ವಿಜಯಪಥ ಸಮಗ್ರ ಸುದ್ದಿ
ಬೆಂಗಳೂರು: ಶಾಲಾ ಶುಲ್ಕ ಭರಿಸಿಲ್ಲ ಎಂದು ಪರೀಕ್ಷೆ ಕೊಠಡಿಯಿಂದ ಹೊರಹಾಕಿ ಮಾನಸಿಕ ಹಿಂಸೆಕೊಟ್ಟ ಶಾಲೆಯ ಆಡಳಿತ ಮಂಡಳಿಯ ನಡೆಗೆ ನೊಂದ ವಿದ್ಯಾರ್ಥಿಯೊಬ್ಬ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ನಗರದ ಎಚ್ ಎಸ್‌ಆ‌ರ್ ಬಡಾವಣೆಯಲ್ಲಿ ಇಂದು ನಡೆದಿದೆ.
ಚನ್ನಸಂದ್ರ ನಿವಾಸಿ ಎಸ್‌ಎಸ್‌ಎಲ್‌ಸಿ ವಿದ್ಯಾರ್ಥಿ ಜಯಂತ್‌ ಆತ್ಮಹತ್ಯೆಗೆ ಯತ್ನಿಸಿದ್ದು, ಪಾಲಕರ ಸಮಯ ಪ್ರಜ್ಞೆಯಿಂದ ಆತನ ಜೀವವನ್ನು ಉಳಿಸಿಕೊಂಡಿದ್ದಾರೆ.
ಇಂದು ಎಚ್ ಎಸ್‌ಆ‌ರ್ ಬಡಾವಣೆಯಲ್ಲಿರುವ ಖಾಸಗಿ ಶಾಲೆಯಲ್ಲಿ ಓದುತ್ತಿರುವ ಜಯಂತ್‌ ಕಿರು ಪರೀಕ್ಷೆ ಇದ್ದಿದ್ದರಿಂದ ಪರೀಕ್ಷೆ ಕೊಠಡಿಗೆ ಹೋಗಿದ್ದಾನೆ. ಆ ವೇಳೆ ಶಾಲಾ ಆಡಳಿತಮಂಡಳಿ ಆತನಿಗೆ ಪರೀಕ್ಷೆ ಬರೆಯಲು ಅನುಮತಿ ನೀಡದೇ ಹೊರಹಾಕಿದೆ. ಜತೆಗೆ ನಿಂದಿಸಿದ್ದು, ಇದರಿಂದ ಮನನೊಂದ ವಿದ್ಯಾರ್ಥಿ ಮನೆಗೆ ಬಂದು ಆತ್ಮಹತ್ಯೆಗೆ ಯತ್ನಿಸಿದ್ದಾನೆ.
ಶಾಲೆಗೆ ಈಗಗಾಲೇ 36 ಸಾವಿರ ರೂ. ಶುಲ್ಕ ಕಟ್ಟಿದ್ದು ಇನ್ನು 50 ಸಾವಿರ ರೂ. ಕಟ್ಟಬೇಕಿತ್ತು. ಆದರೆ ಆ ಶುಲ್ಕವನ್ನು ಕಟ್ಟುವವರೆಗೂ ನೀನು ಶಾಲೆಗೆ ಬರಬೇಡ ಹೋಗು ಎಂದು ಹೊರಹಾಕಿದ್ದಾರೆ.
ವಿದ್ಯಾರ್ಥಿಯ ತಂದೆ ಶಾಲೆಗೆ ಬಂದು 50 ಸಾವಿರ ರೂ. ಬಾಕಿಯಿದ್ದು ಅದನ್ನು ಒಂದು ವಾರ ಕಾಲವಕಾಶಕೊಡಿ ನಾನು ಕಟ್ಟುತ್ತೇನೆ ಎಂದು ಹೇಳಿದ್ದಾರೆ. ಆದರೆ ಶಾಲೆ ಪ್ರಾಂಶುಪಾಲರು ಅವರನ್ನು ಕರೆದು ಮಾತನಾಡುವ ಸೌಜನ್ಯವನ್ನೂ ತೋರದೆ ಫೀ ಕಟ್ಟುದಿದ್ದರೆ ಅವರನ್ನು ಒಳಗೆ ಕಳುಹಿಸಿ ಇಲ್ಲದಿದ್ದರೆ ಹೋಗಲು ಹೇಳಿ ಎಂದು ಸ್ವಾಗತಕಾರಣಿ (Receptionist) ಬಳಿ ಹೇಳಿದ್ದಾರೆ.
ಆದರೂ ಪ್ರಾಂಶುಪಾಲರನ್ನು ಭೇಟಿ ಮಾಡಲು ಪ್ರಯತ್ನಿಸಿದೆ ಅದು ಆಗಲಿಲ್ಲ. ಇತ್ತ ಮಗ ನೊಂದುಕೊಂಡು ಮನೆಗೆ ಹೋಗಿದ್ದಾನೆ ಎಂದು ತಂದೆ ಕೂಡ ಆತನ ಹಿಂದೆಯೇ ಹೋಗಿದ್ದಾರೆ. ಅಷ್ಟರಲ್ಲೇ ಆತ ರೂಂ ಸೇರಿಕೊಂಡು ಫ್ಯಾನಿಗೆ ನೇಣು ಬಿಗಿದುಕೊಳ್ಳಲು ಯತ್ನಿಸುತ್ತಿದ್ದ. ಕೂಡಲೇ ಬಾಗಿಲನ್ನು ಒಡೆದು ಒಳನುಗ್ಗಿ ರಕ್ಷಿಸಿದ್ದೇವೆ ಎಂದು ಪಾಲಕರು ಹೇಳಿದ್ದಾರೆ.
