ಬೀಡನಹಳ್ಳಿ: ತಿ.ನರಸೀಪುರ ತಾಲೂಕು ಬನ್ನೂರು ಹೋಬಳಿಯ ಬೀಡನಹಳ್ಳಿ ಗ್ರಾಮ ದೇವತೆ ಬೀಡನಹಳ್ಳಿ ಮಾರಮ್ಮನ ದೇವಿಯ ವೀರಹಬ್ಬ ಸಡಗರ ಸಂಭ್ರಮದಿಂದ ಜರುಗಿತು.
ಗ್ರಾಮದಲ್ಲಿ ಪ್ರತಿವರ್ಷದಂತೆ ಕಡೆ ಕಾರ್ತಿಕ ಸೋಮವಾರದ ನಂತರ ಜರುಗುವ ವೀರಹಬ್ಬ ಡಿ.3 ಮತ್ತ ಡಿ.4ರಂದು ಗ್ರಾಮದ ಮುಖಂಡರು ಆಯೋಜನೆ ಮಾಡಿದ್ದು, ಅದರಂತೆ ಸಂಭ್ರಮ ಸಡಗರದಿಂದ ನರವೇರಿತು.
ಬನ್ನೂರು ಹೆಗ್ಗೆರೆಯಿಂದ ಮಂಗಳವಾರ ಸಂಜೆ ಮಜ್ಜನದ ಗಂಗೆ ತಂದು ಪೂಜೆಗಳನ್ನು ಕಟ್ಟಲಾಯಿತು. ಬುಧವಾರ ಮುಂಜಾನೆ ಪೂಜೆಗಳನ್ನು ಹೂ ಹೊಂಬಾಳೆಯಿಂದ ಅಲಂಕರಿಸಿ ಬಾಯಿಬೀಗ ಇರುವವರು ಮಡಿವಂತಿಕೆಯಿಂದ ಒಪ್ಪತ್ತು ಇದ್ದು ಗ್ರಾಮ ದೇವಿಗೆ ಬಾಯಿಬೀಗ ಸೇವೆ ಮಾಡಿ ಹರಕೆ ತೀರಿಸಿದರು.
ಈ ಹಬ್ಬದ ಪ್ರಮುಖ ವಿಷಯವಾದ ವೀರರ ಕುಣಿತ ಅಭಿಮಾನಿಗಳ ಸೂರೆಗೊಂಡಿತು. ಹೌದು ಪ್ರತಿ ವರ್ಷವೂ ನಂಜಾಪುರ ಗ್ರಾಮದ ವೀರರು ಬಂದು ಈ ಸಾಂಪ್ರದಾಯಿಕ ಹಾಗೂ ಸಾಸ್ಕೃತಿಕ ಕಾರ್ಯವನ್ನು ನಡೆಸಿಕೊಡುತ್ತಾರೆ. ಅದರಂತೆ ಪ್ರತಿ ವರ್ಷವರು ಅವರಿಗೆ ಸಂಭಾವನೆ ಕೊಡುವ ಮೂಲಕ ಆಮಂತ್ರಣ ನೀಡಿ ಕರೆಯಲಾಗುತ್ತದೆ.
ಬೀಡನಹಳ್ಳಿ ಗ್ರಾಮದ ಮುಖಂಡರ ಆಹ್ವಾನವನ್ನು ಸ್ವೀಕರಿಸಿ ಈ ಹಬ್ಬಕ್ಕೆ ಕಳಸಪ್ರಾಯವಾದ ವೀರರ ಕುಣಿತವನ್ನು ಮಾಡುವ ಮೂಲಕ ಹಬ್ಬಕ್ಕೆ ಮೆರುಗನ್ನು ನೀಡುತ್ತ ಬಂದಿದ್ದಾರೆ. ಅದರಂತೆ ಮಂಗಳವಾರ ರಾತ್ರಿಯಿಂದ ಬುಧವಾರ ಮುಂಜಾನೆ ವರೆಗೂ ತಮ್ಮ ವೀರರ ಪ್ರದರ್ಶನವನ್ನು ಸಾಂಸ್ಕೃತಿಕವಾಗಿ ತೋರಿಸಿ ಹಾಡು ಕುಣಿತದೊಂದಿಗೆ ಮನರಂಜನೆ ಜತೆಗೆ ಭಕ್ತಿಯನ್ನು ಸಾರುವ ಕೈಂಕರ್ಯವನ್ನು ನೆರವೇರಿಸಿದರು.
ಇನ್ನು ಗ್ರಾಮದಲ್ಲಿ ಎರಡು ದಿನಗಳು ಜರುಗಿದ ಈ ಹಬ್ಬಕ್ಕೆ ಗ್ರಾಮಸ್ಥರು ಸೇರಿದಂತೆ ಅಕ್ಕಪಕ್ಕದ ಗ್ರಾಮಗಳ ನೂರಾರು ಭಕ್ತರು ಆಗಮಿಸಿ ದೇವಿಯ ದರ್ಶನ ಪಡೆದೆ. ಜತೆಗೆ ನಯನಮನೋಹರವಾದ ವೀರರ ಕುಣಿತವನ್ನು ರಾತ್ರಿ ಪೂರ್ತಿ ಕಣ್ತುಂಬಿಕೊಂಡರು. ಬುಧವಾರ ಬೆಳಗ್ಗೆ ಗ್ರಾಮದ ಪ್ರತಿ ಮನೆಯ ಹೆಂಗಳೆಯದರು ತಂಬಿಟ್ಟಿನ ಆರತಿಯೊಂದಿಗೆ ಬಂದು ಮಾರಮ್ಮ ದೇವಿಗೆ ಸಾಮೂಹಿಕವಾಗಿ ಪೂಜೆ ನೆರವೇರಿಸುವ ಮೂಲಕ ಹಬ್ಬ ಪೂರ್ಣಗೊಳಿಸಿದರು.
