ದಯಾಮರಣಕ್ಕಾಗಿ ರಾಜ್ಯಪಾಲರಿಗೆ ಮನವಿ ಸಲ್ಲಿಸಲು ಮುಂದಾದ ಸಾರಿಗೆ ನೌಕರರು

ಬೆಂಗಳೂರು: ವಿವಿಧ ಬೇಡಿಕೆಗಳ ಈಡೇರಿಕೆಗೆ ಒತ್ತಾಯಿಸಿ ಕಳೆದ ಏಪ್ರಿಲ್‌ ತಿಂಗಳಲ್ಲಿ ಮುಷ್ಕರ ಮಾಡಿದ ಸಾರಿಗೆ ನೌಕರರಿಗೆ ಕಿರುಕುಳ ನೀಡುತ್ತಿರುವ ವಿಚಾರ ಸಂಬಂಧ ಮಾನಸಿಕವಾಗಿ ಹಾಗೂ ದೈಹಿಕವಾಗಿ ತುಂಬ ನೋವು ಅನುಭವಿಸುತ್ತಿರುವ ವಜಾಗೊಂಡ ಸಾರಿಗೆ ನೌಕರರು ಈಗ ದಯಾಮರಣ ನೀಡುವಂತೆ ರಾಜ್ಯಪಾಲರಿಗೆ ಮನವಿ ಮಾಡಲು ಮುಂದಾಗಿದ್ದಾರೆ.

ರಾಜ್ಯಪಾಲರ ಬಳಿ ದಯಾಮರಣ ಕೇಳಿ ನೌಕರರು ಮತ್ತು ಕುಟುಂಬದವರು ಮನವಿ ಪತ್ರ ಸಲ್ಲಿಸಲು ಮುಂದಾಗಿರುವುದು ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಆ ಪತ್ರ ಈ ಕೆಳಗಿನಂತಿದೆ.

ಗೆ
ಗೌರವನಿತ್ವ ಘನವೆತ್ತರಾಜ್ಯಪಾಲರು
ಕರ್ನಾಟಕ ಸರಕಾರ

ಮಾನ್ಯರೆೇ,
ವಿಷಯ: “ಸಾರಿಗೆ ನೌಕರರು ಕಟುುಂಬ ಸಮೇತ ಸಾಮೂಹಿಕವಾಗಿ “ದಯಾಮರಣಕ್ಕೆ ಮನವಿ”

ಈ ಮೇಲ್ಕಂಡ ವಿಷಯಕ್ಕೆ ಸಂಬಂಧಿಸಿದಂತೆ ನಾವು ಘನ ಕರ್ನಾಟಕ ಸರ್ಕಾರದ ಅಂಗ ಸಂಸ್ಥೆಯಾದ ಸಾರಿಗೆ ಇಲಾಖೆಯ ಕಾರ್ಮಿಕರಾಗಿದ್ದು, ಹಲವು ವರ್ಷಗಳಿಂದ ಸಂಸ್ಥೆಯಲ್ಲಿ ಶ್ರದ್ಧೆ ಮತ್ತು ಪ್ರಾಮಾಣಿಕತೆಯಿಂದ ಕರ್ತವ್ಯ ನಿರ್ವಹಿಸುತ್ತಿದ್ದೇವೆ.

ಆದರೆ ಕಳೆದ 2021 ನೇ ಇಸ್ವಿ ಏಪ್ರಿಲ್ ತಿಂಗಳಿನಲ್ಲಿ ಸಾರಿಗೆ ನೌಕರರ ಕೂಟವು ವಿವಿಧ ಬೇಡಿಕೆಗಳ ಈಡೇರಿಕೆಗಾಗಿ ಒತ್ತಾಯಿಸಿ ಮುಷ್ಕರ ನಡೆಸಿತು. ಆ ಮುಷ್ಕರದಲ್ಲಿ ಪಾಲ್ಗೊಳ್ಳದೇ ಇದ್ದರೂ ಕೂಡ ನಮ್ಮನ್ನು ವಜಾ ಮಾಡಲಾಗಿದೆ. ಎಲ್ಲಾ ಕಾನೂನುಗಳನ್ನು ಗಾಳಿಗೆ ತೂರಿ ಯಾವುದೇ ವಿಚಾರಣೆ ಮಾಡದೆ ಏಕಪಕ್ಷೀಯವಾಗಿ ವಜಾ ಮಾಡಿರುತ್ತಾರೆ.

