ಕೋಲಾರ: ಸಂಸಾರ ಸರಿಯಾಗಿ ನಡೆಸುವಂತೆ ಬುದ್ಧಿ ಹೇಳಿ ಮಲಗಿದ್ದ ತಂದೆ ತಲೆ ಜಜ್ಜಿ ಕೊಲೆ

ವಿಜಯಪಥ ಸಮಗ್ರ ಸುದ್ದಿ
ಕೋಲಾರ: ಮಲಗಿದ್ದಲ್ಲೇ ತಂದೆಯ ತಲೆಯನ್ನು ಪಾಪಿ ಮಗನೊಬ್ಬ ರುಬ್ಬು ಕಲ್ಲಿನಿಂದ ಜಜ್ಜಿ ಹತ್ಯೆ ಮಾಡಿರುವ ಘಟನೆ ಶ್ರೀನಿವಾಸಪುರ ತಾಲೂಕಿನ ಅಂಬೇಡ್ಕರ್ ಪಾಳ್ಯದಲ್ಲಿ ಶುಕ್ರವಾರ ಬೆಳಗಿನ ಜಾವ ನಡೆದಿದೆ.

ಅಂಬೇಡ್ಕರ್ ಪಾಳ್ಯದ ವೆಂಕಟೇಶ್ (65) ಮಗನಿಂದಲೇ ಕೊಲೆಯಾದವರು. ನವೀನ್ ಪ್ರಕಾಶ್ ಹತ್ಯೆ ಮಾಡಿದ ಆರೋಪಿ. ಹಾಳಾಗಿದ್ದ ಮಗನ ಕೌಟುಂಬಿಕ ಸಮಸ್ಯೆ ಸರಿಪಡಿಸಲು ಮುಂದಾಗಿದ್ದನ್ನು ಸಹಿಸಿಕೊಳ್ಳದ ನವೀನ್ ಪ್ರಕಾಶ್ ನನಗೆ ಬುದ್ಧಿ ಹೇಳಲು ಬರುತ್ತೀಯ ಎಂದು ಗಲಾಟೆ ಮಾಡಿದ್ದಾನೆ.

ಈ ಸಂಬಂಧ ತಂದೆ ಮತ್ತು ಮಗನ ನಡುವೆ ಗುರುವಾರ ತಡರಾತ್ರಿ ಗಲಾಟೆ ನಡೆದಿತ್ತು. ಆ ಕೋಪದಲ್ಲೇ ಮಲಗಿದ್ದ ಆತ ತಂದೆಯ ಮೇಲೆ ಅಡುಗೆ ಮನೆಯಲ್ಲಿದ್ದ ರುಬ್ಬುವ ಗುಂಡುಕಲ್ಲನ್ನು ತಂದು ಎತ್ತಿ ಹಾಕಿ ಹತ್ಯೆ ಮಾಡಿದ್ದಾನೆ.

ಸದ್ಯ ನವೀನನನ್ನು ಸ್ಥಳೀಯರು ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದಾರೆ. ಹತ್ಯೆಯಿಂದಾಗಿ ಮನೆಯೆಲ್ಲ ರಕ್ತಸಿಕ್ತವಾಗಿದ್ದನ್ನು ಕಂಡು ಸ್ಥಳೀಯರು ಬೆಚ್ಚಿ ಬಿದ್ದಿದ್ದಾರೆ. ಕೊಲೆ ಸಂಬಂಧ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.