ವಿಜಯಪಥ ಸಮಗ್ರ ಸುದ್ದಿ
ಮೈಸೂರು: ನಗರ ಮತ್ತು ನಗರದ ಸುತ್ತಮುತ್ತ ನಿಲ್ಲಿಸಿ ತಮ್ಮ ಕಾರ್ಯಕ್ಕೆ ತೆರಳಿದ ಬಳಿಕ ಕ್ಷಣಾರ್ಧದಲ್ಲೇ ಕಾರುಗಳನ್ನು ಕದಿಯುತ್ತಿದ್ದ ಚೋರನನ್ನು ಲಷ್ಕರ್ ಠಾಣೆ ಪೊಲೀಸರು ಬಂಧಿಸಿ, 7 ಲಕ್ಷ ರೂ. ಮೌಲ್ಯದ ಕಾರನ್ನು ವಶಪಡಿಸಿಕೊಂಡಿದ್ದಾರೆ.
ಪಾಂಡವಪುರ ತಾಲೂಕಿನ ಬನ್ನಘಟ್ಟ ಗ್ರಾಮದ ಸತೀಶ್ (22) ಬಂಧಿತ ಆರೋಪಿ. ಕಳೆದ ಫೆ.28ರಂದು ಸಂಜೆ 6ರ ಸಮಯದಲ್ಲಿ ಗೌತಮ್ ಶೇಖರ್ ಎಂಬುವರು ಬಟ್ಟೆ ಖರೀದಿಸಲು ತಮ್ಮ ಮಾರುತಿ ಸ್ವೀಫ್ಟ್ ಕಾರಿನಲ್ಲಿ ತಮ್ಮ ಮನೆಯವರ ಜತೆ ಮೈಸೂರಿನ ಕರ್ನಾಟಕ ಸಿಲ್ಕ್ಸ್‌ಗೆ ಬಂದಿದ್ದರು.
ಬಟ್ಟೆ ಖರೀದಿ ನಂತರ ಅಲ್ಲಿಂದ ಸುಮಂಗಲಿ ಸಿಲ್ಕ್ಸ್‌ಗೆ ಬಂದು, ಕಾರನ್ನು ಆರ್‌ಆರ್ ಹೋಟೆಲ್ ಮುಂದೆ ನಿಲ್ಲಿಸಿದ್ದರು. ಶಾಪಿಂಗ್ ಮುಗಿಸಿ ಬಂದು ನೋಡಿದಾಗ ಕಾರು ನಾಪತ್ತೆಯಾಗಿತ್ತು. ಈ ಸಂಬಂಧ ಲಷ್ಕರ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.
ತನಿಖೆ ಕೈಗೊಂಡ ಪೊಲೀಸರು ಪಾಂಡುವಪುರದ ಮಾದೇಗೌಡನ ಹಳ್ಳಿಯಲ್ಲಿ ಸತೀಶನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಕಾರು ಕಳವು ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾನೆ.
ಡಿಸಿಪಿ ಗೀತಾ ಪ್ರಸನ್ನ, ದೇವರಾಜ ವಿಭಾಗದ ಎಸಿಪಿ ಶಶಿಧರ್ ಮಾರ್ಗದರ್ಶನದಲ್ಲಿ ಲಷ್ಕರ್ ಪೊಲೀಸ್ ಠಾಣೆಯ ಸುರೇಶ್ ಕುಮಾರ್, ಪಿಎಸ್‌ಐಗಳಾದ ಗೌತಮ್ ಗೌಡ, ಧನಲಕ್ಷ್ಮೀ, ಸಿಬ್ಬಂದಿ ಬೋಪಯ್ಯ, ಮಹದೇವಸ್ವಾಮಿ, ಲೋಕೇಶ್, ಮಂಜುನಾಥ್, ಚಿನ್ನಪ್ಪ, ಪ್ರತೀಪ, ಮಂಜುನಾಥ್ ಕಾರ್ಯಾಚರಣೆಯಲ್ಲಿ ಭಾಗಿಯಾಗಿದ್ದರು.
