ಚಿನ್ನ ಇಂದು ಬಲುಭಾರ: 1ಗ್ರಾಂ 22K ಚಿನ್ನದ ಬೆಲೆ ₹1275 ಏರಿಕೆ, ಬೆಳ್ಳಿ ₹20 ಸಾವಿರ ಏರಿಕೆ
ಬೆಳಗ್ಗೆ 9:45ರ ವೇಳೆಗೆ 1ಗ್ರಾಂ 24K ಚಿನ್ನದ ಬೆಲೆ1391 ರೂ. ಹಾಗೂ 1ಗ್ರಾಂ 22K ಚಿನ್ನದ ಬೆಲೆ 1275 ರೂ. ಏರಿಕೆಯಾಗಿ ದೆ. ಇನ್ನು 1 ಕೆಜಿ ಬೆಳ್ಳಿ ದರ 20 ಸಾವಿರ ರೂ. ಏರಿಕೆಯಾಗಿದೆ. ಮಧ್ಯಾಹ್ನ 3:30ರ ವೇಳೆಗೆ ಈ ದರ ಮತ್ತಷ್ಟು ಏರಿಳಿತವಾಗುವ ಸಾಧ್ಯತೆಯಿದೆ ಎಂದು ಹೇಳಲಾಗುತ್ತಿದೆ.
ಮುಂಬೈ: ಚಿನ್ನ ಮತ್ತು ಬೆಳ್ಳಿ ಮೇಲಿನ ಆಮದು ಸುಂಕ (Gold, Silver Import Duty) ಏರಿಕೆಯಾದ ಬೆನ್ನಲ್ಲೇ ಎಂಸಿಎಕ್ಸ್ನಲ್ಲಿ (MCX – Multi Commodity Exchange) ಫ್ಯೂಚರ್ ಚಿನ್ನ, ಬೆಳ್ಳಿ ದರ ಏರಿಕೆಯಾಗಿದೆ.
ಬೆಳಗ್ಗೆ 9:45ರ ವೇಳೆಗೆ 1ಗ್ರಾಂ 24K ಚಿನ್ನದ ಬೆಲೆ1391 ರೂ. ಏರಿಕೆಯಾಗಿ ₹16,789 ಇದೆ ಹಾಗೂ 1ಗ್ರಾಂ 22K ಚಿನ್ನದ ಬೆಲೆ 1275 ರೂ. ಏರಿಕೆಯಾಗಿ ₹15,390 ಇದೆ. ಇನ್ನು 1 ಕೆಜಿ ಬೆಳ್ಳಿ ದರ 20 ಸಾವಿರ ರೂ. ಏರಿಕೆಯಾಗಿ 310000 ಇದೆ. ಮಧ್ಯಾಹ್ನ 3:30ರ ವೇಳೆಗೆ ಈ ದರ ಮತ್ತಷ್ಟು ಏರಿಳಿತವಾಗುವ ಸಾಧ್ಯತೆಯಿದೆ ಎಂದು ಹೇಳಲಾಗುತ್ತಿದೆ.
ಎಂಸಿಎಕ್ಸ್ ನಲ್ಲಿ ಹೇಗಿದೆ?: ಎಂಸಿಎಕ್ಸ್ ಚಿನ್ನದ ವ್ಯವಹಾರವು ಭೌತಿಕ ಚಿನ್ನದ ಬದಲಿಗೆ, ಎಲೆಕ್ಟ್ರಾನಿಕ್ ರೂಪದಲ್ಲಿ ಚಿನ್ನದ ಬೆಲೆ ಏರಿಳಿತಗಳ ಮೇಲೆ ‘ಫ್ಯೂಚರ್ಸ್’ (Futures) ಒಪ್ಪಂದಗಳ ಮೂಲಕ ವ್ಯಾಪಾರ ಮಾಡುವ ವೇದಿಕೆಯಾಗಿದೆ. ಇದು ಹೂಡಿಕೆದಾರರಿಗೆ ಚಿನ್ನದ ಬೆಲೆ ಏರಿಳಿತದಿಂದ ಲಾಭ ಪಡೆಯಲು (Speculation) ಅಥವಾ ಹೆಡ್ಜಿಂಗ್ ಮಾಡಲು ಅನುವು ಮಾಡಿಕೊಡುತ್ತದೆ.
