ಮೈಸೂರು: ಮಾಜಿ ಸಚಿವ ವಿಧಾನಪರಿಷತ್‌ ಬಿಜೆಪಿ ಸದಸ್ಯ ಎಚ್‌.ವಿಶ್ವನಾಥ್‌ ಸಚಿವರಾಗಲು ಅರ್ಹರಲ್ಲ ಎಂದು ಹೈ ಕೋರ್ಟ್‌ ತೀರ್ಪು ನೀಡಿರುವುದು ಇದು ದೇವರುಕೊಟ್ಟ ಶಿಕ್ಷೆ ಎಂದು ಮಾಜಿ ಸಚಿವ ಸಾ.ರಾ.ಮಹೇಶ್‌ ಹೇಳಿದ್ದಾರೆ.
ಹೈಕೋರ್ಟ್‌ ಮಧ್ಯತಂರ ಆದೇಶ ನೀಡಿದ ಹಿನ್ನೆಲೆಯಲ್ಲಿ ಇಂದು ಚಾಮುಂಡಿ ಬೆಟ್ಟಕ್ಕೆ ಆಗಮಿಸಿ ದೇವಿಯ ದರ್ಶನ ಪಡೆದರು. ಬಳಿಕ ಕ್ಷೇತ್ರವನ್ನು ಸಾಕ್ಷಿಯಾಗಿಸಿದ್ದಕ್ಕೆ 1,001 ರೂ. ತಪ್ಪು ಕಾಣಿಕೆ ಹಾಕಿದರು. ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಪ್ರಸಂಗ ನಡೆದ ಸರಿಯಾಗಿ ಒಂದು ವರ್ಷಕ್ಕೆ ನ್ಯಾಯ ದೇವತೆ ತೀರ್ಪು ಕೊಟ್ಟಿದ್ದಾಳೆ ಎಂದು ತಿಳಿಸಿದರು.
ನಮ್ಮಂಥ ಸಾರ್ವಜನಿಕ ಜೀವದಲ್ಲಿ ಇರುವವರಿಗೆ ತಪ್ಪು ಮಾಡಿದಾಗ ಸಾಕ್ಷಿಗಳಿರೊಲ್ಲ. ಕೆಲ ಸಂದರ್ಭದಲ್ಲಿ, ಆಗ ದೇವರನ್ನು ಕರೆಯುತ್ತೇವೆ. ಅದರಂತೆ ಎಚ್‌.ವಿಶ್ವನಾಥ್‌ ಅವರು ಕಳೆದ ವರ್ಷ ನಮ್ಮ ಪಕ್ಷವನ್ನು ಬಿಟ್ಟು ಬೇರೆ ಪಕ್ಷಕ್ಕೆ ಹೋಗಿದ್ದರು. ಈ ವೇಳೆ ನನ್ನಿಂದಲೇ ಪಕ್ಷ ಬಿಟ್ಟಿದ್ದೇನೆ ಎಂದು ಆರೋಪ ಮಾಡಿದ್ದರು. ಆದರೆ ನಾನು ಹೇಳಿದೆ ನನ್ನಿಂದ ಅವರು ಪಕ್ಷ ಬಿಟ್ಟಿಲ್ಲ. ಅವರು ಅಧಿಕಾರದ ಆಸೆ, ವೈಯಕ್ತಿಕ ಇಚ್ಚಾಶಕ್ತಿಗಾಗಿ ಪಕ್ಷ ಬಿಟ್ಟಿದ್ದಾರೆ ಎಂದು ಹೇಳಿದ್ದೆ ಎಂದರು.
ಆಣೆ ಪ್ರಮಾಣ ನಡೆದು ಸರಿಯಾಗಿ ಒಂದೆ ವರ್ಷಕ್ಕೆ ಸತ್ಯ ಯಾವುದು ಎಂಬುದು ತೀರ್ಮಾನವಾಗಿದೆ. ಈ ಮೂಲಕ ಚಾಮುಂಡಿ ತಾಯಿ ನ್ಯಾಯ ದೇವತೆ ಮೂಲಕ ತಪ್ಪು ಮಾಡಿದವರಿಗೆ ಶಿಕ್ಷೆ ಕೊಟ್ಟಿದ್ದಾಳೆ ಎಂದರು.