ಇದರಿಂದ ಅನ್ಯಾಯವಾಗಿ ನಮ್ಮ ಕುಟುಂಬಗಳನ್ನು ಬೀದಿಪಾಲು ಮಾಡಿದ್ದಲ್ಲದೆ ಹಲವಾರು ಕಾರ್ಮಿಕರು ಮತ್ತು ಅವರ ಅವರ ಕುಟುಂಬಗಳು ಆತ್ಮಹತ್ಯೆ ಮಾಡಿಕೊಳ್ಳಲು ಮೂಲ ಕಾರಣವಾಗಿರುತ್ತಾರೆ.

ಹಲವು ತಿಂಗಳುಗಳಿಂದ ಕೆಲಸ ಇಲ್ಲದೆ, ಸಂಬಳವಿಲ್ಲದೆ ನಮಗೆ ಕುಟುಂಬ ನಿರ್ವಹಣೆ ಮಾಡಲು ಸಾಧ್ಯವಾಗುತ್ತಿಲ್ಲ. ಮಕ್ಕಳ ವಿದ್ಯಾಭ್ಯಾಸಕ್ಕೆ ಮತ್ತು ಕುಟುಂಬದ ಒಂದು ಹೊತ್ತಿನ ಊಟಕ್ಕೂ ಪರದಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಸರ್ಕಾರ ಮತ್ತು ಸಾರಿಗೆ ಇಲಾಖೆಯ ಸಚಿವರು ಕೇವಲ ಆಶ್ವಾಸನೆಗಳನ್ನು ಕೊಡುತ್ತಿದ್ದಾರೆ. ಇದರಿಂದ ನಮ್ಮ ಕುಟುಂಬದ ಪರಿಸ್ಥಿತಿ ಮತ್ತಷ್ಟು ಗಂಭೀರವಾಗಿದೆ. ನಾವು ಮತ್ತು ನಮ್ಮ ಕುಟುಂಬದವರು ಮಾನಸಿಕವಾಗಿ ತುಂಬಾ ನೊಂದಿದ್ದೇನೆ.

ಸದ್ಯ ನಮಗೆ ಬೇರೆ ದಾರಿ ಇಲ್ಲದೆ ಆತ್ಮಹತ್ಯೆ ಒಂದೇ ಪರಿಹಾರ ಅಂದುಕೊಂಡು ಸಂವಿಧಾನ ಬಾಹಿರವಾಗಿ ವಜಾ ಮಾಡಿರುವ ಕಾರಣ ದಿನಾಂಕ 26 -11ರ ಸಂವಿಧಾನ ಸಮರ್ಪಣಾ ದಿನ ಕಾನೂನು ಬಾಹಿರವಾಗಿ ವಜಾವಾದ ಕಾರ್ಮಿಕರು ಮತ್ತು ನಮ್ಮ ನಮ್ಮ ಕುಟುಂಬ ಸದಸ್ಯರ ಸಮೇತ ಆತ್ಮಹತ್ಯೆ ಮಾಡಿಕೊಳ್ಳಲು ನಿರ್ಧಾರ ಮಾಡಿರುತ್ತೇವೆ. ಆದ್ದರಿಂದ ರಾಜ್ಯದ ಪ್ರಜೆಗಳಾದ ನಮಗೆ ರಾಜ್ಯದ ಪ್ರಭುಗಳಾದ ತಾವು ದಯಾಮರಣ ಕರುಣಿಸಬೇಕೆಂದು ತಮ್ಮಲ್ಲಿ ಈ ಮೂಲಕ ಮನವಿ ಮಾಡಿಕೊಳ್ಳುತ್ತೇವೆ.

ಧನ್ಯವಾದಗಳೊಂದಿಗೆ ತಮ್ಮ ಪ್ರಜೆಗಳು