ವಿಜಯಪಥ ಸಮಗ್ರ ಸುದ್ದಿ
ಬೆಂಗಳೂರು: ಅಪ್ರಾಪ್ತಳನ್ನು ಮದುವೆಯಾದ ಕಾರಣಕ್ಕೆ ಅಪ್ಪ ಜೈಲು ಶಿಕ್ಷೆ ಅನುಭವಿಸುತ್ತಿದ್ದಾರೆ. ಇತ್ತ ಅಮ್ಮ ಅಕ್ರಮ ಸಂಬಂಧ ಹೊಂದಿದ್ದು, ಇದನ್ನು ಸಹಿಸಿಕೊಳ್ಳಲಾಗದೆ ಇಬ್ಬರು ಪುತ್ರಿಯರು ಜೈಲಿನಲ್ಲಿರುವ ಅಪ್ಪನಿಗೆ ವಿಷಯ ತಿಳಿಸಿದ್ದಕ್ಕೆ ಆ ಮಕ್ಕಳನ್ನು ತಳಿಸಿದ್ದು, ಸದ್ಯ ಈಗ ಅಮ್ಮ ಮತ್ತು ಅಮ್ಮನ ಪ್ರಿಯಕರ ಜೈಲು ಸೇರಿದ್ದಾರೆ.
ಜಯಮ್ಮ ಮತ್ತು ಹೇಮಂತ್ ಆರೋಪಿಗಳಾಗಿದ್ದು, ರಾಜರಾಜೇಶ್ವರಿನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದ ಘಟನೆಯಾಗಿದೆ. ಇಬ್ಬರು ಮುದ್ದಾದ ಹೆಣ್ಣು ಮಕ್ಕಳು. ಅಪ್ರಾಪ್ತಳಾಗಿದ್ದ ಜಯಮ್ಮನನ್ನು ಮದುವೆಯಾದ ಕಾರಣಕ್ಕೆ ಪತಿ ಶಿಕ್ಷೆಗೆ ಗುರಿಯಾಗಿ ಹಾಸನದ ಜೈಲು ಸೇರಿದ್ದಾನೆ.
ಪತಿ ಜೈಲು ಪಾಲಾದ್ದರಿಂದ ಬದುಕಿಗಾಗಿ ಬ್ಯಾಟರಾಯನಪುರದ ಆಸ್ಪತ್ರೆಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ಜಯಮ್ಮನಿಗೆ ಹೇಮಂತನ ಪತ್ನಿ ಪರಿಚಯವಾಗಿದೆ. ಆಕೆ ಕೂಡ ಅದೇ ಖಾಸಗಿ ಆಸ್ಪತ್ರೆಯಲ್ಲಿ ಕೆಲಸ ಮಾಡುತ್ತಿದ್ದಳು. ಹೇಮಂತನ ಪತ್ನಿ ಒಮ್ಮೆ ತನ್ನ ಮನೆಗೆ ಕರೆದುಕೊಂಡು ಹೋಗಿ ತನ್ನ ಗಂಡನಿಗೆ ಪರಿಚಯಿಸಿದ್ದಳೆ. ಬಳಿಕ ಈ ಇಬ್ಬರ ಸ್ನೇಹ ಅಕ್ರಮ ಸಂಬಂಧಕ್ಕೆ ನಾಂದಿ ಹಾಡಿದ್ದು, ಹೇಮಂತ್ ತನ್ನ ಪ್ರೇಯಸಿ ಜಯಮ್ಮನ ಮನೆಗೆ ಬಂದು ಸರಸವಾಡುತ್ತಿದ್ದ. ಇದನ್ನು ಸಹಿಸದ ಮುದ್ದು ಮಕ್ಕಳು ಅಡ್ಡಿ ಪಡಿಸುತ್ತಿದ್ದರು. ಹೀಗಾಗಿ ಹೇಮಂತ ಇಬ್ಬರು ಹೆಣ್ಣು ಮಕ್ಕಳ ಮೇಲೆ ಹಲ್ಲೆ ಮಾಡಿದ್ದಾನೆ.
