ಬಿಎಂಟಿಸಿ ಅಧಿಕಾರಿಗಳ ಅವೈಜ್ಞಾನಿಕ ನಡೆ: ಚಾಲಕ, ನಿರ್ವಾಹಕರಿಗೆ ಯಮಯಾತನೆ

ಬೆಂಗಳೂರು: ಬಿಎಂಟಿಸಿ ಅಧಿಕಾರಿಗಳ ಅವೈಜ್ಞಾನಿಕ ನಡೆಯಿಂದ  ನೌಕರರು 12ಗಂಟೆ ಆನ್‌ ಡ್ಯೂಟಿಯಲ್ಲಿ ಇರಬೇಕಾದ ಪರಿಸ್ಥಿತಿ ಬಂದಿದೆ.  ಇದರಿಂದ ನಿತ್ಯ ಚಾಲಕ, ನಿರ್ವಾಹಕರು ಅನುಭವಿಸುತ್ತಿರುವ ಯಾತನೆ  ಹೇಳತೀರದಾಗಿದೆ.

ಹೌದು! ಕೊರೊನಾ ಲಾಕ್‌ಡೌನ್‌ ನಂತರ ಅನ್‌ಲಾಕ್‌ ಆದ ಬಳಿಕ ಚಾಲಕ, ನಿರ್ವಾಹಕರು ಯಮಯಾತನೆ ಅನುಭವಿಸುವಂತಾಗಿದೆ. ಇತ್ತ ಕೆಲ ಚಾಲಕ ನಿರ್ವಾಹಕರು ಡ್ಯೂಟಿ ಮಾಡದಿದ್ದರೂ ಹಾಜರಾಗಿ ವೇತನ ಪಡೆದರೆ ಇನ್ನು ಕೆಲವರು 12 ಗಂಟೆ ಡ್ಯೂಟಿ ಮಾಡಿ ವೇತನ ಪಡೆಯುವಂತಾಗಿದೆ.

ಈ ಬಗ್ಗೆ ವಿಜಯಪಥ.ಇನ್‌ ( ಡಿಜಿಟಲ್‌ ಮೀಡಿಯಾ) ರಿಯಾಲಿಟಿ ಚೆಕ್‌ ಮಾಡಿದಾಗ ಬಿಎಂಟಿಸಿ ಅಧಿಕಾರಿಗಳ ಅಂಧ ದರ್ಬಾರ್‌ ಎದ್ದು ಕಾಣಿಸಿತು.

ಕೊರೊನಾ ಸೋಂಕಿನ ಈ ಸಮಯದಲ್ಲಿ ಮನೆಯಿಂದ ಹೊರಬರಬೇಡಿ, ಒಂದು ವೇಳೆ ಬಂದರೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳಿ ಎಂದು ಮುಖ್ಯಮಂತ್ರಿ, ಸಚಿವರು ಸೇರಿ ವೈದ್ಯರು ಸಹ ಹೇಳುತ್ತಲೇ ಇದ್ದಾರೆ. ಆದರೆ, ನಿತ್ಯ ಸಾರ್ವಜನಿಕ ಸೇವೆಗೆ ಹಾಜರಾಗುವ ಈ ನೌಕರರಿಗೆ ಯಾವುದೇ ಸುರಕ್ಷತೆಯನ್ನು ನೀಡಿಲ್ಲ. ಬದಲಿಗೆ 12 ಗಂಟೆಗಳು ಆನ್‌ ಡ್ಯೂಟಿಯಲ್ಲಿ ಇರಬೇಕು ಎಂದು ಸುತ್ತೋಲೆ ಹೊರಡಿಸಿದ್ದು, ಅದರಲ್ಲಿ 2+2 ಗಂಟೆಗಳು (ನಾಲ್ಕು ಗಂಟೆಗೆ ಒಂದು ಬಾರಿ ವಿಶ್ರಾಂತಿ)  ಬಸ್‌ನಲ್ಲೇ ವಿಶ್ರಾಂತಿ ತೆಗೆದುಕೊಳ್ಳಿ ಎಂದು ತಿಳಿಸಿದ್ದಾರೆ.

ಅಂದರೆ ಮುಂಜಾನೆ 5 ಗಂಟೆ ಸುಮಾರಿಗೆ ಮನೆ ಬಿಡುವ ನೌಕರರು ಮತ್ತೆ ಮನೆಗೆ ಬರಬೇಕಾದರೆ ರಾತ್ರಿ ಎಂಟೂವರೆ ಗಂಟೆ ಆಗಲಿದೆ. ಇದರಿಂದ ನಿತ್ಯ ಯಾತನೆ ಅನುಭವಿಸುತ್ತಿದ್ದಾರೆ. ಇತ್ತ ಮನೆಯಲ್ಲಿ ಇರುವ ವೃದ್ಧ ತಂದೆ-ತಾಯಿ  ಮತ್ತು 10 ವರ್ಷದೊಳಿಗಿರುವ ಮಕ್ಕಳ ಸಮಸ್ಯೆಗೂ ಸ್ಪಂದಿಸಲಾಗದ ಸ್ಥಿತಿಗೆ ಬಂದಿದ್ದಾರೆ.

