ಬೆಳಗಾವಿ: ಈಗ ಎಲ್ಲ ಕಡೆ ಸಕ್ಕರೆ ಕಾರ್ಖಾನೆಗಳು ಪ್ರಾರಂಭವಾಗಿದ್ದು ಕಬ್ಬು ತುಂಬಿದ ಟ್ರ್ಯಾಕ್ಟರ್, ಟ್ರೇಲರ್, ಟ್ರಕ್ ಹಾಗೂ ಎತ್ತಿನ ಗಾಡಿಗಳು ರಸ್ತೆ ತುಂಬಾ ಓಡಾಡುತ್ತಿವೆ ಹಾಗೂ ನಿರಂತರ ಮಳೆಯ ಕಾರಣದಿಂದ ರಸ್ತೆಗಳು ಸಹ ತುಂಬಾ ಹದಗೆಟ್ಟಿದ್ದು ಕಾರಣ ದ್ವಿಚಕ್ರ ವಾಹನ ಅಥವಾ ಇನ್ನಾವುದೆ ವಾಹನ ಚಲಾಯಿಸುವಾಗ ತುಂಬಾ ಜಾಗರುಕತೆ ಮತ್ತು ಎಚ್ಚರಿಕೆ ವಹಿಸುವುದು ಮುಖ್ಯ ಎಂದು ಬೆಳಗಾವಿ ಜಿಲ್ಲಾ ಪೊಲೀಸರು ತಿಳಿಸಿದ್ದಾರೆ.
ಈ ಬಗ್ಗೆ ಹೇಳಿಕೆ ಬಿಡುಗಡೆ ಮಾಡಿರುವ ಅವರು, ಕಬ್ಬು ತುಂಬಿದ ಟ್ರ್ಯಾಕ್ಟರ್ ಟ್ರೇಲರ್ ಹಾಗೂ ಎತ್ತಿನ ಗಾಡಿಗಳು ರಸ್ತೆ ಬದಿಯಲ್ಲಿ ನಿಂತಾಗ ಅವುಗಳಿಗೆ ಯಾವುದೇ ರಿಪ್ಲೇಕ್ಟರ್ ಮತ್ತು ಇಂಡಿಕೆಟರ್ ಇಲ್ಲ ಹಾಗೆ ನಿಂತ ವಾಹನಗಳು ರಾತ್ರಿ ವೇಳೆ ನಮ್ಮ ಕಣ್ಣಿಗೆ ಕಾಣುವುದಿಲ್ಲ ಇದರಿಂದ ಘೋರ ಹಾಗೂ ಮಾರಣಾಂತಿಕ ಅಪಘಾತಗಳು ನಡೆಯುತ್ತಿವೆ.
ಬೆಳಗಾವಿ ಜಿಲ್ಲಾ ಪೊಲೀಸ್ ಇಲಾಖೆಯಿಂದ ಟ್ರ್ಯಾಕ್ಟರ್ ಮಾಲೀಕರು ಮತ್ತು ಚಾಲಕರಲ್ಲಿ ಜಾಗ್ರತೆ ಮೂಡಿಸಿ ರಿಪ್ಲೇಕ್ಟರ್ ಗಳನ್ನು ಅಳವಡಿಸುವ ಕಾರ್ಯ ಪ್ರತಿ ವರ್ಷವೂ ನಡೆಯುತ್ತಿದೆ. ಆದರೂ ಈ ಬಗ್ಗೆ ನಿರಂತರವಾಗಿ ಜಾಗ್ರತೆ ಮೂಡಿಸುವ ಅವಶ್ಯಕತೆ ಇದೆ ಎಂದು ತಿಳಿಸಿದ್ದಾರೆ.
ಇನ್ನು ರಾತ್ರಿ ವೇಳೆಯಾಗಲಿ ಅಥವಾ ಹಗಲು ಹೊತ್ತಿನಲ್ಲಿ ಆಗಲಿ ವಾಹನವನ್ನು ನಿಧಾನವಾಗಿ ಮತ್ತು ಜಾಗೃತೆಯಿಂದ ಚಲಾಯಿಸಿ. ಅದರ ಜತೆಗೆ 1) ವಾಹನ ನೋಂದಣಿ 2) ವಾಹನ ವಿಮೆ 3) ಡ್ರೈವಿಂಗ್ ಲೈಸನ್ಸ್ 4) ಹೆಲ್ಮೆಟ್ 5) ಸೀಟ್ ಬೆಲ್ಟ್ ಕಡ್ಡಾಯವಾಗಿರಲಿ ಎಂದು ವಿನಂತಿಸಿದ್ದಾರೆ.
ಇನ್ನು ಪ್ರಮುಖವಾಗಿ ಮದ್ಯಪಾನ ಮಾಡಿ ವಾಹನ ಚಲಾಯಿಸಬೇಡಿ. ವಾಹನ ಚಲಾಯಿಸುವಾಗ ಮೊಬೈಲ್ ಬಳಕೆ ಬೇಡ. ಕಬ್ಬು ಸಾಗಾಟದ ವಾಹನಗಳಲ್ಲಿ ಅಬ್ಬರದ ಸಂಗೀತ ಅಳವಡಿಕೆ ಶಿಕ್ಷಾರ್ಹ ಅಪರಾಧ. ರಸ್ತೆಯಲ್ಲಿ ವಾಹನ ಚಲಾಯಿಸುವಾಗ ಸುರಕ್ಷಿತ ಅಂತರ ಇರಲಿ ಎಂದು ತಿಳಿಸಿದ್ದಾರೆ.