ಚಿಕ್ಕ ವಯಸ್ಸಿನಲ್ಲಿ ಜಯಮ್ಮನನ್ನು ವರಿಸಿದ ಪಾಪಕ್ಕೆ ಜೈಲು ಪಾಲಾಗಿರುವ ಪತಿ ಒಮ್ಮೆ ಕರೆ ಮಾಡಿದ್ದಾನೆ. ಇಬ್ಬರು ಮಕ್ಕಳು ಮನೆಯಲ್ಲಿ ಹೇಮಂತ ಎಂಬಾತ ಇರುವ ಬಗ್ಗೆ ತಿಳಿಸಿದ್ದಾರೆ. ಇದರಿಂದ ಗಾಬರಿಯಾದ ಜಯಮ್ಮನ ಪತಿ, ಪೋನ್ ನಲ್ಲಿ ಪತ್ನಿಗೆ ಹೆದರಿಸಿದ್ದಾನೆ. ಪತಿ ಕೋಪಿಸಿಕೊಂಡ ಹಿನ್ನೆಲೆಯಲ್ಲಿ ಇಬ್ಬರು ಹೆಣ್ಣು ಮಕ್ಕಳ ಮೇಲೆ ಜಯಮ್ಮ ದೌರ್ಜನ್ಯ ಎಸಗಿದ್ದಾಳೆ.
ಅಷ್ಟೇ ಅಲ್ಲದೆ ಎರಡು ತಿಂಗಳಿನಿಂದ ಮಕ್ಕಳ ಮೈಮೇಲೆ ಬರೆ ಹಾಕಿ ಚಿತ್ರ ಹಿಂಸೆ ನೀಡಿದ್ದಾಳೆ. ವಿಧಿಯಿಲ್ಲದೆ ಇಬ್ಬರು ಮಕ್ಕಳು ಆ ಚಿತ್ರಹಿಂಸೆಗೆ ಒಳಗಾದರೂ ಸಹಿಸಿಕೊಂಡು ಅಲ್ಲಿಯೇ ಇದ್ದಾರೆ. ಇದನ್ನು ಸಹಿಸಿಕೊಳ್ಳದ ಸ್ಥಳೀಯರು ಗುರುವಾರ ಹಲ್ಲೆ ಮಾಡುತ್ತಿದ್ದ ಇಬ್ಬರು ಮಕ್ಕಳನ್ನು ರಕ್ಷಣೆ ಮಾಡಿದ್ದಾರೆ. ಅಲ್ಲದೇ ರಾಜರಾಜೇಶ್ವರಿನಗರ ಪೊಲೀಸರಿಗೆ ಮಾಹಿತಿ ನೀಡಿದ್ದು, ಸ್ಥಳಕ್ಕೆ ಬಂದ ಪೊಲೀಸರು, ಇಬ್ಬರು ಆರೋಪಿಗಳನ್ನು ಬಂಧಿಸಿ ಜೈಲಿಗೆ ಕಳುಹಿಸಿದ್ದಾರೆ.
ಗಂಭೀರ ಗಾಯಗೊಂಡಿರುವ ಇಬ್ಬರು ಹೆಣ್ಣು ಮಕ್ಕಳನ್ನು ಪೊಲೀಸರು ಖಾಸಗಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆ ಮಕ್ಕಳು ಗುಣಮುಖರಾದ ಬಳಿಕ ಸರ್ಕಾರದ ಮಕ್ಕಳ ಕಲ್ಯಾಣ ಕೇಂದ್ರಕ್ಕೆ ಕಳುಹಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.
ಇನ್ನು ಪರ ಪುರುಷನ ಜೊತೆಗಿನ ಅಕ್ರಮ ಸಂಬಂಧಕ್ಕೆ ಅಡ್ಡಿ ಪಡಿಸಿದ ಮಕ್ಕಳ ಮೇಲೆ ದೌರ್ಜನ್ಯ ಮಾಡಿದ ಆರೋಪದಡಿ ತಾಯಿ ಜೈಲು ಸೇರಿರುವ ಹಿನ್ನೆಲೆಯಲ್ಲಿ ಆ ಇಬ್ಬರು ಮಕ್ಕಳು ಅನಾಥರಾಗಿದ್ದಾರೆ.