ಈ ನಡುವೆ ಪ್ರತಿ ಡಿಪೋದಲ್ಲಿರುವ ಎಲ್ಲಾ ಬಸ್‌ಗಳು ಕಾರ್ಯಾಚರಣೆ ಮಾಡದಿರುವುದರಿಂದ ಸೇವೆಗೆ ಹಾಜರಾಗುವ ಎಲ್ಲಾ ನೌಕರರಿಗೂ ಡ್ಯೂಟಿ ಕೊಡಲು ಸಾಧ್ಯವಾಗುತ್ತಿಲ್ಲ. ಹೀಗಾಗಿ ಪ್ರತಿ ಡಿಪೋದಲ್ಲಿ ಶೇ.60  ನೌಕರರಿಗಷ್ಟೇ  ಡ್ಯೂಟಿ ಸಿಗುತ್ತಿದೆ. ಇನ್ನು ವಾರದ ರಜೆ ಇರುವವರನ್ನು ಹೊರತು ಪಡಿಸಿ ನಿತ್ಯ ಕರ್ತವ್ಯಕ್ಕೆ ಹಾಜರಾಗುವ ಶೇ.15ರಷ್ಟು  ನೌಕರರಿಗೆ ಡಿಪೋದಲ್ಲೇ ಬೆಳಗ್ಗೆ 6.30ರಿಂದ ಸಂಜೆ 4ಗಂಟೆ ವರೆಗೆ ಇರಿಸಿಕೊಂಡು ಹಾಜರಾತಿ ಪುಸ್ತಕದಲ್ಲಿ ಸಹಿ ಮಾಡಿಸಿಕೊಳ್ಳುತ್ತಿದ್ದಾರೆ.

ಇದರ ಬದಲು ಬೆಳಗ್ಗೆ 6 ಗಂಟೆಯಿಂದಲೇ ಚಾಲನೆಗೊಳಿಸುವ ಟ್ರಿಪ್‌ಗಳನ್ನು ಈ ಹಿಂದಿನಂತೆ  ಪಾಳಿಯಲ್ಲಿ ಆಪರೇಟ್‌ ಮಾಡಿದರೆ ಎಲ್ಲಾ ನೌಕರರಿಗೂ ಸೇವೆಗೆ ಹಾಜರಾಗಲು ಅವಕಾಶ ಸಿಗುತ್ತದೆ. ಜತೆಗೆ ಒಂದೇ ಸಮನೆ 12 ಗಂಟೆಗಳು ಆನ್‌ ಡ್ಯೂಟಿಯಲ್ಲಿ ಇರುವ ಬದಲಿಗೆ 8 ಗಂಟೆಗಳು ಸೇವೆ ಮಾಡಿದಂತಾಗುತ್ತದೆ. ಇನ್ನು ನೌಕರರಿಗೂ ಆಯಾಸವಾಗುವುದು ತಪ್ಪುತ್ತದೆ.

ಇನ್ನು ಡ್ಯೂಟಿಗೆ ಎಂದು ಬರುವ ನೌಕರರಿಗೆ ಕೆಲಸ ಕೊಡದೆ ಡಿಪೋದಲ್ಲೇ ಇರಿಕೊಂಡು ಹಾಜರಿಕೊಟ್ಟು ಕಳುಹಿಸುವ ಪರಿಪಾಠವಿದೆ. ಇನ್ನು ನೌಕರರು ಡಿಪೋದಲ್ಲೇ ಸುಮ್ಮನೆ ಕುಳಿತು ಕಾಲ ಕಳಿಯಲಾಗದೆ ಒಂದುರೀತಿಯ ಯಾತನೆ ಅನುಭವಿಸುತ್ತಿದ್ದಾರೆ. ಇತ್ತ ಡ್ಯೂಟಿಗೆ ಹಾಜರಾಗುವವರು 12 ಗಂಟೆ ಅದರಲ್ಲಿ 2+2 ಗಂಟೆ ವಿಶ್ರಾಂತಿಯನ್ನು ಬಸ್‌ನಲ್ಲೇ ತೆದುಕೊಳ್ಳುವಂತೆ ಸೂಚನೆ ನೀಡಿರುವುದರಿಂದ ಬಸ್‌ನಲ್ಲೇ ಕುಳಿದುಕೊಂಡು ಬೆನ್ನುನೋವು, ಸೊಂಟ ನೋವಿನಂತ ಸಮಸ್ಯೆಯಿಂದ ಬಳಲುತ್ತಿದ್ದಾರೆ.

