KSRTC ಸಂಸ್ಥೆಯ ನೌಕರರ ಬಾಳು ಹಸನು ಮಾಡಲು ಸಂಘಟನೆಗಳ ನಾಯಕರು ಒಗ್ಗಟ್ಟಾಗಿ: ಜೀವನ್ ಮಾರ್ಟಿಸ್ ಮನವಿ

ಪುತ್ತೂರು: ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ ಅಭಿವೃದ್ಧಿ ಹಾಗೂ ನೌಕರರ ಹಿತದೃಷ್ಟಿಯಿಂದ ಎಲ್ಲ ಸಂಘಟನೆಗಳು ಒಗ್ಗಟ್ಟಾಗಿ ಹೋರಾಟ ರೂಪಿಸಬೇಕು ಎಂದು KSRTC ನೌಕರರ ಕೂಟದ ಪುತ್ತೂರು ವಿಭಾಗದ ಅಧ್ಯಕ್ಷ ಜೀವನ್ ಮಾರ್ಟಿಸ್ ಮನವಿ ಮಾಡಿದ್ದಾರೆ.

ಈ ಸಂಬಂಧ ಪತ್ರಿಕಾ ಹೇಳಿಕೆ ನೀಡಿರುವ ಅವರು, ನಾನು ಸಾರಿಗೆ ಸಂಸ್ಥೆಯ ಒಬ್ಬ ನೌಕರನಾಗಿ, ನಮ್ಮೆಲ್ಲಾ ನಾಯಕರ ಮೇಲೆ ಅಪಾರ ಗೌರವವನ್ನಿಟ್ಟು ನನ್ನ ಅಭಿಪ್ರಾಯವನ್ನು ವ್ಯಕ್ತಪಡಿಸುತ್ತಿದ್ದೇನೆ.

ನಮ್ಮ ರಾಜ್ಯದ ಸಾರಿಗೆ ನೌಕರರು ಹಗಲಿರುಳು ಶ್ರಮಿಸುತ್ತಾ, ವಿಶ್ವ ದಾಖಲೆ ಎನ್ನಬಹುದಾದ ನೂರಾರು ಪ್ರಶಸ್ತಿಗಳನ್ನು ಸಂಸ್ಥೆಗೆ ತಂದುಕೊಟ್ಟಿದ್ದಾರೆ. ಇಷ್ಟಿದ್ದರೂ ಸಹ, ಇತರ ನಿಗಮ ಮಂಡಳಿಗಳಿಗೆ ಹೋಲಿಸಿದರೆ ನಮ್ಮ ವೇತನ ಶ್ರೇಣಿ ಬಹಳ ಕಡಿಮೆ ಇರುವುದು ನಮಗೆಲ್ಲ ತಿಳಿದಿರುವ ಬೇಸರದ ಸಂಗತಿ.

ಇನ್ನು ‘ಶಕ್ತಿ’ ಯೋಜನೆಯಂತಹ ಸವಾಲುಗಳ ನಡುವೆಯೂ ನಾವು ಅತ್ಯಂತ ಶ್ರದ್ಧೆಯಿಂದ ಕೆಲಸ ಮಾಡುತ್ತಿದ್ದರೂ, ನಮ್ಮ ಆರ್ಥಿಕ ಸ್ಥಿತಿ ಸುಧಾರಿಸುವಲ್ಲಿ ಸೂಕ್ತ ಕಾಳಜಿ ವ್ಯಕ್ತವಾಗುತ್ತಿಲ್ಲ ಎಂಬ ನೋವು ಅಸಮಾಧಾನವೂ ನಮಗಿದೆ.

ಈ ಸಂದರ್ಭದಲ್ಲಿ ನನಗೆ ಅನ್ನಿಸುವುದೆಂದರೆ?: ನಮ್ಮ ಸಂಘಟನೆಗಳ ನಡುವೆ ಇರುವ ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳೇ ಸರ್ಕಾರ ಅಥವಾ ಮ್ಯಾನೇಜ್‌ಮೆಂಟ್ ನಮ್ಮ ಬೇಡಿಕೆಗಳನ್ನು ನಿರ್ಲಕ್ಷಿಸಲು ಪ್ರಮುಖ ಕಾರಣವಾಗುತ್ತಿದೆ. ಹೋರಾಟ ಅಥವಾ ಮುಷ್ಕರಗಳ ಯಶಸ್ಸಿಗಾಗಿ ಎಲ್ಲ ಸಂಘಟನೆಗಳ ನಾಯಕರು ಒಂದೇ ವೇದಿಕೆಯಲ್ಲಿ ನಿಂತು ನೌಕರರಿಗೆ ಧೈರ್ಯ ತುಂಬಬೇಕು.

ನಾಯಕರ ನಡುವೆ ಒಮ್ಮತವಿದ್ದಾಗ ಮಾತ್ರ ಸಾಮಾನ್ಯ ನೌಕರರಲ್ಲಿ ಇರುವ ಗೊಂದಲಗಳು ಮತ್ತು ಅನುಮಾನಗಳು ದೂರವಾಗಲು ಸಾಧ್ಯ. ಎಲ್ಲ ನಾಯಕರು ಒಟ್ಟಾಗಿ ಪತ್ರಿಕಾಗೋಷ್ಠಿ ನಡೆಸಿ, ಸಾರಿಗೆ ನೌಕರರ ಉದ್ಧಾರಕ್ಕಾಗಿ ನಾವು ಒಂದಾಗಿದ್ದೇವೆ ಎಂಬ ಸಂದೇಶವನ್ನು ಸರ್ಕಾರ ಹಾಗೂ ಆಡಳಿತ ಮಂಡಳಿಗೆ ಮತ್ತು ಸಾರ್ವಜನಿಕರಿಗೆ ತಲುಪಿಸಬೇಕಿದೆ.

ಆದ್ದರಿಂದ, ಎಲ್ಲ ಸಂಘಟನೆ ಮುಖಂಡರು ವೈಯಕ್ತಿಕ ಪ್ರತಿಷ್ಠೆಗಳನ್ನು ಬದಿಗಿಟ್ಟು, ನೌಕರರ ಬಾಳನ್ನು ಹಸನು ಮಾಡಲು ಮತ್ತು ಸಂಸ್ಥೆಯನ್ನು ಉಳಿಸಲು ತಾವೆಲ್ಲರೂ ಒಂದಾಗಿ ಹೋರಾಡಬೇಕೆಂದು ಅತ್ಯಂತ ವಿನಯಪೂರ್ವಕವಾಗಿ ಪ್ರಾರ್ಥಿಸುತ್ತೇನೆ ಎಂದು ಮನವಿ ಮಾಡಿದ್ದಾರೆ.