ನಾನು ದೇವಾಲಯದಲ್ಲಿ ಕಣ್ಣೀರಿಟ್ಟು ತಪ್ಪು ಯಾರದ್ದು ಸರಿಯಾರದ್ದು ಎಂದು ನೀನೇ ತೋರಿಸು ತಾಯಿ ಎಂದು ಕೇಳಿದ್ದೆ. ಪ್ರಸಂಗ ನಡೆದ ಸರಿಯಾಗಿ ಒಂದು ವರ್ಷಕ್ಕೆ ನ್ಯಾಯ ದೇವತೆ ತೀರ್ಪು ಕೊಟ್ಟಿದ್ದಾಳೆ. ತಪ್ಪು ಮಾಡಿದ್ದರೂ ಭಂಡತನದಿಂದ ಶಕ್ತಿ ದೇವತೆ ಮುಂದೆ ಕೂತರೆ ಏನಾಗುತ್ತದೆ ಎಂಬುದಕ್ಕೆ ಇದು ಉದಾಹರಣೆಯಾಗಿದ್ದು ನಮ್ಮಂತ ರಾಜಕಾರಣಿಗಳಿಗೆ ಪಾಠ ಎಂದು ಪ್ರತಿಕ್ರಿಯಿಸಿದರು.
ಅಂದು ವಿಶ್ವನಾಥ್‌ ಅವರನ್ನು ಹಲವು ನಮ್ಮ ಪಕ್ಷದ ಮುಖಂಡರ ವಿರೋಧದ ನಡುವೆಯೂ ಪಕ್ಷಕ್ಕೆ ಕರೆತಂದು ಗೆಲ್ಲಿಸಿದ್ದೆವು. ನಮ್ಮ ಪಕ್ಷದ ಹಿರಿಯರಾದ ಮಾಜಿ ಪ್ರಧಾನಿ ದೇವೇಗೌಡ ಅವರು, ಕ್ಷೇತ್ರಕ್ಕೆ ಬಂದು ಮತ ಯಾಚಿಸಿದ್ದರು. ಅವರು ಗೆದ್ದ ಬಳಿಕ ಪಕ್ಷ ತೊರೆದು ಹೋದರು. ಇದಕ್ಕೆ ನೊಂದು ದೇವರಲ್ಲಿ ನಾನು ಬೇಡಿಕೊಂಡಿದ್ದೇ ಸತ್ಯಾಂಶ ಬೇಗ ಹೊರಬರಲಿ ಅಂತ ಎಂದ ಅವರು, ಅದಕ್ಕೆ ಇಂದು ತಾಯಿ ಚಾಮುಂಡಿ ಸತ್ಯವನ್ನು ಬಹಿರಂಗ ಪಡಿಸಿದ್ದಾಳೆ ಎಂದು ಹೇಳಿದರು.
ಇನ್ನು ಕಳೆದ ವರ್ಷ ವಿಶ್ವನಾಥ್‌ ಮತ್ತು ಸಾರಾ ಮಹೇಶ್‌ ನಡುವೆ ನಡೆದ ಒಂದು ರೀತಿಯ ಗಲಾಟೆ ಭಾರಿ ತಾರಕಕ್ಕೆ ಏರಿತು. ಅದು ಎಷ್ಟರ ಮಟ್ಟಿಗೆ ಎಂದರೆ ಒಬ್ಬರಿಗೊಬ್ಬರು ಬಳಸಬಾರದ ಪದಗಳನ್ನೇಲ್ಲ ಬಳಿಸ ನಿಂದಿಸಿಕೊಂಡಿದ್ದನ್ನು ಇಲ್ಲಿ ಸ್ಮರಿಸಬಹುದುದಾಗಿದೆ.
