ಹೃದಯಾಘಾತವಾಗಿದ್ದ ರೋಗಿಗೆ ಚಿಕಿತ್ಸೆ ನೀಡುತ್ತಿದ್ದಾಗ ವೈದ್ಯರಿಗೂ ಹೃದಯಾಘಾತ, ರೋಗಿ-ವೈದ್ಯ ಇಬ್ಬರೂ ಮೃತ

ಕಾಮಾರೆಡ್ಡಿ: ಹೃದಯಾಘಾತದಿಂದ ಆಸ್ಪತ್ರೆಗೆ ದಾಖಲಾಗಿದ್ದ ರೋಗಿಗೆ ಚಿಕಿತ್ಸೆ ನೀಡುತ್ತಿದ್ದ ಸಂದರ್ಭದಲ್ಲಿ ಆ ವೈದ್ಯರಿಗೂ ಹೃದಯಾಘಾತ ಸಂಭವಿಸಿ ಇಬ್ಬರೂ ಸಾವನ್ನಪ್ಪಿದ ಮನಕಲಕುವ ಘಟನೆ ತೆಲಂಗಾಣದಲ್ಲಿ ನಡೆದಿದೆ.

ಕಾಮಾರೆಡ್ಡಿ ಜಿಲ್ಲೆಯ ಗುಜ್ಜಲ ತಾಂಡಾದ ಜಗ್ಯಾ ನಾಯಕ್ ಎಂಬಾತ ಹೃದಯಾಘಾತದಿಂದ ಗಾಂಧಾರಿಯ ಖಾಸಗಿ ನರ್ಸಿಂಗ್ ಹೋಂ ಗೆ ದಾಖಲಾಗಿದ್ದರು.

ಜಗ್ಯಾ ನಾಯಕ್‌ಗೆ ಚಿಕಿತ್ಸೆ ನೀಡುತ್ತಿದ್ದ ಡಾ.ಲಕ್ಷ್ಮಣ್ ಚಿಕಿತ್ಸೆ ನೀಡುತ್ತಿದ್ದಾಗಲೇ ಅವರಿಗೂ ಹೃದಯಾಘಾತವಾಗಿದ್ದು, ರೋಗಿಯನ್ನು ನೋಡುತ್ತಲೇ ಕೆಳಗೆ ಕುಸಿದು ಬಿದ್ದಿದ್ದಾರೆ.

ರೋಗಿಗೆ ಚಿಕಿತ್ಸೆ ನಿಡುತ್ತಿದ್ದಾಗಲೇ ಕುಸಿದು ಬಿದ್ದ ವೈದ್ಯರ ಜೀವ ಉಳಿಸಲು ಆಸ್ಪತ್ರೆ ಸಿಬ್ಬಂದಿ ಎಷ್ಟೇ ಪ್ರಯತ್ನಿಸಿದರೂ ಪ್ರಯೋಜನವಾಗದೆ ಕೊನೆಯುಸಿರೆಳೆದಿದ್ದಾರೆ.

ವೈದ್ಯರಿಗೆ ಹೃದಯಾಘಾತವಾದ ಸುದ್ದಿ ತಿಳಿಯುತ್ತಿದ್ದಂತೆ ಏನು ಮಾಡಬೇಕೆಂದು ದಿಕ್ಕು ತೋಚದ ಆಸ್ಪತ್ರೆಗೆ ದಾಖಲಾಗಿದ್ದ ರೋಗಿಯ ಸಂಬಂಧಿಕರು ಆತನನ್ನು ಬೇರೆ ಆಸ್ಪತ್ರೆಗೆ ಕರೆದೊಯ್ಯುವ ವೇಳೆ ಮಾರ್ಗ ಮಧ್ಯೆ ರೋಗಿಯೂ ಜೀವ ಬಿಟ್ಟಿದ್ದಾರೆ.