ಬೆಂಗಳೂರು: ಮುಷ್ಕರದ ಸಮಯದಲ್ಲಿ ವಜಾಗೊಂಡಿರುವ ಸಾರಿಗೆ ನೌಕರರ ಕಾನೂನು ಹೋರಾಟ ತೀವ್ರಗೊಳಿಸುವ ಸಂಬಂಧ ಚರ್ಚಿಸಲು ವಜಾಗೊಂಡಿರುವ ನೌಕರರು ಭಾಗವಹಿಸಬೇಕು ಎಂದು ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ ನೌಕರರ ಸಂಘ ಮನವಿ ಮಾಡಿದೆ.
ಸಭೆಯು ಡಿಸೆಂಬರ್‌ 2ರ ಶುಕ್ರವಾರ ಜೈ ಭೀಮನ್ ಭವನ ( ಪೂರ್ಣಿಮಾ ಟಾಕೀಸ್ ಹತ್ತಿರ ಲಾಲ್ ಬಾಗ್) ದಲ್ಲಿ ಮಧ್ಯಾಹ್ನ 3ಗಂಟೆಗೆ ನಡೆಯಲಿದೆ.
ಈ ಸಂಬಂಧ ನೌಕರರ ಪರ ವಕಾಲತು ವಹಿಸಿರುವ ವಕೀಲರ ಜತೆಗೆ ಹಿರಿಯ ನುರಿತ ವಕೀಲರನ್ನೂ ಖುದ್ದು ಭೇಟಿ ಮಾಡಿ ಕಾನೂನು ಹೋರಾಟವನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ರೂಪಿಸಲು ತಾವು ಆಗಮಿಸಬೇಕು ಎಂದು ವಜಾಗೊಂಡ ನೌಕರರನ್ನು ಸಂಘದ ಪದಾಧಿಕಾರಿಗಳು ಆಹ್ವಾನಿಸಿದ್ದಾರೆ.
ಮುಷ್ಕರದ ವೇಳೆ ವಜಾಗೊಂಡಿರುವ ನೌಕರರಿಗೆ ನಾಯಾಲಯಗಳಲ್ಲಿ ನ್ಯಾಯ ಸಿಗುವುದು ವಿಳಂಬವಾಗುತ್ತಿರುವುದರಿಂದ ಮತ್ತಷ್ಟು ಆರ್ಥಿಕ ಸಮಸ್ಯೆಗಳು ನೌಕರರನ್ನು ಬಾಧಿಸುತ್ತಿವೆ. ಇದರಿಂದ ನೌಕರರು ಆತ್ಮಸ್ಥೈರ್ಯವನ್ನು ಕಳೆದುಕೊಂಡು ಮಾನಸಿಕ ಒತ್ತಡಕ್ಕೆ ಒಳಗಾಗುತ್ತಿದ್ದಾರೆ.
ಆದುದರಿಂದ ನ್ಯಾಯಾಲಯಗಳಲ್ಲಿ ವಜಾಗೊಂಡಿರುವ ನೌಕರರ ಪ್ರಕರಣಗಳು ಯಾವ ಸ್ಥಿತಿ-ಗತಿಯಲ್ಲಿವೆ ಮತ್ತು ಶೀಘ್ರದಲ್ಲೇ ಅವರಿಗೆ ನ್ಯಾಯ ಸಿಗಲು ಪ್ರಕರಣ ತೀವ್ರಗೊಳಿಸಲು ಏನು ಮಾಡಬೇಕು ಎಂಬುವುದರ ಬಗ್ಗೆ ಚರ್ಚಿಸಿ ತೀವ್ರ ಕಾನೂನು ಹೋರಾಟಕ್ಕೆ ತೀರ್ಮಾನ ತೆಗೆದುಕೊಳ್ಳಬೇಕಿದೆ.
ಹೀಗಾಗಿ ನ್ಯಾಯಾಲಯದ ಪ್ರಕರಣಗಳಿಗೆ ಸಂಬಂಧಿಸಿದ ಎಲ್ಲ ವಕೀಲರನ್ನು ಈ ಸಭೆಗೆ ಅಹ್ವಾನಿಸಿದ್ದು, ತಾವು ಸಹ ಈ ಸಭೆಗೆ ಬಂದು ವಜಾಗೊಂಡಿರುವ ನೌಕರರಿಗೆ ಕಾನೂನು ಅರಿವು ಮತ್ತು ಅವರಿಗೆ ಆತ್ಮಸ್ಥೆರ್ಯ ತುಂಬಬೇಕೆಂದು ವಕೀಲರಲ್ಲೂ ಮನವಿ ಮಾಡಿದ್ದಾರೆ.
