ಟಾಟಾ ಏಸ್‌-ಬೈಕ್‌ ನಡುವೆ ಡಿಕ್ಕೆ: ಹೋಂ ಗಾರ್ಡ್‌ ಸಾವು

ಗುಂಡ್ಲುಪೇಟೆ: ಟಾಟಾ ಏಸ್ ಹಾಗೂ ಬೈಕ್ ನಡುವೆ ಸಂಭವಿಸಿದ ಅಪಘಾತದಲ್ಲಿ ಹೋಂ ಗಾರ್ಡ್ ಸಾವಿಗೀಡಾಗಿರುವ ಘಟನೆ ಪಟ್ಟಣದ ಹೊರವಲಯದಲ್ಲಿರುವ ಸಾ ಮಿಲ್ ಮುಂಭಾಗದಲ್ಲಿ ನಡೆದಿದೆ.

ಹುಲ್ಲೇಪುರ ಗ್ರಾಮದ ನಂಜುಂಡಯ್ಯ (38) ಮೃತ ವ್ಯಕ್ತಿ. ಹೋಂ ಗಾರ್ಡ್ ಆಗಿ ಕೆಲಸ ಮಾಡುತ್ತಿದ್ದ ಇವರು ಕಳೆದ 15ದಿನಗಳಿಂದ ವಿಶ್ರಾಂತಿಯಲ್ಲಿದ್ದರು.

ಅಪಘಾತ ಸಂಭವಿಸಿದ ತಿರುವಿನಲ್ಲಿ ಪೊದೆಗಳಿರುವ ಕಾರಣ, ವಾಹನಗಳಿಗೆ ಎದುರಿನಿಂದ ಬರುವ ವ್ಯಕ್ತಿ ಕಾಣದೆ ಈ ಅಪಘಾತ ಸಂಭವಿಸಿದೆ ಎಂದು ಹೇಳಲಾಗಿದೆ. ಗುಂಡ್ಲುಪೇಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಸಾರ್ವಜನಿಕರ ಆಕ್ರೋಶ: ಅಪಘಾತ ಸಂಭವಿಸಿದ ತಿರುವಿನಲ್ಲಿ ಮುಳ್ಳಿನ ಗಿಡಗಳು ಬೆಳೆದು ದೊಡ್ಡದಾಗಿರುವುದರಿಂದ   ಅಪಘಾತ ಸಂಭವಿಸುತ್ತಿವೆ.

ರಸ್ತೆ ಕಿರಿದಾಗಿರುವುದೂ ಕೂಡ ಅಪಘಾತಕ್ಕೆ ಕಾರಣವಾಗಿದೆ. ಕೂಡಲೇ ಪೊದೆಗಳನ್ನು ತೆರವು ಮಾಡಬೇಕು ಎಂದು ರೈತ ಮುಖಂಡ ಶಿವಪುರ ಮಹದೇವಪ್ಪ ಆಕ್ರೋಶ ವ್ಯಕ್ತಪಡಿಸಿದರು.