ಇಲ್ಲಿ ಚಿನ್ನವನ್ನು ಭೌತಿಕವಾಗಿ ಖರೀದಿಸದೇ ಭವಿಷ್ಯದ ದಿನಾಂಕದಂದು ನಿಗದಿತ ಬೆಲೆಯಲ್ಲಿ ಚಿನ್ನವನ್ನು ಖರೀದಿಸಲು ಅಥವಾ ಮಾರಾಟ ಮಾಡಲು ಒಪ್ಪಂದ ಮಾಡಿಕೊಳ್ಳಲಾಗುತ್ತದೆ. ಜಾಗತಿಕ ರಾಜಕೀಯ ಮತ್ತು ಆರ್ಥಿಕ ಸುದ್ದಿಗಳ ಆಧಾರದ ಮೇಲೆ ಬೆಲೆಗಳು ಇಲ್ಲಿ ವೇಗವಾಗಿ ಬದಲಾಗುತ್ತಿರುತ್ತದೆ.
ಬೆಲೆ ಹೇಗೆ ಪ್ರಭಾವಿತವಾಗುತ್ತದೆ?: ಎಂಸಿಎಕ್ಸ್ ಮಾರುಕಟ್ಟೆಯಲ್ಲಿ ಚಿನ್ನದ ಫ್ಯೂಚರ್ಸ್ ದರಗಳು ಹೆಚ್ಚಾದಾಗ, ಸ್ಥಳೀಯ ಚಿನ್ನದ ಒಕ್ಕೂಟಗಳು (Bullion Associations) ಮತ್ತು ಜ್ಯುವೆಲ್ಲರಿ ವ್ಯಾಪಾರಿಗಳು ಸಹ ಭೌತಿಕ ಚಿನ್ನದ ದರವನ್ನು ಹೆಚ್ಚಿಸುತ್ತಾರೆ. ಅದೇ ರೀತಿ ಎಂಸಿಎಕ್ಸ್ನಲ್ಲಿ ದರ ಇಳಿಕೆಯಾದರೆ ಅಂಗಡಿಗಳಲ್ಲೂ ಬೆಲೆ ತಗ್ಗುತ್ತದೆ.
ಎಂಸಿಎಕ್ಸ್ ದರವು ಅಂತರರಾಷ್ಟ್ರೀಯ ಚಿನ್ನದ ಬೆಲೆ ಮತ್ತು ಯುಎಸ್ ಡಾಲರ್ ಎದುರು ರೂಪಾಯಿ ಮೌಲ್ಯದ ಆಧಾರದ ಮೇಲೆ ಬದಲಾಗುತ್ತದೆ. ಈ ಬದಲಾವಣೆಗಳು ತಕ್ಷಣವೇ ಸ್ಥಳೀಯ ಮಾರುಕಟ್ಟೆಗೆ ವರ್ಗಾವಣೆಯಾಗುತ್ತವೆ.
ಏನಿದು ಎಂಸಿಎಕ್ಸ್?: ಮಲ್ಟಿ ಕಮಾಡಿಟಿ ಎಕ್ಸ್ಚೇಂಜ್ ಎಂಬುದು ಭಾರತದ ಅತಿದೊಡ್ಡ ಸರಕು ಉತ್ಪನ್ನಗಳ (Commodity Derivatives) ವಿನಿಮಯ ಕೇಂದ್ರವಾಗಿದೆ. ಇದು ಚಿನ್ನ, ಬೆಳ್ಳಿ, ಕಚ್ಚಾ ತೈಲ, ನೈಸರ್ಗಿಕ ಅನಿಲ ಮತ್ತು ಕೃಷಿ ಉತ್ಪನ್ನಗಳಂತಹ ವಸ್ತುಗಳನ್ನು (Commodities) ಡಿಜಿಟಲ್ ರೂಪದಲ್ಲಿ ಕೊಳ್ಳಲು ಮತ್ತು ಮಾರಾಟ ಮಾಡಲು ಅವಕಾಶ ನೀಡುವ ಮಾರುಕಟ್ಟೆ.
ಇದು ಷೇರು ಮಾರುಕಟ್ಟೆಯ (NSE/BSE) ತರಹವೇ ಕಾರ್ಯನಿರ್ವಹಿಸುತ್ತದೆ, ಆದರೆ ಇಲ್ಲಿ ಷೇರುಗಳ ಬದಲಿಗೆ ಸರಕುಗಳ ಮೇಲೆ ವಹಿವಾಟು ನಡೆಯುತ್ತದೆ. ಇಲ್ಲಿ ಹೂಡಿಕೆದಾರರು ಭವಿಷ್ಯದ ದಿನಾಂಕದಂದು ಸರಕುಗಳನ್ನು ಕೊಳ್ಳಲು ಅಥವಾ ಮಾರಾಟ ಮಾಡಲು ಒಪ್ಪಂದ (Futures Contract) ಮಾಡಿಕೊಳ್ಳುತ್ತಾರೆ. ಇದು ಸೆಕ್ಯುರಿಟೀಸ್ ಅಂಡ್ ಎಕ್ಸ್ಚೇಂಜ್ ಬೋರ್ಡ್ ಆಫ್ ಇಂಡಿಯಾ (SEBI) ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತದೆ.