ಇದರ ಬದಲಿಗೆ ಪಾಳಿಲೆಕ್ಕದಲ್ಲಿ ಬಸ್‌ಗಳ ಕಾರ್ಯಾಚರಣೆ ಮಾಡಿದರೆ ಎಲ್ಲಾ ನೌಕರರಿಗೂ ಡ್ಯೂಟಿ ಸಿಗುವುದರ ಜತೆಗೆ ಹಲವು ಸಮಸ್ಯೆಯಿಂದ ನೌಕರರು ಬಳಲುವುದು ತಪ್ಪುತ್ತದೆ. ಅದು ಅಲ್ಲದೆ ಕೊರೊನಾ ಸೋಂಕು ಹೆಚ್ಚಾಗಿ ಹರಡುತ್ತಿರುವ ಇಂಥ ಸಮಯದಲ್ಲಿ ಈ ಹಿಂದಿನಂತೆ (ಕೊರೊನಾ ಸೋಂಕು ಹರಡುವುದಕ್ಕೂ ಮುಂಚೆ ಇದ್ದಂತೆ) ಕೆಲಸ ನಿರ್ವಹಿಸಲು ಅನುಕೂಲವಾಗುತ್ತದೆ.

ಇನ್ನು ನೌಕರರ ಆರೋಗ್ಯದ ದೃಷ್ಟಿಯಿಂದ ಈ ಹಿಂದೆ ಕೊಡುತ್ತಿದ್ದ 8 ಗಂಟೆ ಡ್ಯೂಟಿ ಬದಲಿಗೆ 6 ಗಂಟೆಗೆ ಸೀಮಿತಗೊಳಿಸಿದರೆ ಪ್ರತಿ ನೌಕರರೂ ಕೆಲಸಕ್ಕೆ ಹಾಜರಾಗಲು ಅನುವು ಮಾಡಿಕೊಟ್ಟಂತಾಗುತ್ತದೆ.  ಆದರೆ ಸಂಸ್ಥೆಯ ಅಧಿಕಾರಿಗಳ ಬೇಜವಾಬ್ದಾರಿಯಿಂದ ಕೆಲ ನೌಕರರಿಗೆ 12 ಗಂಟೆ ಆನ್‌ ಡ್ಯೂಟಿ ಇನ್ನು ಕೆಲ ನೌಕರರಿಗೆ ಡ್ಯೂಟಿ ಇಲ್ಲದೆ ವಾಪಸ್‌ ಮನೆಗೂ ಹೋಗಲಾಗದೇ ಡಿಪೋದಲ್ಲೇ ಕಾಲ ಕಳೆಯುವ ಕೆಲಸ.

ಬಿಎಂಟಿಸಿಯ ಕೆಲ ಅಧಿಕಾರಿಗಳ  ಮೂರ್ಖತನದಿಂದ ಬಿಎಂಟಿಸಿಯ ಎಲ್ಲಾ ನೌಕರರು ಒಂದು ರೀತಿಯ ಯಮಯಾತನೆ ಅನುಭವಿಸುವಂತಾಗಿದೆ.

ಶೌಚಾಲಯದ ಸಮಸ್ಯೆ
12 ಗಂಟೆಗಳು ಆನ್‌ ಡ್ಯೂಟಿಯಲ್ಲಿ ನೌಕರರು ಅದರಲ್ಲೂ ಮಹಿಳಾ ನೌಕರರು ಇರುವುದರಿಂದ ಅವರಿಗೆ ನಿತ್ಯ ಕರ್ಮಗಳನ್ನು ಪೂರೈಸಿಕೊಳ್ಳಲು ವಿಶ್ರಾಂತಿ ತೆಗೆದುಕೊಳ್ಳಲು ಸೂಚಿಸಿರುವ ಬಸ್‌ ನಿಲ್ದಾಣಗಳಲ್ಲಿ ಸರಿಯಾದ ಶೌಚಾಲಯವಿಲ್ಲದೆ, (ಇನ್ನು ಕೆಲವು ಕಡೆ ಶೌಚಾಲಯಗಳೇ ಇಲ್ಲ) ತುಂಬ ಯಾತನೆ ಅನುಭವಿಸುತ್ತಿದ್ದಾರೆ. ಇನ್ನು ಕೆಲವು ಕಡೆ ಇರುವ ಶೌಚಾಲಯಗಳು ಬಳಕೆಗೆ ಯೋಗ್ಯವಾಗಿಲ್ಲ.

ಸಿಟಿ ಮಾರುಕಟ್ಟೆ, ಹೆಬ್ಬಾಳ , ಅತ್ತಿಬೆಲೆ, ಚಂದಾಪುರ, ಟಿನ್‌ಫ್ಯಾಕ್ಟರಿ ಮಾರತ್‌ಹಳ್ಳಿ ನಿಲ್ದಾಣಗಳಲ್ಲಿ ಶೌಚಾಲಯಗಳೇ ಇಲ್ಲ. ಇನ್ನು ಸಾರ್ವಜನಿಕ ಶೌಚಾಲಯಗಳಿಗೆ ಹೋದರೆ ಒಂದುಬಾರಿಗೆ  5 ರೂ. ಪೇ ಮಾಡಬೇಕು. ಅದೇರೀತಿ 12 ಗಂಟೆಗಳಲ್ಲಿ ಕನಿಷ್ಠ 3-4 ಬಾರಿ ಹೋದರೆ 15ರಿಂದ 20 ರೂ. ಕೊಡಬೇಕಿದೆ.