದ ಲಿಂಬಾವಳಿ ಅವರ ವಿರುದ್ಧ ಭಾನುವಾರ ಪ್ರತಿಭಟನೆಗೆ ಮುಂದಾದ ಆಮ್ ಆದ್ಮಿ ಪಕ್ಷದ ರಾಜ್ಯ ಸಂಚಾಲಕ ಪೃಥ್ವಿ ರೆಡ್ಡಿ ಸೇರಿದಂತೆ ನೂರಾರು ಕಾರ್ಯಕರ್ತರನ್ನು ಪೊಲೀಸರು ಬಂಧಿಸಿದ್ದಾರೆ.

ಭೂ ಮಾಫಿಯಾಗಳ ಜೊತೆ ಸೇರಿಕೊಂಡು ಹುನ್ನಾರ ನಡೆಸಿದ್ದ ಸಚಿವ ಲಿಂಬಾವಳಿ ಅವರ ಹೇಡಿತನದ ಪರಮಾವಧಿ. ಪ್ರತಿಭಟನೆ ನಡೆಸಲು ಪೊಲೀಸರು ಅನುಮತಿ ನೀಡಿದ್ದರು. ಆದರೆ ಸಚಿವರ ಚಿತಾವಣೆಯಿಂದ ಅನುಮತಿಯನ್ನು ರದ್ದು ಮಾಡಿ ದರ್ಪ ಮೆರೆದಿದ್ದಾರೆ. ಪೊಲೀಸರು ಸಚಿವರ ತಾಳಕ್ಕೆ ತಕ್ಕಂತೆ ಕುಣಿಯುತ್ತಿದ್ದಾರೆ ಎಂದು ಪಕ್ಷದ ಬೆಂಗಳೂರು ಘಟಕದ ಅಧ್ಯಕ್ಷ ಮೋಹನ್ ದಾಸರಿ ಕಿಡಿಕಾರಿದರು.

ಕನ್ನಡ ಸಂಸ್ಕೃತಿ ಸಚಿವರೇ ನಿಮಗೆ ಕಿಂಚಿತ್ತಾದರೂ ಸಂಸ್ಕಾರ ಇದ್ದಿದ್ದರೆ ಈ ರೀತಿ ಪುಡಿ ರೌಡಿಗಳಂತೆ ನಡೆದುಕೊಳ್ಳುತ್ತಿರಲಿಲ್ಲ. ನೀವು ಅಕ್ರಮದಲ್ಲಿ ಭಾಗಿಯಾಗಿರುವ ಕಾರಣ ನಮ್ಮ ಮೇಲೆ ಅನೈತಿಕ ಮಾರ್ಗದಲ್ಲಿ ಕ್ರಮಕ್ಕೆ ಮುಂದಾಗಿದ್ದೀರಿ. ನೀವು ಪ್ರಾಮಾಣಿಕ ವ್ಯಕ್ತಿಯಾಗಿದಿದ್ದರೆ ಸಮಸ್ಯೆ ಬಗೆಹರಿಸಲು ಮುಂದಾಗುತ್ತಿದ್ದೀರಿ. ನಿಮ್ಮ ಮತ್ತಷ್ಟು ಅಕ್ರಮಗಳನ್ನು ಆಮ್ ಆದ್ಮಿ ಪಕ್ಷ ಮುಂದಿನ ದಿನಗಳಲ್ಲಿ ಬಯಲಿಗೆ ಎಳೆಯುತ್ತದೆ ಎಂದು ಕಿಡಿಕಾರಿದರು.