ವಿಜಯಪಥ ಸ್ತ್ರೀ ಕಾಳಜಿ
ಬೆಂಗಳೂರು: ಮಾರಕ ಸೋಂಕು ಕೊರೊನಾ ಸೋಂಕು ಈಗಾಗಲೇ ವಿಶ್ವದೆಲ್ಲೆಡೆ ಲಕ್ಷಾಂತರ ಜನರ ಪ್ರಾಣ ಬಲಿ ತೆಗೆದುಕೊಂಡಿದೆ. ಕೋಟ್ಯಂತರ ಮಂದಿ ಸೋಂಕಿಗೆ ಒಳಗಾಗಿದ್ದಾರೆ. ಭಾರತದಲ್ಲಿ ಕೂಡ ಸೋಂಕಿತರ ಸಂಖ್ಯೆಯು ಹೆಚ್ಚಾಗುತ್ತಲೇ ಇದೆ.
ನಿಖರ ಔಷಧ ಇಲ್ಲದೆ ಇರುವಂತಹ ಸೋಂಕು ಇದಾಗಿರುವ ಕಾರಣದಿಂದಾಗಿ ಜನರು ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಅದು ಇಂದಿನ ಅಗತ್ಯವೂ ಆಗಿದೆ.
ಇನ್ನು ಕೊರೊನಾ ಗರ್ಭಿಣಿಯರಿಗೆ ತಗುಲಿರುವ ಬಗ್ಗೆ ಹೆಚ್ಚಿನ ಅಂಕಿಅಂಶಗಳು ಇದುವರೆಗೂ ಲಭ್ಯವಾಗಿಲ್ಲ. ಕಾಯಿಲೆ ತಡೆ ಹಾಗೂ ನಿಯಂತ್ರಣ ಕೇಂದ್ರ(ಸಿಡಿಸಿ) ಹೇಳುವ ಪ್ರಕಾರ, ಗರ್ಭಿಣಿಯರು ಕೊರೊನಾ ವೈರಸ್ ಸೋಂಕಿಗೆ ತುತ್ತಾಗಿರುವಂತಹ ಯಾವುದೇ ರೀತಿಯ ವೈಜ್ಞಾನಿಕ ವರದಿಗಳು ಇದುವರೆಗೆ ಲಭ್ಯವಾಗಿಲ್ಲ. ಆದರೆ, ಗರ್ಭಿಣಿಯರಲ್ಲಿ ಪ್ರತಿರಕ್ಷಕ ಮತ್ತು ಶಾರೀರಿಕ ಬದಲಾವಣೆಗಳು ಕಂಡುಬರುವ ಹಿನ್ನೆಲೆಯಲ್ಲಿ ಅವರು ಕೊವಿಡ್-19ನಂತಹ ಶ್ವಾಸಕೋಶದ ವೈರಲ್ ನಂತಹ ಸೋಂಕಿಗೆ ತುತ್ತಾಗುವಂತಹ ಸಾಧ್ಯತೆಯು ಹೆಚ್ಚಾಗಿರುತ್ತದೆ.
ಸಿಡಿಸಿ ಹೇಳುವ ಪ್ರಕಾರ ಕೊರೊನಾ ಸೋಂಕಿತ ವ್ಯಕ್ತಿ ಗರ್ಭಿಣಿಯರ ತುಂಬಾ ಹತ್ತಿರದಲ್ಲಿದ್ದು ಹೆಚ್ಚಾಗಿ ಉಸಿರಾಡಿದರೆ ಇದು ಹರಡುವ ಸಾಧ್ಯತೆ ಹೆಚ್ಚಿದೆ. ಆದರೆ ಇದರಿಂದ ಗರ್ಭದಲ್ಲಿರುವ ಮಗುವಿಗೆ ಸೋಂಕು ತಗುಲಿರುವ ಸಾಧ್ಯತೆ ಇದುವರೆಗೂ ಕಂಡುಬಂದಿಲ್ಲ ಮತ್ತು ಶಿಶುವಿನಲ್ಲಿ ಕೊವಿಡ್-19 ಪಾಸಿಟಿವ್ ಕೂಡ ಕಂಡುಬಂದಿಲ್ಲ.
ಕೊವಿಡ್ -19 ಸೋಂಕು ಸ್ತನಪಾನದಿಂದ ಬರುವುದೇ ? ಕೊರೊನಾ ಸೋಂಕು ಇರುವ ಮಹಿಳೆಯರು ಮಗುವಿಗೆ ಹಾಲುಣಿಸುವುದರಿಂದ ಸೋಂಕು ತಗುಲುತ್ತದೆ ಎಂಬ ಮಾಹಿತಿ ಇದುವರೆಗೂ ಲಭ್ಯವಾಗಿಲ್ಲ. ಈ ಬಗ್ಗೆ ಯಾವುದೇ ದಾಖಲೆಗಳು ಇಲ್ಲ ಎಂದು ಸಿಡಿಸಿ ತಿಳಿಸಿದೆ.
-
- ಗರ್ಭಿಣಿಯರು ಮುನ್ನೆಚ್ಚರಿಕೆ ಕ್ರಮ ಹೇಗೆ ?
- ಕೆಮ್ಮು, ಶೀನು ಅಥವಾ ಶೌಚಾಲಯ ಬಳಸಿದ ಬಳಿಕ 20 ಸೆಕೆಂಡ್‌ ಸಾಬೂನು ಹಾಕಿ ಕೈಗಳನ್ನು ತೊಳೆಯಿರಿ.
- ಕೆಮ್ಮುವವರು ಅಥವಾ ಶೀನುವವರಿಂದ ನೀವು ಸಾಮಾನ್ಯವಾಗಿ ಮೂರು ಅಡಿ ದೂರ ಅಂತರ ಕಾಯ್ದುಕೊಳ್ಳಿ.
- ಅಸ್ವಸ್ಥತೆ ಕಾಣಿಸಿಕೊಂಡರೆ ಆಗ ಮನೆಯಲ್ಲಿ ಕುಳಿತುಕೊಳ್ಳಿ.
- ಶೀನುವಾಗ ಮತ್ತು ಕೆಮ್ಮುವಾಗ ಮೊಣಕೈ ಅಡ್ಡ ಹಿಡಿದುಕೊಳ್ಳಿ ಮತ್ತು ಇದನ್ನು ಬಳಸುವ ಮೊದಲು ನೀವು ಸರಿಯಾಗಿ ಕೈ ತೊಳೆಯಿರಿ.
- ಇದರಿಂದ ಕೊರೊನಾ ಸೋಂಕು ತಗಲುವುದನ್ನು ನಿಯಂತ್ರಿಸಲು ಸಾಧ್ಯವಿದೆ.
